Ieremia

23 KUA pehe mai a Iehova, Oi te fakaalofa ke he tau leveki mamoe kua moumou mo e fakamavehevehe e tau mamoe ne fagai e au!

2 Ko e mena ia kua vagahau mai pehe a Iehova ko e Atua a Isaraela ke he tau leveki mamoe kua leveki haku a motu, Kua fakamavehevehe e mutolu haku a fuifui mamoe, mo e vega a lautolu, mo e nakai ahi e mutolu a lautolu; kitiala, to taui atu e au kia mutolu e kelea he tau mahani ha mutolu, kua pihia mai a Iehova.

3 To fakapotopoto foki e au a lautolu ne toe he haku a fuifui mamoe mai he tau motu oti ne vega atu e au a lautolu ki ai, mo e liuaki mai e ia a lautolu ke he ha lautolu a tau lotopā; ti tolotologa a lautolu mo e fakatokologa ai.

4 To kotofa foki e au e tau leveki mamoe ma lautolu ke leveki a lautolu; ti nakai tuai matakutaku a lautolu, ti nakai fakaatukehe a lautolu, ti nakai galo taha ia lautolu, kua pihia mai a Iehova.

5 Kua pehe mai a Iehova, Kitiala, to hoko mai e tau aho ke fakatupu ai e au ma Tavita e La akau tututonu, to pule foki a ia ko e Patuiki, to pule a ia mo e pulotu, to eke foki e ia e fakafiliaga mo e tututonu ke he lalolagi.

6 Ko e tau aho kua pule ai a ia, ke fakamoui ai a Iuta, to nofo foki a Isaraela mo e monuina, ko e higoa foki hanai ke ui ai a ia, KO IEHOVA HA TAUTOLU A TUTUTONU.

7 Kua pehe mai a Iehova, Ko e mena ia, kitiala, to hoko mai e vaha ke nakai tuai pehe age e tau tagata, Kua moui a Iehova ne ta hake e fanau a Isaraela mai he motu ko Aikupito;

8 Ka e pehe, Kua moui a Iehova, ne ta hake, mo e takitaki mai ai e fanau he magafaoa a Isaraela he motu ke he fahi tokelau, mo e tau motu oti ne vega e au a lautolu ki ai; to nonofo foki a lautolu ke he ha lautolu a kelekele.

9 Ko e tau kupu ke he tau perofeta. Kua malipilipi haku loto i loto ia au; kua vivivivi haku tau hui motua oti; kua eke au ke tuga e tagata konahia, ke tuga e tagata ne mahala ke he uaina, ha ko Iehova mo e hana tau kupu tapu.

10 Ha kua puke e motu ke he tau tagata faivao, kua mānu e motu ha kua fakamalaia ni a ia; kua magomago ai e tau kaina he vao; kua kelea foki ha lautolu a tafepoi, mo e nakai tonu ha lautolu a malolo.

11 Ha ko e tau perofeta katoa mo e tau ekepoa kua kelea a lautolu; kua kitia e au ha lautolu a mahani kelea ke he haku a fale ni, kua pihia mai a Iehova.

12 Ko e mena ia to eke ha lautolu a tau puhala kia lautolu ke tuga e tau mena momole ke he pouli kikio; to vega a lautolu, mo e veveli ai a lautolu; ha ko e mena to fakahoko e au e malaia ki luga ia lautolu, ko e tau haia ke ahi mai ai a lautolu, kua pihia mai a Iehova.

13 Kua kitia e au e goagoa he tau perofeta i Samaria; kua perofeta a lautolu ke he higoa a Paala, mo e fakahehe ai e lautolu haku motu ko Isaraela.

14 Kua kitia foki e au e mena vihiatia ke he tau perofeta i Ierusalema; kua faivao a lautolu, mo e o fano a lautolu mo e pikopiko; kua fakamalolo foki e lautolu e tau lima ha lautolu ne mahani kelea, ke nakai liu mai ai taha he hana tau mahani kelea; kua eke a lautolu oti kia au ke tuga a Sotoma, mo lautolu ne nonofo ai ke tuga a Komora.

15 Ko e mena ia kua pehe mai e vagahau a Iehova Sapaota ke he tau perofeta, Kitiala, to fagai aki e au a lautolu a laena, mo e fakainu aki e au a lautolu e vai kona; ha ko e tau perofeta i Ierusalema kua hoko atu ai e mahani kelea ke he motu oti.

16 Kua pehe mai e vagahau a Iehova, Sapaota, Aua neke fanogonogo a mutolu ke he tau kupu he tau perofeta kua perofeta atu kia mutolu; kua fakahehe e lautolu a mutolu ke eke e tau mena fakateaga; kua vagahau atu e lautolu ke he fakakiteaga mai he tau loto ha lautolu, ka e nakai mai he fofoga a Iehova.

17 Kua pehe mau a lautolu kia lautolu kua fakavihia mai kia au, Kua talahau mai e Iehova, To monuina a mutolu; mo e pehe age a lautolu ke he tau tagata oti kua o fano ai ke lata mo e tau loto mao ha lautolu, Nakai hoko ha malaia kia mutolu.

18 Ka ko hai kia ne tu atu he pulega ai a Iehova, mo e kitia, mo e fanogonogo ai ke he hana tau kupu? Po ko hai kia kua hagao atu ke he hana tau kupu, mo e logona ai?

