Ieremia

46 KO e kupu a Iehova ne hoko kia Ieremia ke he tau mena ke hohoko ke he tau motu kehe.

2 Ko e tau kupu ki Aikupito mo e kau a Farao Neko ko e patuiki a Aikupito, ne tata age he he vailele ko Eufirate i Karekemisa, ne keli ai e Nepukanesa ko e patuiki a Papelonia ke he tau fa a Iehoakima ko e tama a Iosia ko e patuiki a Iuta.

3 Kia taute a e mutolu e akau punuti mo e akau pāpā, mo e fakatata atu ke tau.

4 Kia fakavē a e tau solofanua ke he tau kariota; mo e heke e mutolu e tau solofanua, mo e tutu atu mo e ha mutolu a tau potiki tau; kia kana a e tau tao ke kikila, mo e tapulu ai a mutolu ke he tau tapulu tau lapatoa.

5 Ko e heigoa e mena kua kitia atu e au kia lautolu kua matakutaku? Kua liliu ki tua a lautolu, kua keli foki ha lautolu a tau toa, mo e fehola a lautolu, ti nakai haga ki tua a lautolu; ha ha i ai e matakutaku ke he tau fahi oti, kua pihia mai a Iehova.

6 To nakai hola e tagata mafiti lahi, to nakai hao foki e tagata toa; to tupetupe a lautolu mo e veveli ni a lautolu ke he fahi tokelau, tata age ke he vailele ko Eufirate.

7 Ko hai kia aenei kua hake ai tuga e vailele ko Naila, kua fafati lahi mai hana tau vai tuga ne tau vailele?

8 Kua hake a Aikupito tuga e Naila, kua fafati lahi mai hana tau vai tuga ne tau vailele; kua pehe foki a ia, To hake au, to kaputia e au e lalolagi; to fakaoti e au e tau maga, mo e nonofo ai.

9 Kia o hake ā mutolu, ko e tau solofanua; mo e feohoaki e tau kariota; kia o atu a e tau toa; ko e tau tagata Aitiope, mo e tau tagata Futu, ne mahani mo e akau punuti; mo e tau tagata Lutima ne mahani ke loloku e kaufana.

10 Ha ko e aho ia ko e aho he Iki ko Iehova Sapaota, ko e aho ke lalago ai, ke taui atu ai e ia kia lautolu kua fai fi kia ia; ke kai foki he pelu mo e makona ai, mo e makona he inu e toto ha lautolu, ha ko e Iki ko Iehova Sapaota kua eke ai e ia e poa ke he motu ke he fahi tokelau ne tata age ke he vailele ko Eufirate.

11 Ko e tamafine tote na e, ko e tama fifine a Aikupito, kia hake a koe ki Kiliata, mo e ta mai ai e pili pasama; kua fakaloga e koe e tau vai lakau ka e nakai aoga; nakai ni fai lagatau ke malolo ai a koe.

12 Kua logona he tau motu hau a mā, kua puke foki e lalolagi ke he tagi hau; ha kua tupetupe e toa ke he toa, kua veveli fakalataha a laua.

13 Ko e kupu ne vagahau mai ai e Iehova ke he perofeta ko Ieremia, ha kua hau a Nepukanesa ko e patuiki a Papelonia ke keli e motu ko Aikupito.

14 Kia talahau atu e mutolu i Aikupito, mo e fakailoa atu i Mikatolo, mo e fakailoa atu ai i Nofi, mo Tapenesa; kia pehe atu a mutolu; Kia tutu a, mo e tauteute a; ha kua kai takai ai he pelu kia mutolu.

15 Ko e heigoa e mena ne tafola ai a lautolu ne malolo ha ha ia koe? nakai tutu a lautolu, ha kua tulei e Iehova a lautolu.

16 Ne fakatokologa e ia a lautolu ne tupetupe, ne veveli a lautolu ko e taha ki luga he taha; ti pehe a lautolu, Kia mamatike ā, kia liliu ā tautolu ke he ha tautolu a motu, mo e kelekele ne fanau ai a tautolu, ha ko e pelu ne favale mai.

17 Ne ui ai e lautolu ke he mena ia, Ko Farao ko e patuiki a Aikupito, kua malaia ni a ia, kua mole tuai hana vaha ne kotofa.

18 Kua pehe mai e Patuiki, ko Iehova Sapaota hana higoa, Kua moui au, to hau a ia, tuga na Tapora ke he atu mouga, mo Karamelu ke he tapa tahi.

19 Ko koe ko e tama fifine na e kua nofo i Aikupito, kia taute e koe e tau mena māu ke fano a koe ke he paeaaga; ha kua eke a Nofi mo vao mo mena kua moumou, nakai nofo ai taha.

20 Ko Aikupito ko e povi fifine tino mitaki lahi a ia, ka e hoko mai ni e malaia mai he fahi tokelau.

21 Ko e hana tau tagata tau foki ne palepale, ha ha i loto ia ia ne tuga ne tau povi mai he fale povi; ka e liliu ki tua ni a lautolu, ne fehola fakalataha a lautolu, nakai tutu a lautolu; ha kua hoko mai kia lautolu e aho he ha lautolu a malaia, ko e vaha ke ahi mai ai a lautolu.

22 To fina atu hana leo tuga ne gata; ha kua o mai a lautolu mo e kau, mo e o mai a lautolu kia ia mo e tau toki, tuga ne tau tagata ta akau.

23 Kua pehe mai a Iehova, to hahala e lautolu hana vao, pete he nakai maeke he kumi ki ai; ha kua mua he loga ha lautolu he tau hē akerise, nakai maeke foki he totou a lautolu.

24 Kua fakamua e tama fifine a Aikupito; to tuku atu a ia ke he tau lima he tau tagata mai he fahi tokelau.

25 Kua pehe mai e Atua a Isaraela ko Iehova Sapaota, Kitiala, to taui atu e au ki Amoni i No, mo Farao, mo Aikupito, mo e hana tau atua, mo e hana tau patuiki; ko Farao ni, mo lautolu ne tua kia ia;

26 To tuku atu foki e au a lautolu ke he tau lima ha lautolu ne kumi ke kelipopo a lautolu, mo e lima he patuiki a Papelonia ko Nepukanesa, mo e tau lima he hana tau fekafekau; ka mole ia ti liu kakai ai a ia tuga he vaha fakamua, kua pihia mai a Iehova.

27 Ka ko koe, Iakopo na e, ko e haku a fekafekau, aua neke matakutaku a koe; ti ua fakaatukehe a koe ma Isaraela na e, ha ko e mena kitiala, to fakamoui e au a koe mai he motu mamao, mo e hau a fanau mai he motu kua nonofo paea ai a lautolu; to liu mai ni a Iakopo, ti okioki ai a ia, mo e nofo ai a ia mo e mafola, ti nakai ha ha i ai foki taha ke fakamatakutaku kia ia.

28 Kua pehe mai a Iehova, Ko koe Iakopo na e, ko e haku a fekafekau, aua neke matakutaku a koe; ha ko e mena to fakaotioti e au e tau motu ne vega e au a koe ki ai, ka e nakai fakaoti e au a koe; to akonaki fakalata e au a koe, ka e nakai toka e au a koe ke noa mo e akonakiaga.