Levitika

12 KUA vagahau mai foki e Iehova kia Mose, kua pehe mai,

2 Kia vagahau atu e koe ke he fanau a Isaraela, kia pehe atu, Kaeke ke fatu e fifine, mo e fanau mai ai e tama tane, ti kelea ai a ia ke he tau aho ne fitu; tuga ne tau aho ne nofo kehe ai ha ko e gagao fifine, ke nofo kehe ai a ia.

3 Ko e po valu foki kia peritome ai e tama ke he kili he hana kakano.

4 Ti nofo ai e fifine po tolugofulu ma tolu ha ko e hana vale tama; aua neke pipiki atu e ia ke he mena tapu, ti aua neke hu atu a ia ke he mena tapu, ti aua neke hu atu a ia ke he faituga ato katoatoa ai e tau aho he hana fakameaaga.

5 Kaeke foki ke fanau mai ai e tama fifine ti kelea ai a ia to ua e fahi tapu, ke tuga ne gagao fifine; ti nofo foki a ia ha ko e hana vale tama ke he tau po ne onogofulu ma ono.

6 Ka katoatoa ai foki e tau aho he hana fakameaaga, ha ko e tama tane, poke tama fifine, ti ta mai ai e ia e punua mamoe tau taha, ke eke mo poa huhunu, mo e punua lupe, po ke kulukulu ke eke mo poa ha ko e hala, ke he ekepoa, ke he gutuhala he fale uta fano he tutuutaga.

7 Ti uta e ia a ia ki mua a Iehova ke eke mo lukutoto māna, ti mea ai a ia he tafe mai he hana toto. Ko e fakatufono hanā ke he fifine kua fanau mai e tama tane po ke tama fifine.

8 Kaeke foki ke nakai moua e ia ha punua mamoe, ti ta mai ai e ia ua e kulukulu, po ke ua e punua lupe, ko e taha ke eke mo poa huhunu, mo e taha ke eke mo poa ha ko e hala; ti eke ai he ekepoa e lukutoto māna ti mea ai a ia.