Ieremia

38 KUA logona e Sefatia ko e tama a Matana, mo Ketalia ko e tama a Pasura, mo Iukali ko e tama a Selemaia, mo Pasura ko e tama a Malekia, e tau kupu ne vagahau atu ai e Ieremia ke he motu oti, kua pehe atu,

2 Kua pehe mai e vagahau a Iehova, Ko ia kua nofo ke he maga nai to mate a ia ke he pelu, mo e hoge, mo e tatalu; ka ko ia kua fina atu ke he tau tagata Kaletaia to moui a ia; to eke foki hana moui mo mena hana ne fofo he tau, ti moui a ia.

3 Kua pehe mai e vagahau a Iehova, To tuku atu ni e maga nai ke he tau lima he kau he patuiki a Papelonia, ti eke ai e lautolu ma lautolu.

4 Ti pehe age e tau iki ke he patuiki, Kia tamate ai e tagata nai; ha kua fakalolelole ai e ia e tau lima he tau tagata tau kua toe ke he maga nai, mo e tau lima he motu oti, he vagahau atu a ia kia lautolu ke he tau kupu pihia; ha kua nakai kumi he tagata nai kia monuina e motu nai, ka kia malaia ni.

5 Ti pehe age e patuiki ko Setekaia, Kitiala, ha ha he tau lima ha mutolu a ia; ha kua nakai maeke ha mena ke he patuiki ka nakai lata ia kia mutolu.

6 Ti toto ai e lautolu a Ieremia, mo e tuku e lautolu a ia ke he luo a Malekia ko e tama he patuiki, ha ha he lotopa he fale puipui; kua tuku hifo e lautolu a Ieremia ke he tau toua. Nakai toka ai ha vai ke he luo, ka ko e pelapela; ti tomo ai a Ieremia ke he pelapela.

7 Kua logona e Epetameleka ko e tagata Aitiope, ko e eunuka ha ha he fale he patuiki, kua tuku hifo a Ieremia ke he luo, kua nofo foki e patuiki ke he gutuhala a Peniamina.

8 Ti fina atu ai a Epetameleka he fale he patuiki, ti vagahau atu a ia ke he patuiki, kua pehe atu,

9 Ko e iki na e, ko e patuiki, kua mahani kelea e tau tagata na ke he tau mena oti ne eke e lautolu ke he perofeta ko Ieremia, kua tuku hifo e lautolu a ia ke he luo; to mate foki a ia he hoge ke he mena ha i ai a ia; ha kua nakai ni toe ha areto ke he maga.

10 Ti poaki atu e patuiki kia Epetameleka ko e tagata Aitiope, kua pehe atu, Kia o atu mo koe e tau tagata tokotolugofulu mai he mena nai, mo e ta hake e mutolu e perofeta ko Ieremia mai he luo, neke mate ai a ia.

11 Ti o ai a Epetameleka mo e tau tagata ia, kua o atu a lautolu ke he fale he patuiki ki lalo he mena ne tatanaki ai e tau koloa, mo e ta mai ai e lautolu he mena ia e tau tapulu popo mahehe mo e tau kala ie popo mahehe, ti tuku hifo ai e lautolu e tau mena ia he tau toua kia Ieremia ke he luo.

12 Ti pehe age a Epetameleka ko e tagata Aitiope kia Ieremia, Kia tuku e koe e tau tapulu popo mahehe na mo e tau kala ie mahehe na i lalo he tau feafine hau ke he tau toua. Ti eke ai pihia e Ieremia.

13 Ti futi aki e lautolu a Ieremia ke he tau toua, mo e ta hake e lautolu a ia mai he luo; ti nofo ai a Ieremia ke he lotopa he fale puipui.

14 Ti fakafano atu he patuiki ko Setekaia, mo e ta mai ai e ia a Ieremia kia ia, ke he gutuhala ne tolu aki ke he fale a Iehova; ti pehe atu e patuiki kia Ieremia, To huhu atu e au taha mena kia koe; aua neke fufu e koe ha mena ia au.

