Levitika

2 KAEKE foki ke ta mai e taha e poa mena kai kia Iehova, kia eke ai hana poa he faloa mitaki, mo e liligi ki ai e puke lolo, mo e tuku ai e lipano.

2 Ti ta mai ai e ia ke he tau tama tane a Arona, ko e tau ekepoa, ti aku mai he ekepoa hana puke aloalolima he falaoa katoa foki mo e lolo, mo e maga lipano katoatoa, ti huhunu ai a ia mo fakamanatuaga ki luga he fatapoa ko e poa kua eke ke he afi, ko e mena manogi mitaki kia Iehova.

3 Ko e mena foki kua toe he poa mena kai, ma Arona ia, mo e hana tau tama tane, ko e mena tapu ue atu ia he tau poa kua eke ke he afi kia Iehova.

4 Kaeke foki ke ta mai e koe e poa mena kai kua tao ke he umu, kia eke ai e tau areto pukupuku nakai fakaea he falaoa mitaki, kua laku mo e puke lolo, mo e tau areto aleale nakai fakaea, kua tākai he lolo.

5 Kaeke foki ke ta mai e koe e poa mena kai kua tunu ke he lapatoa lapalapa, kia eke ai he falaoa mitaki kua nakai fakaea kua laku mo e puke lolo.

6 Ti tofitofi ai e koe ke he hana tau maga areto, mo e liligi ki ai e puke lolo; ko e poa mena kai haia.

7 Kaeke foki ko e poa mena kai kua tunu ke he ulo hāu a poa, kia eke ai he falaoa mitaki, mo e puke lolo.

8 Ti ta mai foki e koe e poa mena kai kua eke ai he tau mena ia kia Iehova; ka kua ta atu ai foki ke he ekepoa, to ta mai ai e ia ke he fatapoa.

9 Ti uta kehe ai he ekepoa hana fakamanatuaga mai he poa mena kai, mo e huhunu ai ki luga he fatapoa; ko e poa kua eke ke he afi, ko e mena manogi mitaki kia Iehova.

10 Ko e mena foki kua toe he poa mena kai, ma Arona mo e hana tau tama tane ia; ko e mena tapu ue atu haia he tau poa kua eke ke he afi kia Iehova.

11 Ko e tau poa mena kai oti kana ka ta mai e mutolu kia Iehova, aua neke fakaea ia; ha ko e mena nakai huhunu e mutolu e mena ke fakaea aki, po ke maga meli, ke he taha poa kua eke ke he afi kia Iehova.

12 Kia ta mai ai e mutolu e tau mena ia kia Iehova mo poa he tau fua uluaki; ka e nakai huhunu ai ki luga he fatapoa, ke eke mo mena manogi mitaki kia Iehova.

13 To fakamasima foki e koe ke he masima e tau poa mena kai oti hau; aua neke noa ha poa mena kai hau mo e masima, ko e maveheaga he hau a Atua; to ta mai ai e koe e masima mo e hau a tau poa oti kana.

14 Kaeke foki ke ta mai e koe kia Iehova e poa mena kai he tau fua uluaki, kia ta mai ai e koe e tau kakau saito kua tunu ke he afi, ko e tau fua saito motua kua tuki mai he tau gati, ko e poa mena kai haia he tau fua uluaki.

15 Ti liligi e koe e puke lolo ki luga he tau fua saito, mo e tuku ai foki ki luga e lipano, ko e poa mena kai haia.

16 Ti huhunu ai he ekepoa hana fakamanatuaga, hanai ko e tau fua saito, kua tuki mai he tau gati, mo e hana puke lolo, mo e hana lipano katoa; ko e poa haia kua eke ke he afi kia Iehova.