Ieremia

25 KO e kupu a Iehova ne hoko mai kia Ieremia ke he motu oti a Iuta ke he tau fa a Iehoakima ko e tama a Iosia, ko e patuiki a Iuta, ko e tau fakamua haia a Nepukanesa ko e patuiki a Papelonia,

2 Ne vagahau ai e perofeta ko Ieremia ke he motu oti a Iuta mo lautolu oti ne nonofo i Ierusalema, kua pehe atu,

3 Kua kamata ke he tau hogofulu ma tolu a Iosia ko e tama a Amone, ko e patuiki a Iuta, ke hoko ke he aho nai, ko e uafulu ma tolu ia e tau, kua hoko mai ai kia au e kupu a Iehova, ti vagahau atu ai e au kia mutolu, ne uhu matike au mo e vagahau atu; ka e nakai ni fanogonogo mai a mutolu.

4 Kua fakafano atu e Iehova kia mutolu hana tau fekafekau oti, ko e tau perofeta, ne uhu matike a ia mo e fakafano atu a lautolu; ka e nakai ni fanogonogo mai a mutolu, mo e nakai haga mai a mutolu ha mutolu a tau teliga ke fanogonogo mai ai.

5 Kua pehe atu a lautolu, Kia takitaha a mutolu mo e liu mai he hana puhala kelea, mo e kelea he ha mutolu a tau mahani, ti nonofo ai a mutolu ke he kelekele kua foaki mai e Iehova kia mutolu mo e tau matua ha mutolu mai i tuai tigahau ke hoko ke he tukulagi.

6 Ti aua neke mumui atu a mutolu ke he tau atua kehe, ke fekafekau ki ai, mo e fakaveveli fakafohifo ki ai; ti ua fakahogohogomanava mai a mutolu kia au ke he tau mena kua eke he tau lima ha mutolu; ti nakai fakamamahi atu e au a mutolu.

7 Ka e nakai fanogonogo mai a mutolu kia au, kua pihia mai a Iehova; kia fakahogohogomanava mai a mutolu kia au ke he tau mena kua eke he tau lima ha mutolu, ke mamahi ai a mutolu.

8 Ko e mena ia, kua pehe mai e vagahau a Iehova Sapaota, Kua nakai fanogonogo mai a mutolu ke he haku tau kupu,

9 Kua pehe mai a Iehova, kitiala, ko e mena ia to fakafano atu e au, mo e uta ai e tau magafaoa oti he fahi tokelau, mo Nepukanesa ko e patuiki a Papelonia ko e haku a fekafekau, mo e tamai e au a lautolu ke tau mo e motu nai, mo lautolu ne nonofo ai, mo e tau motu oti ne agaagai mai ai; to fakaotioti e au a lautolu, mo e eke a lautolu mo mena ke ofo ai, mo mena foki ke fakakatakatakē ai, mo tau mena foki kua moumou tukulagi.

10 To fakahiku e au ia lautolu e leo fiafia, mo e leo he olioli, ko e leo he kitofaihoana, mo e leo he kitofaitane, ko e koli he tau makaholo, mo e maama he lamepa.

11 To eke foki e au e motu oti nai mo mena kua moumou, mo e mena ke ofo ai; ka to fekafekau ai e tau motu ia ke he patuiki a Papelonia ke he tau tau fitugofulu.

12 Ka fakakatoatoa ai e fitugofulu e au, ti taui atu ai e au ke he patuiki a Papelonia, mo e motu na, kua pihia mai a Iehova, ha ko e tau mahani kelea ha lautolu, ko e motu foki he tau tagata Kaletaia, to eke e au mo tau mena kua moumou tukulagi.

13 To fakahoko atu foki e au ke he motu na haku tau kupu oti ne vagahau atu e au ke hoki ki ai, ko e tau kupu oti kua tohi ke he tohi nai ne fakamatala ai e Ieremia ke he atu motu oti.

14 Ha ko e mena to fakatupa ai a lautolu ko lautolu ni, he tau motu loga, mo e tau patuiki lalahi; to taui atu foki e au kia lautolu ke lata mo e mahani ha lautolu, ke lata foki mo e tau gahua he tau lima ha lautolu.

15 Ha kua vagahau mai pehe a Iehova ko e Atua a Isaraela kia au, Kia uta e koe e kapiniu uaina nai, ko e haku a ita ni, mai he lima haku, mo e fakainu aki e koe e tau motu oti ke fakafano atu e au a koe ki ai.

