Ieremia

7 KO e kupu ne hoko mai ia Iehova kia Ieremia; kua pehe mai,

2 Kia tu a a koe ke he gutuhala he fale a Iehova, mo e fakamatala atu ai e koe e kupu nai, kia pehe atu, Kia fanogonogo mai a a mutolu ke he kupu a Iehova, ko mutolu oti i Iuta, kua huhu mai ai he tau gutuhala nai ke hufeilo kia Iehova.

3 Kua vagahau mai pehe a Iehova Sapaota, ko e Atua a Isaraela, Kia taute fakamitaki e mutolu ha mutolu a mahani mo e ha mutolu a tau mena ne eke, ti fakatumau ai e au a mutolu ke he mena nai.

4 Aua neke tua a mutolu ke he tau kupu pikopiko, kua pehe, Ko e faituga a Iehova, Ko e faituga a Iehova, Ko e faituga a Iehova hanai.

5 Ha ko e mena kaeke ke taute fakamitaki e mutolu ha mutolu a mahani mo e ha mutolu a tau mena ne eke; kaeke foki ke eke fakamitaki e mutolu e fakafiliaga he taha tagata mo e taha tagata;

6 Kaeke foki ke nakai favale atu a mutolu ke he tagata kehe, mo ia kua nakai fai matua, mo e fifine takape, mo e nakai fakamaligi ai e mutolu e toto he tau tagata nakai hala ke he mena nai, mo e nakai mumui atu a mutolu ke he tau atua kehe ke malaia ai;

7 Ti fakatumau ai e au a mutolu ke he mena nai, ko e motu ne foaki atu ai e au ke he tau matua ha mutolu mai i tuai ke hoko ke he tukulagi.

8 Kitiala, kua tua a mutolu ke he tau kupu pikopiko, kua nakai aoga.

9 To kaiha kia e mutolu, mo e keli tagata, mo e faivao, mo e omonuo pikopiko, mo e huhunu ai e tau mena manogi kia Paala, mo e mumui atu ke he tau atua kehe kua nakai iloa e mutolu;

10 Ti o mai a mutolu mo e tutu ki mua haku ke he fale nai, kua ui ai ke he haku a higoa, mo e pehe mai a mutolu, Kua laveaki a mautolu, kia eke ai e mautolu e tau mena vihiatia oti nai?

11 Kua eke kia e fale nai kua ui ai ke he haku a higoa mo ana he tau tagata fofo mena ke he manatu ha mutolu? Kitiala, ko au ni, kua kitekite atu au ki ai, kua pihia mai a Iehova.

12 Ka kia o a mutolu ke he haku mena ne ha i ai i Sailo, ne tuku ai e au haku a higoa ke he kamataaga, mo e kitekite a mutolu ke he tau mena ne eke e au ki ai ha ko e mahani kelea he haku motu ko Isaraela.

13 Kua pehe mai a Iehova, Hanai, kua eke ai e mutolu e tau mena oti na, ne vagahau atu foki e au kia mutolu, ne uhu matike au mo e vagahau atu kia mutolu ka e nakai fanogonogo mai a mutolu; ne ui atu e au kia mutolu ka e nakai tali mai ai a mutolu;

14 Ko e mena ia to eke e au ke he fale kua ui ai ke he haku a higoa, ko e fale kua tua ki ai a mutolu, mo e motu ne foaki atu e au kia mutolu mo e ha mutolu a tau matua, tuga ne eke e au ki Sailo.

15 To tiaki foki e au a mutolu, tuga ne tiaki e au ha mutolu a tau matakainaga oti, ko e fanau oti a Efaraimo.

16 Ko koe foki, aua neke liogi a koe ha ko e motu nai, ti aua neke tagi a koe po ke liogi ha ko lautolu, ti aua neke ole mai e koe kia au, ha ko e mena nakai fanogonogo atu e au kia koe.

17 Nakai kia kitia e koe e tau mena kua eke e lautolu ke he tau maga a Iuta, mo e tau puhala i Ierusalema?

18 Kua fai gaafi he fanau, kua tafu he tau matua e afi, ti laku he tau fifine e lakuaga falaoa, ke eke aki e tau areto lapalapa ma e patuiki fifine he lagi, kua liligi foki e lautolu e tau poa inu ke he tau atua kehe, kia fakahogohogomanava mai ai a lautolu kia au.

19 Kua pehe mai a Iehova, Ko au kia kua fakahogohogomanava a lautolu ki ai? ka e nakai kia ko lautolu, ke mā ai a lautolu?

