Levitika

21 KUA pehe mai foki a Iehova kia Mose, kia tala age a koe ke he tau ekepoa ko e tau tama tane a Arona, kia pehe age kia lautolu, Aua neke kelea taha ia lautolu ha ko e tagata he hana motu kua mate.

2 Ka ko e tagata he hana magafaoa ko e magafaoa taha, ko e hana matua fifine, mo e hana matua tane, mo e hana tama tane, mo e hana tama fifine, mo e hana matakainaga,

3 Mo e hana mahakitaga, ko e tamāfine tote, kua nakai fai tane, ko e hana magafaoa ko e magafaoa taha, kua maeke ke kelea ai a ia ha ko ia.

4 Ko e tagata lahi a ia ke he hana motu, aua neke fakakelea e ia a ia, ke kelea ai a ia.

5 Aua neke hifi puga e lautolu ha lautolu a tau ulu, po ke hifi e lautolu ha lautolu a hafe kakau, po ke helehele e lautolu ha lautolu a tau kakano.

6 Kia tapu ai a lautolu ma e Atua ha lautolu, aua neke holitu e lautolu e higoa he Atua ha lautolu; ha ko e tau poa kua eke ke he afi, mo e areto he Atua ha lautolu, kua eke poa ai e lautolu; ko mena ia kia tapu ai a lautolu.

7 Aua neke faihoana taha ia lautolu ke he fifine fakataka, po ke fifine feuaki; ti ua faihoana foki a ia ke he fifine kua tiaki he hana tane; ha kua tapu ni a ia mo e hana Atua.

8 Ti fakatapu ai e koe a ia, ha kua uta ai e ia e areto he hau a Atua; kia tapu a ia kia koe, ha ko au ko Iehova kua fakatapu ai a mutolu, kua tapu ni au.

9 Ko e tama fifine foki he ekepoa kaeke ke fakakelea e ia a ia ke he hana mahani fakataka, kua fakakelea ai e ia hana matua tane; to huhunu ai a ia ke he afi.

10 Ka ko e ekepoa ne mua he hana tau matakainaga, ne liligi ke he hana ulu e lolo ke fakauku ai, mo e kotofa a ia ke fakatapulu ai a ia ke he tau tapulu, aua neke aki e ia hana potiki, po ke hehe hana tau tapulu.

11 Aua neke fina atu a ia ke he tagata kua mate, ti aua neke kelea ai a ia ha ko e hana matua tane, po ke hana matua fifine;

12 Aua foki neke hu ki fafo a ia he faituga, ti ua eke fakakelea e ia ke he faituga he hana Atua; ha ko e mena ha i luga hana e foupapa he lolo fakauku he hana Atua; ko au ko Iehova.

13 Ko e tamafine tote foki ke faihoana ki ai a ia.

14 Aua neke faihoana a ia ke he tau fifine hanai, ko e takape po ke hoana tagata kua tiaki, po ke fifine feuaki, po ke fifine fakataka; ka kia faihoana ai a ia ke he tamafine tote he hana motu.

15 Aua neke fakakelea e ia hana fanau ke he hana motu; ha ko au ko Iehova kua fakatapu a ia.

16 Kua vagahau mai foki a Iehova kia Mose, kua pehe mai,

17 Kia vagahau atu a koe kia Arona, kia pehe atu, Kaeke ke ha i ai ke he tagata he magafaoa hau, ke he tau hau ha lautolu a mui, ha mena kelea, ti ua fakatata a ia ke ta atu ai e areto he hana Atua.

18 Ha ko e tagata ha i ai ha mena kelea, aua neke fakatata mai a ia; ko e tagata mata pouli, po ke kulikuli, po ke ihu lapalapa, po ke taha ha ha i ai ha mena kehe.

19 Po ke fatia e hui he taha tagata, po ke fatia e lima.

20 Po ke taha kua tua keu, po ke tino tote, po ke tagata ne ila ai hana mata, po ke taha ne gagao he magiho, po ke taha ne gagao he matafune, po ke taha ne malipilipi ai hana mouiaga.

21 Aua neke fakatata e tagata he fanau a Arona ko e ekepoa ne ha i ai ha mena kelea ke uta ai e tau poa kua eke ke he afi kia Iehova; ha ha i a ia e mena kelea, aua neke fakatata atu a ia ke uta ai e areto he hana Atua.

22 Kia kai ai e ia e areto he hana Atua ko e mena tapu ue atu katoa foki mo e mena tapu.

23 Ka e aua neke fano a ia ke he fahi atu he ie puipui, ti ua fakatata a ia ke he fatapoa ha kua ha ia ia e mena kelea; neke fakakelea ai e ia haku tau mena tapu; ha ko au ko Iehova, kua fakatapu ai e tau mena ia.

24 Ti talatala atu ai e Mose e tau kupu ia kia Arona mo e hana tau tama tane, katoa mo e fanau oti a Isaraela.