19 Kitiala, kua fina atu e afa ia Iehova, ko e hana ita haia, ko e afa to kai maka; ke to lahi ai ki luga he tau ulu ha lautolu ne mahani kelea.

20 To nakai liu e ita a Iehova, ato eke ai e ia, ato fakahoko foki e ia e tau manatu he hana finagalo; to manamanatu fakalahi a mutolu ki ai ke he tau aho a mui.

21 Nakai fakafano atu e au e tau perofeta na, ka e tafepoi ai a lautolu; nakai vagahau atu e au kia lautolu, ka e perofeta ai a lautolu.

22 Ane mai kua tutu ai a lautolu he pulega ai au, ko kua fakailoa atu e lautolu haku a tau kupu ke he motu haku, mo e liuaki mai e lautolu a lautolu he tau puhala kelea ha lautolu, mo e kelea he ha lautolu a tau mahani.

23 Kua pehe mai a Iehova, Ko e Atua kia au ne tata, ka e nakai kia ko e Atua ne mamao?

24 Kua pehe mai a Iehova, Kua maeke kia ke he tagata ke fakamumuli ai ke he tau mena galo ke nakai kitia e au a ia? Nakai kia puke ai a lagi mo e lalolagi ia au? kua pihia mai a Iehova.

25 Kua logona e au e tau mena kua tala atu he tau perofeta, kua perofeta ai mo e pikopiko ke he haku a higoa, kua pehe atu, Kua miti tuai e au, kua miti tuai e au.

26 To ha i ai e tau mena nai ato a fe ke he tau loto he tau perofeta, kua talahau mena mo e pikopiko? ko e tau perofeta ni a lautolu he tau pikopiko ha ha he tau loto ha lautolu?

27 Kua manatu e lautolu, ke fakanimo he motu haku haku a higoa ha ko e tau miti ha lautolu kua talahau ai e lautolu ko e taha ke he taha, tuga he fakanimo he tau matua ha lautolu haku a higoa ha ko Paala.

28 Ko e perofeta kua fai miti kia talahau atu e ia hana miti; mo ia ne ha ia ia haku a kupu, kia talatala atu e ia haku a kupu mo e fakamoli. Kua pehe mai a Iehova, Kua lata kia e tau kakau saito mo e tau fua saito?

29 Kua pehe mai a Iehova, Nakai kia tuga e afi haku a kupu? ti nakai kia tuga foki e hamala kua tuki malipilipi aki e maka tumau?

30 Ko e mena ia, kitiala, kua eke e au mo tau fi haku e tau perofeta, kua takitaha mo e kaiha mai haku tau kupu he tagata ne katofia mo ia, kua pihia mai a Iehova.

31 Kua pehe mai a Iehova, Kitiala, kua eke e au mo tau fi haku e tau perofeta, kua vagahau ai he tau alelo ha lautolu, kua pehe atu, Kua pehe mai a ia.

32 Kua pehe mai a Iehova, Kitiala, kua eke e au mo tau fi haku a lautolu, kua fakamatala e tau miti pikopiko, mo e talatala atu ai e lautolu, mo e fakahehe ai e lautolu haku a motu ke he tau kupu pikopiko ha lautolu, mo e ha lautolu a hula noa; ka e nakai fakafano atu e au a lautolu, ti nakai poaki atu e au kia lautolu; ti nakai ni aoga a lautolu ke he motu nai, kua pihia mai a Iehova.

33 Ka huhu mai foki kia koe e motu nai, po ke perofeta, po ke ekepoa, kua pehe mai, Ko e heigoa kia e kavega mai ia Iehova? ti pehe atu a koe kia lautolu, Ko e heigoa e kavega? To tiaki e au a mutolu, kua pihia mai a Iehova.

34 Ka ko e perofeta, po ke ekepoa, po ke ekepoa, po ke motu kua pehe mai, Ko e kavega mai ia Iehova; to taui atu e au ke he tagata ia katoa mo e hana magafaoa.

35 Kia pehe ha mutolu a vagahau atu, ko e tagata kia ia ne katofia mo ia, mo e tagata ke he hana kapitiga, Ko e heigoa kia kua tali mai e Iehova? ko e heigoa foki kua vagahau mai e Iehova?

36 Ti nakai tokutoku foki e mutolu e kavega mai ia Iehova; ha ko e takitaki ni e tagata mo e eke hana tau kupu mo kavega māna; ha kua liliu kehe e mutolu e tau kupu he Atua moui, ko Iehova Sapaota, ha tautolu a Atua.

37 Kia vagahau atu pehe a koe ke he perofeta, Ko e heigaa kia kua tali mai e Iehova kia koe, ko e heigoa foki kua vagahau mai a Iehova?

38 Ka ko e mena kaeke ke pehe age a mutolu, Ko e kavega mai ia Iehova, ko e mena ia kua pehe mai e vagahau a Iehovh, Ha kua talahau ai e mutolu e kupu nai, Ko e kavega mai ia Iehova, ka kua fakafano atu e au kia mutolu kua pehe atu, Aua neke pehe a mutolu, Ko e kavega mai ia Iehova;

39 Ko e mena ia kitiala, to nimo ni ia au a mutolu mo e tiaki e au a mutolu mai mua haku, katoa mo e maga ne foaki atu ai e au kia mutolu mo e tau matua ha mutolu.

40 To tuku atu e au kia mutolu e mena ke eke fakakelea ai a mutolu tukulagi, mo e mā ai tukulagi, nakai nimo.