20 Ko e mena ia kua talahau mai pehe he Iki ko Iehova, Kitiala, to liligi hifo e au ki luga he mena nai haku a ita mo e haku a ita lahi, ki luga he tau tagata, mo luga he tau manu, ki luga foki he tau akau he fonua, mo e tau fua he kelekele; ti huhunu ai ni, ka e nakai maeke ke tamate.

21 Kua vagahau mai pehe a Iehova Sapaota, ko e Atua a Isaraela, Kia lafilafi e mutolu ha mutolu a tau poa huhunu ke he ha mutolu a tau poa, mo e kai e mutolu e tau tufaaga.

22 Ha kua nakai vagahau atu e au ke he ha mutolu a tau matua, ti nakai poaki atu e au kia lautolu he aho ne tamai ai e au a lautolu he motu ko Aikupito, e tau kupu ke he tau poa huhunu mo e tau poa.

23 Ka ko e mena hanai ne poaki atu e au kia lautolu, kua pehe atu, Kia fanogonogo mai a a mutolu ke he haku a leo, ti eke au mo Atua ha mutolu, ti eke a mutolu mo motu haku; mo e o a mutolu ke he tau puhala ne poaki atu ai e au kia mutolu, kia monuina ai a mutolu.

24 Ka e nakai fanogonogo mai a lautolu, ti nakai haga mai a lautolu ha lautolu a tau teliga, ka e o a lautolu ke lata mo e tau pulega ha lautolu mo e mao he ha lautolu a tau loto kelea, kua tukumuli ki tua a lautolu ka e nakai o a lautolu ki mua.

25 Tali he aho ne o mai ai e tau matua ha mutolu he motu ko Aikupito, ke hoko ke he aho nai, kua fakafano atu e au kia mutolu haku a tau fekafekau oti ko e tau perofeta, ne uhu matike au mo e fakafano atu e au a lautolu ke he taha aho mo e taha aho;

26 Ka e nakai fanogonogo mai a lautolu kia au, ti nakai haga mai ha lautolu a tau teliga, ka e fakamao e lautolu ha lautolu a tau ua; kua mua ha lautolu a mahani kelea ke he mahani kelea he tau matua ha lautolu.

27 To vagahau atu e koe e tau kupu oti ia kia lautolu ka e nakai fanogonogo mai a lautolu kia koe; ti ui atu a koe kia lautolu, ka e nakai tali mai a lautolu kia koe.

28 Ti pehe atu a koe kia lautolu, Ko e motu ni hanai kua nakai fanogonogo ke he leo a Iehova ha lautolu a Atua; ti nakai talia e lautolu e akonakiaga; kua mate e fakamoli, mo e helehele kehe ni mai he tau gutu ha lautolu.

29 Kia hifipuga a hau a lauulu, mo e tiaki ai e koe ma Ierusalema na e, mo e tagi fekapai ai a koe ki luga he tau mouga nakai tupu ai ha akau; ha kua tiaki e Iehova mo e liti ke he vao e hau ne ita a ia ki ai.

30 Ha kua eke he fanau a Iuta e tau mena kelea ki mua haku, kua pihia mai a Iehova; kua tuku e lautolu e tau mena vihiatia ha lautolu ke he fale kua ui ai ke he haku a higoa, kia fakakelea ai e lautolu.

31 Kua ati foki e lautolu e tau mena tokoluga i Tofeta, ne ha i ai ke he pahua he tau tama tane a Hinoma, ke huhunu ai ha lautolu a tau tama tane mo e ha lautolu a tau tama fifine ke he afi; ko e mena nakai poaki atu ai e au, ti nakai manatu ai e au.

32 Ko e mena ia, kitiala, kua pehe mai a Iehova, ko e hoko mai ne fai e tau aho, ke nakai tuai fakahigoa aki e mena ia ko Tofeta po ke pahua he tau tama tane a Hinoma, ka ko e pahua kua kelipopo ai e tau tagata; ti tanu tagata e lautolu i Tofeta ato nakai toe ha mena mo tukuaga.

33 Ti eke e tau tino mamate he motu nai mo tau mena kai he tau manu lele he pulagi mo e tau manu he vao; ti nakai ha i ai taha ke vega kehe a lautolu.

34 Ti fakahiku ai e au ke he tau maga i Iuta mo e tau puhala i Ierusalema e leo fiafia mo e leo he olioli, ko e leo he kitofaihoana, mo e leo he kitofaitane; ha ko e mena to eke mo vao e motu nai.