Ieremia

43 KUA oti he fakamatala atu e Ieremia ke he motu oti e tau kupu oti a Iehova ha lautolu a Atua, ne fakafano mai ai a ia e Iehova ha lautolu a Atua kia lautolu, ko e tau kupu oti ia ni,

2 Ti pehe mai ai a Asaraia ko e tama a Hosaia, mo Iohanana ko e tama a Karea, mo e tau tagata fakatokoluga oti kua o mai a lautolu kia Ieremia, Ko e pikopiko ne fakamatala mai e koe; nakai fakafano mai a koe e Iehova ha tautolu a Atua, ke pehe mai, Aua neke o atu a mutolu ki Aikupito ke api ai;

3 Ka ko Paruka ko e tama a Neria, kua fakaohooho e ia a koe kia mautolu, kia tuku atu e ia a mautolu ke he tau lima he tau tagata Kaletaia, kia kelipopo e lautolu a mautolu, mo e fakapaea atu e lautolu a mautolu ki Papelonia.

4 Ti nakai fanogonogo a Iohanana ko e tama a Karea, mo e tau takitaki kau oti, mo e tau tagata oti ke he leo a Iehova, ke nonofo ai a lautolu ke he motu ko Iuta;

5 Ka ko Iohanana ko e tama a Karea, mo e tau takitaki kau oti, ne uta e lautolu a lautolu oti ne toe, ko lautolu ne liliu mai he tau motu oti ne vega a lautolu ki ai, ke nonofo ke he motu ko Iuta;

6 Ko e tau tane mo e tau fifine, mo e tau tama ikiiki, mo e tau tama fifine he patuiki, mo e tau tagata oti ne toka ai he takitaki he kau leoleo ko Nepusatana kia Ketalia ko e tama a Aikamo ko e tama a Safana, katoa mo e perofeta ko Ieremia, mo Paruka ko e tama a Neria.

7 Ti o atu ai a lautolu ke he motu ko Aikupito; ha kua nakai fanogonogo a lautolu ke he leo a Iehova; ti hohoko atu ni a lautolu ki Tapanesa.

8 Ti hoko mai ai e kupu a Iehova kia Ieremia i Tapanesa, kua pehe mai,

9 Kia uta a e koe ke he tau lima hāu e tau maka lalahi, mo e tanu ai e koe ke he puga ke he tau maka kelekele kua ati, ha ha i ai ke he mena ke fina atu ai ke he fale a Farao i Tapanesa, ki mua he tau tagata Iuta;

10 Ti pehe age a koe kia lautolu, Kua pehe mai e vagahau a Iehova Sapaota, ko e Atua a Isaraela, Kitiala, to fakafano atu e au mo e ta mai haku a fekafekau ko Nepukanesa ko e patuiki a Papelonia, ti fakatu e au hana nofoaiki ki luga he tau maka na kua tanu e au; to fofola ai foki e ia hana ie fulufuluola ki luga ha lautolu.

11 To hau foki a ia, ti ta ai e ia e motu ko Aikupito; ko lautolu ne kotofa ke mamate, to tuku atu a lautolu ni ke mamate, mo lautolu ne kotofa ke he paeaaga, to o atu a lautolu ke he paeaaga, mo lautolu ne kotofa ke he pelu, to mamate ai a lautolu ke he pelu.

12 To tafu foki e au e tau afi ke he tau fale he tau atua a Aikupito; ti huhunu ai e ia a lautolu, mo e uta a lautolu ko e tau tagata ne fofo he tau; to tapulu ai foki a ia ke he motu ko Aikupito, tuga ne tapulu ai e leveki mamoe ke he hana tapulu; to fano kehe foki a ia he mena ia mo e mafola.

13 To tuki malipilipi foki e ia e tau tupua he fale he la, ha ha he motu ko Aikupito; ko e tau fale foki he tau atua a Aikupito to huhunu ai e ia ke he afi.