15 Ti pehe mai a Ieremia kia Setekaia, Kaeke ke tala atu ai e au kia koe, nakai kia tamate e koe au? kaeke foki ke fakatonu atu e au kia koe, nakai fanogonogo mai a koe kia au.

16 Ti omonuo fufu ai he patuiki ko Setekaia kia Ieremia, kua pehe, Kua moui a Iehova, ko ia ne eke a taua nai, nakai tamate e au a koe, ti nakai tuku atu e au a koe ke he tau lima he tau tagata ne kumi ke kelipopo a koe.

17 Ti pehe mai a Ieremia kia Setekaia, Kua pehe mai e vagahau a Iehova ko e Atua Sapaota, ko e Atua a Isaraela, Kaeke ke fina atu a koe ke he tau iki he patuiki a Papelonia, ti moui ai a koe, to nakai huhunu foki e maga nai ke he afi; ka to moui ai a koe, katoa mo e hau a magafaoa.

18 Ka ko e mena kaeke ke nakai fina atu a koe ke he tau iki he patuiki a Papelonia, ti tuku atu ai e maga nai ke he tau lima he tau tagata Kaletaia, ti huhunu ai e lautolu ke he afi, ti nakai hao foki a koe he tau lima ha lautolu.

19 Ti pehe atu e patuiki ko Setekaia kia Ieremia, Kua matakutaku au he tau tagata Iutaia kua fehola atu ke he tau tagata Kaletaia, neke tuku age e lautolu au ke he tau lima ha lautolu ti ekefakakelea mai a lautolu kia au.

20 Ka e pehe mai a Ieremia kia ia, Nakai tuku age e lautolu a koe, Kia fanogonogo mai a koe ke he leo a Iehova, ke he tau mena kua vagahau atu ai e au kia koe; ti monuina ai a koe, mo e moui ai a koe.

21 Ka ko e mena kaeke ke nakai mafai a koe ke haele atu, ko e kupu hanai kua fakakite mai e Iehova kia au;

22 Ti kitiala, ko e tau fifine oti ne toe ke he fale he patuiki a Iuta, to takitaki atu a lautolu ke he tau iki he patuiki a Papelonia, to pehe atu foki e tau fifine na kia koe, Ne fakaohooho a koe he hau a tau kapitiga, ti kautu a lautolu kia koe; kua tomo hau a tau hui ke he pelapela, ka kua tukumuli a lautolu.

23 To takitaki atu foki e lautolu hau a tau hoana oti mo e hau a fanau ke he tau tagata Kaletaia; to nakai hao foki a koe he tau lima ha lautolu, ka to tapaki a koe he lima he patuiki a Papelonia; ko koe foki ke huhunu ai e maga nai ke he afi.

24 Ti pehe atu a Setekaia kia Ieremia, Aua neke iloa e taha e tau kupu ia, ti nakai mate a koe.

25 Kaeke foki ke logona he tau iki kua vagahau a taua mo koe, mo e o atu a lautolu kia koe, mo e pehe atu a lautolu kia koe, Kia tala mai la e koe kia mautolu e mena ne vagahau atu ai a koe ke he patuiki, aua neke fufu e koe ia mautolu, ti nakai tamate e mautolu a koe; mo e heigoa foki ne vagahau mai ai e patuiki kia koe;

26 Ti pehe age a koe kia lautolu, Ne eke e au haku a olelalo ki mua he patuiki, ke aua neke liuaki atu e ia au ke he fale a Ionatana, neke mate ai au ke he mena ia.

27 Ti o age e tau iki oti kia Ieremia, mo e huhu age a lautolu kia ia; ti tala age ai a ia kia lautolu, ke lata mo e tau kupu oti ia ne poaki mai ai e patuiki. Ti toka e lautolu e vagahau mo ia; he nakai talahau ai e mena.

28 Kua nofo a Ieremia ke he lotopa he fale puipui kua hoko ke he aho ne fofo ai a Ierusalema.