Ieremia

41 KUA hoko ke he fitu mahina, ti o mai ai a Isamaeli ko e tama a Netanaia, ko e tama a ia a Elisama, ko e magafaoa taha a laua mo e patuiki, mo e taha a ia he tau takitaki kau he patuiki, mo e tokohogofulu e tagata fakalataha mo ia, kia Ketalia ko e tama a Aikamo ki Misepa, ti kai mena fakalataha ai a lautolu i Misepa.

2 Ti mamatike a Isamaeli ko e tama a Netanaia, mo e tau tagata tokohogofulu ha ha ia ia, mo e keli e lautolu a Ketalia ko e tama a Aikamo ko e tama a Safana ke he pelu, ne keli e lautolu a ia ne kotofa he patuiki a Papelonia ke pule ke he motu.

3 Ne keli foki e Isamaeli e tau tagata Iuta oti ha ha ia Ketalia i Misepa, mo e tau tagata Kaletaia, ko e tau tagata tau, ne moua ai e lautolu ke he mena ia.

4 Kua hoko ke he aho ua tali he keli e ia a Ketalia, mo e nakai iloa e taha;

5 Ti o mai ai e tau tagata i Sikema, mo Sailo, mo Samaria, ko e tokovalugofulu e tagata, kua hifi ha lautolu a tau hafe, mo e mahehe ha lautolu a tau tapulu, kua helehele foki e lautolu a lautolu, ha ha he tau lima ha lautolu e tau poa mena kai mo e tau pili lipano ke uta ke he fale a Iehova.

6 Ti fina age ai a Isamaeli ko e tama a Netanaia i Misepa, ke fonofono a lautolu, kua fano ai a ia mo e tagi, kua hoko age kua feleveia ai a ia mo lautolu, ti pehe age a ia kia lautolu, Kia o mai a kia Ketalia ko e tama a Aikamo.

7 Kua hohoko foki a lautolu ki loto he maga, ti keli a Isamaeli ko e tama a Netanaia a lautolu, mo e liti e ia a lautolu ki loto he luo, ko ia ni mo e tau tagata ha ha ia ia.

8 Ka e ha ha ia lautolu e tau tagata toko hogofulu, ti pehe age a lautolu kia Isamaeli, Aua neke keli e koe a mautolu; ha kua ha ha ia mautolu e tau mena kua fufu ke he vao, ko e tau fua saito, mo e tau fua karite, mo e puke lolo, mo e meli; ti toka e ia a lautolu, kua nakai keli e ia a lautolu, kua nakai keli e ia a lautolu fakalataha mo e tau matakainaga ha lautolu.

9 Ko e luo foki ne liti ki ai e Isamaeli e tau tino mamate oti he tau tagata ne keli e ia ha ko Ketalia, ko e luo ia ne eke a Asa ko e patuiki, ha ko Paasa ko e patuiki a Isaraela; ne fakapuke ai e Isamaeli ko e tama a Netanaia kia lautolu ne keli.

10 Ti uta ai e Isamaeli po ke tau tagata ne moua he tau, a lautolu oti ne toe he motu ha ha i Misepa, ko e tau tamafifine foki he patuiki mo e tau tagata oti ne toe i Misepa, ne tuku atu ai e Nepusatana ko e takitaki he kau leoleo ke he pule a Ketalia ko e tama a Aikamo; ne uta a lautolu po ke tau tagata ne moua he tau e Isamaeli ko e tama a Netanaia, ti fano ai a ia ke fina age ke he fanau a Amoni.

11 Ka kua logona e Iohanana ko e tama a Karea, mo e tau takitaki kau oti ha ha ia ia, e kelea oti ne eke e Isamaeli ko e tama a Netanaia,

12 Ti uta ai e lautolu e tau tagata oti mo e o atu a lautolu ke tau mo Isamaeli ko e tama a Netanaia, ti moua e lautolu a ia tata age ke he vai lahi i Kipeona.

13 Kua kitia he tau tagata oti ha ha ia Isamaeli, a Iohanana ko e tama a Karea, mo e tau takitaki kau oti ha ha ia ia, ti fiafia ai a lautolu.

14 Ti tafilu ai e tau tagata oti ne uta e Isamaeli po ke tau tagata ne moua he tau i Misepa, ti liliu mai a lautolu, mo e o mai kia Iohanana ko e tama a Karea.

15 Ka e fehola a Isamaeli ko e tama a Netanaia mo e tau tagata tokovalu ki mua a Iohanana, ti fina age a ia ke he fanau a Amoni.

16 Ti uta ai e Iohanana ko e tama a Karea, mo e tau takitaki kau oti ha ha ia ia, a lautolu oti ne toe he tau tagata, ko lautolu ne liuaki mai ai ia Isamaeli ko e tama a Netanaia i Misepa, ka kua oti he keli e ia a Ketalia ko e tama a Aikamo, ko e tau toa malolo, mo e tau fifine, mo e tau tama ikiiki, mo e tau eunuka ko lautolu ia ne liuaki mai e ia i Kipeona;

17 Ti o ai a lautolu mo e nonofo a lautolu ke he fale a Kimehama, ne tata age ki Petelehema, ko e o atu ne fai a lautolu ke o ki Aikupito,

18 Ha ko e tau tagata Kaletaia; ha kua matakutaku a lautolu kia lautolu, he keli e Isamaeli ko e tama a Netanaia a Ketalia ko e tama a Aikamo, ne kotofa ai he patuiki a Papelonia ke pule ke he motu.