Ieremia

27 KO e kamataaga he eke mo patuiki a Iehoakima ko e tama a Iosia ko e patuiki a Iuta, ne hoko mai ai e kupu nai kia Ieremia ia Iehova, kua pehe mai,

2 Kua vagahau mai pehe a Iehova kia au, Kia eke e koe māu e tau liliaga mo e tau lakau hahamo, mo e tuku ai e koe ki luga he ua hau;

3 Ti fakafano age ai e koe ke he patuiki a Etoma, mo e patuiki a Moapi, mo e patuiki he fanau a Amoni, mo e patuiki a Turo, mo e patuiki a Saitonu, ke he tau lima he tau fekau, ne o mai ki Ierusalema kia Setekaia ko e patuiki a Iuta;

4 Ti poaki atu e koe kia lautolu, kia pehe age a lautolu ke he tau iki ha lautolu, Kua pehe mai e vagahau a Iehova Sapaota, ko e Atua a Isaraela, Kia vagahau age pehe a mutolu ke he tau iki ha mutolu,

5 Ko au nai, ne eke e au e lalolagi, ko e tau tagata mo e tau manu ha ha he fuga kelekele, ke he haku a malolo lahi, mo e haku a lima fakaolo; ti tuku atu ai e au kia lautolu kua lata mo e haku a manatu.

6 Hanai, kua tuku atu e au e tau motu oti ia ke he lima he patuiki a Papelonia ko Nepukanesa, ko e haku a fekafekau; ko e tau manu he vao foki kua tuku atu e au ke fekafekau kia ia.

7 To fekafekau atu e tau motu oti kia ia, mo e hana tama, mo e tama ni he hana tama, ato hoko ni ke he vaha he hana motu, ti fekafekau ai a ia ke he tau motu loga, mo e tau patuiki lalahi.

8 Ka ko e motu mo e kautu kua nakai mafai ke fekafekau kia Nepukanesa na ko e patuiki a Papelonia, mo e nakai tuku atu e lautolu e tau ua ha lautolu ki lalo he lakau hahamo he patuiki a Papelonia, to taui atu e au ke he motu na, ke he pelu, mo e hoge, mo e tatalu, ato fakaoti e au a lautolu ke he hana lima, kua pihia mai a Iehova.

9 Hanai, aua neke fanogonogo a mutolu ke he ha mutolu a tau perofeta, mo e ha mutolu a tau taulaatua, mo e ha mutolu a tau miti, mo e ha mutolu a tau tagata kua talahau mena he kitekite ke he tau aolagi, mo lautolu ha ha ia mutolu kua eke e tau lagatau he tau taulaatua, ko lautolu kua talahau kia mutolu kua pehe atu, Nakai ni eke a mutolu mo tau fekafekau he patuiki a Papelonia.

10 Ha kua talahau atu e lautolu e tau pikopiko kia mutolu, ke uta fakamamao ai a mutolu he kelekele ha mutolu; kia vega foki e au a mutolu, mo e fakaotioti e au a mutolu.

11 Ka ko e motu, ke tuku ai ha lautolu a tau ua ki lalo he lakau hahamo he patuiki a Papelonia, mo e fekafekau kia ia, to toka e au e motu ia ke nofo mau ai ke he ha lautolu a kelekele, kua pihia mai a Iehova; ti gahua ai a lautolu, mo e nonofo ai a lautolu.

12 Ne vagahau atu foki e au kia Setekaia, ko e patuiki a Iuta, ke lata mo e tau kupu oti ia, kua pehe atu, Kia tuku e mutolu ha mutolu a tau ua ki lalo he lakau hahamo he patuiki a Papelonia, mo e fekafekau a mutolu kia ia mo e hana motu, kia momoui ai a mutolu.

13 Ko e fia mamate he ha a mutolu, ko koe mo e hau a motu, ke he pelu, mo e hoge, mo e tatalu, tuga ne vagahau mai ai e Iehova ke he motu kua nakai fekafekau ke he patuiki a Papelonia?

14 Aua neke fanogonogo a mutolu ke he tau kupu he tau perofeta kua tala mai kia mutolu kua pehe mai, Nakai eke a mutolu mo tau fekafekau he patuiki a Papelonia; ha ko e mena perofeta age a lautolu mo e pikopiko kia mutolu.

15 Ha kua pehe mai a Iehova, Nakai fakafano atu e au a lautolu, ha kua perofeta ai e lautolu e tau pikopiko ke he haku a higoa; kia vega ai e au a mutolu mo e fakaoti a mutolu, ko mutolu, mo e tau perofeta kua perofeta atu kia mutolu.

16 Ne vagahau atu foki e au ke he tau ekepoa mo e motu oti nai, kua pehe atu, Kua vagahau mai pehe a Iehova, Aua neke fanogonogo a mutolu ke he tau perofeta ha mutolu, kua talahau kia mutolu, kua pehe mai, Kitiala, to liuaki vave mai i Papelonia e tau kapiniu he fale a Iehova; ha ko e tau pikopiko kua perofeta ai e lautolu kia mutolu.

17 Aua neke fanogonogo a mutolu ia lautolu; kia fekafekau a mutolu ke he patuiki a Papelonia, ke momoui ai a mutolu; ke eke he ha e maga nai mo mena kua moumou?

18 Kaeke foki ko e tau perofeta a lautolu, kaeke foki kua ha ha ia lautolu e kupu a Iehova, kia olelalo atu ā lautolu kia Iehova Sapaota, ke aua neke hoko atu ki Papelonia e tau kapiniu ne toe ke he fale a Iehova, mo e fale ha patuiki a Iuta, mo Ierusalema.

19 Ha kua vagahau mai pehe a Iehova Sapaota, ke he tau pou, mo e vai, mo e tau fakatuaga kumete, mo e tau kapiniu ne toe, kua toe ai ke he maga nai,

20 Ko e tau mena ia nakai uta e Nepukanesa ko e patuiki a Papelonia he uta ai e ia a Iekonia ko e tama a Iehoakima, ko e patuiki a Iuta, mo e tau iki oti a Iuta mo Ierusalema i Ierusalema ki Papelonia.

21 Ha kua vagahau mai pehe a Iehova Sapaota, ko e Atua a Isaraela, ke he tau kapiniu ne toe ke he fale a Iehova, mo e fale he patuiki a Iuta, mo Ierusalema,

22 To uta e tau mena ia ki Papelonia, ti ha ha i ai ke he mena ia ke hoko atu ke he aho ke ahi atu e au ki ai, kua pihia mai a Iehova; ti ta mai ai e au, mo e liuaki mai e au ke he mena nai.