16 To inu a lautolu, mo e tauveli, mo e goagoa a lautolu, ha ko e pelu ke fakafano atu e au kia lautolu.

17 Ti uta e au e kapiniu mai he lima a Iehova, mo e fakainu aki e au e tau motu oti ne fakafano au ki ai e Iehova;

18 Ko Ierusalema, mo e tau maga i Iuta, mo e hana tau patuiki, mo e hana tau iki, to eke a lautolu mo mena kua moumou, mo e mena ke ofo ai, mo e mena ke fakakatakatakē ai, mo e mena ke kaialu ki ai tuga ne eke ai he aho nai;

19 Ko Farao, ko e patuiki a Aikupito, mo e hana tau fekafekau, mo e tau iki ha ha ia ia, mo e hana motu oti;

20 Ko e tau tagata oti mai he tau motu kehekehe, mo e tau patuiki oti he motu ko Usa, mo e tau patuiki oti he motu ko Filisitia, mo Asekelona, mo Kasa, mo Ekerona, mo lautolu ne toe i Asetota;

21 Ko Etoma mo Moapi, mo e fanau a Amoni;

22 Ko e tau patuiki oti a Turo, mo e tau patuiki oti a Saitonu, mo e tau patuiki he motu kua tu ke he hala kau tahi ke he fahi atu he tahi;

23 Ko Titana, mo Tema, mo Pusa, mo lautolu oti kua hifi ha lautolu a tau hafe kakau;

24 Ko e tau patuiki oti foki a Arapi, mo e tau patuiki oti he tau tagata kehekehe kua nonofo ke he tutakale;

25 Ko e tau patuiki oti foki a Simeri, mo e tau patuiki oti a Elama, mo e tau patuiki oti a Metai;

26 Mo e tau patuiki oti he fahi tokelau, ko lautolu ne tata, mo lautolu ne mamao, ko e taha mo e taha, mo e tau kautu oti he lalolagi ha ha he fuga kelekele; ka e inu fakamui a Sisaka ia lautolu.

27 Ti pehe atu a koe kia lautolu, Kua vagahau mai pehe a Iehova Sapaota ko e Atua a Isaraela, Kia inu ā mutolu, mo e inu ke konahia, mo e kokō, mo e veveli, ti aua neke liliu tutu a mutolu, ha ko e pelu ke fakafano atu ai e au kia mutolu.

28 Ka ko e mena kaeke ke nakai mafai a lautolu ke uta e kapiniu mai he lima hau ke inu ai, ti pehe atu a koe kia lautolu, Kua vagahau mai pehe a Iehova Sapaota, To inu ai ni a mutolu.

29 Ha ko e mena kitiala, kua kamata e au ke fakahoko ai e malaia ke he maga kua fakahigoa aki ke he haku a higoa, ka ko mutolu, to hao kia a mutolu? Nakai ni hao a mutolu; ha kua ui atu e au ke he pelu ke hoko kia lautolu oti kua nonofo ke he lalolagi, kua pihia mai a Iehova Sapaota.

30 Ko koe foki, kia talahau atu e koe kia lautolu e tau kupu oti nai, mo e pehe atu a koe kia lautolu, To fakaleolahi mai a Iehova mai luga, mo e leo mai hana fofoga mai he haeleaga tapu hana; to fakaleolahi atu ni a ia ke he hana lotopa; to kalaga a ia, tuga a lautolu ne taholi e tau fua vine, kia lautolu oti kua nonofo ke he lalolagi.

31 To hoko e go ke he motuaga he lalolagi; ha kua fai fakafiliaga a Iehova mo e tau motu kehe, to fakafili e ia e tau tagata oti; to tuku atu e ia ke he pelu a lautolu ne mahani kelea, kua pihia mai a Iehova.

32 Kua pehe mai e vagahau a Iehova Sapaota, Kitiala, to fina atu e malaia ke kamata mai he taha motu ke hoko atu ke he taha motu, to hake mai e afa lahi mai he tau kala he lalolagi.

33 To ha i ai ke he aho ia a lautolu kua keli e Iehova ke kamata mai he taha potu he lalolagi ke hoko atu ke he taha potu he lalolagi; nakai tagi tatuki ai ha ko lautolu, to nakai fakapotopoto ai a lautolu, to nakai tanu a lautolu; to eke ni a lautolu mo otaota ke he fuga kelekele.

34 Ko mutolu ko e tau leveki mamoe kia tagi fekapai ā ā mutolu, mo e tagi; ko mutolu ko e tau takitaki he fuifui mamoe, kia taveliveli ā mutolu ke he tau efuefuafi, ha kua hoko kia mutolu e aho ke keli mo e fakamavehevehe ai a mutolu; to to hifo a mutolu tuga ne kapiniu fulufuluola.

35 To nakai moua he tau leveki mamoe ha mena ke fehola ki ai, to nakai hao foki e tau takitaki he fuifui mamoe.

36 To logona ai e leo he tagi aue he tau leveki mamoe, mo e tagi fekapai he tau takitaki he fuifui mamoe; ha kua fakaoti e Iehova e tau mena ne fagai ai e tau fuifui mamoe ha lautolu.

37 Ko e tau mena ne totolo ai e tau manu mo e nakai haofia, kua fakaoti ia ha ko e ita lahi a Iehova.

38 Kua tiaki e ia hana fale api, tuga ne leona, ha kua eke ha lautolu a motu mo mena ke ofo ai ha ko e ita hana ne favale, mo e hana ita lahi ni.