Levitika

8 KUA vagahau mai e Iehova kia Mose, kua pehe mai,

2 Kia uta e koe a Arona mo e hana tau tama tane fakalataha mo ia, ko e tau tapulu foki, mo e puke lolo ke fakauku ai, mo e punua povi tane ke eke mo poa ha ko e hala, mo e na mamoe tane ne ua, mo e kato areto nakai fakaea.

3 Ti fakapotopoto ai e koe e fakapotopotoaga oti ke he gutuhala he fale uta fano he tutuutaga.

4 Ti eke e Mose tuga ne poaki mai e Iehova kia ia, ti fakapotopoto ai e fakapotopotoaga ke he gutuhala he fale uta fano he tutuutaga.

5 Ti vagahau atu e Mose ke he fakapotopotoaga, kua pehe atu, Ko e mena hanai kua poaki mai ai e Iehova ke eke.

6 Ti fakatata mai ai e Mose a Arona mo e hana tau tama tane, mo e fakakoukou ai e ia a lautolu ke he vai.

7 Ti fakatapulu aki e ia a ia ke he tapulu i loto, mo e pipi ai a ia ke he pipi, mo e fakatapulu a ia ke he tapulu loa, mo e fakatapulu a ia ke he efota, mo e pipi a ia ke he pipi he efota ne pipi aki a ia ke he mena ia.

8 Ti tuku atu foki kia ia e ufi fatafata, mo e tuku ai ke he ufi fatafata e Urima, mo e Tumima.

9 Ti fakapotiki foki e ia hana ulu ke he potiki ie, ti tuku ai ke he potiki ie ke he hana muale e mena kikila kua eke ke he auro, ko e foupāpā tapu haia; tuga ne poaki mai ai e Iehova kia Mose.

10 Ti uta e Mose e lolo fakauku; ti fakauku ai e ia e faituga mo e tau mena oti ha i ai, mo e fakatapu ai.

11 Ti pīpī ai laga fitu ki luga he fatapoa, mo e fakauku ai foki e ia e fatapoa mo e hana tau mena oti, ko e kumete foki mo e hana tuaga ke fakatapu ai.

12 Ti liligi foki e lolo fakauku ki luga he ulu a Arona, mo e fakauku ai a ia, ke fakatapu ai a ia.

13 Ti fakatata mai e Mose e tau tama tane a Arona, ti fakatapulu ai e ia a lautolu ke he tau tapulu loto, mo e pipi ai a lautolu ke he tau pipi, mo e fakamau ai foki ha lautolu a tau potiki; tuga ne poaki mai e Iehova kia Mose.

14 Ti ta mai foki e Mose e punua povi tane ke eke mo poa ha ko e hala; ti fakalago ai e Arona mo e hana tau tama tane ha lautolu a tau lima ki luga he ulu he punua povi tane ke eke mo poa ha ko e hala.

15 Ti keli ai a ia, ti uta e Mose e toto ke he hana matalima mo e tuku takai ke he tau hoe he fatapoa, ti fakamea foki e ia e fatapoa mo e liligi hifo e toto ke he kelekele he fatapoa, ti fakatapu ai foki, kia eke ai e lukutoto ke he hana fugaluga.

16 Ti uta ai e ia e gako oti ha i luga he gakau, mo e galu manava ki luga he ate, mo e na fua ua, katoa mo e gako ha i ai, ti huhunu e Mose ia ke he fatapoa.

17 Ka ko e punua povi tane, mo e hana kili, mo e hana kakano, mo e hana faliu ne huhunu ai e ia ke he afi ki tua he heaga api; tuga ne poaki mai ai e Iehova kia Mose.

18 Ti ta mai ai foki e mamoe tane ke eke mo poa huhunu, ti fakalago ai e Arona mo e hana tau tama tane ha lautolu a tau lima ki luga he ulu he mamoe tane.

19 Ti tamate ai e Mose mo e pīpī takai e toto ki luga he fatapoa.

20 Ti helehele e Mose e mamoe ke he hana tau maga kakano, ti huhunu ai e ia e ulu, mo e tau maga kakano; mo e gako.

21 Ti fuifui ai e ia e gakau mo e tau hui ke he vai; ti huhunu ai foki e Mose e mamoe tane katoa ke he fatapoa ko e poa huhunu haia, ko e mena manogi mitaki, ko e poa kua eke ke he afi kia Iehova; tuga ne poaki mai ai e Iehova kia Mose.

22 Ti ta mai foki e ia e mamoe tane ne ua aki, ko e mamoe tane he fakatuaga, ti fakalago ai e Arona mo e hana tau tama tane ha lautolu a tau lima ki luga he ulu he mamoe tane.

23 Ti keli e Mose a ia mo e uta ai e maga toto hana mo e tuku ke he tapunu he teliga matau a Arona, mo e matalima motua he hana hui matau.

24 Ti fakatata mai ai e tau tama tane a Arona; ti tuku ai e Mose e maga toto ke he tapunu he tau teliga matau ha lautolu, mo e matalima motua he tau lima matau ha lautolu, mo e matahui motua he tau hui matau ha lautolu; ti pīpī takai foki e Mose e toto ke he fatapoa.

25 Ti uta ai e ia e gako, mo e hiku, mo e gako oti ha he gakau, mo e gako he galu manava ki luga he ate, mo e na fua ua, mo e gako ha i ai, mo e lima matau.

26 Ti uta ai e ia mai he kato he areto nakai fakaea ha i mua a Iehova, taha areto pukupuku nakai fakaea, mo e taha areto pukupuku kua eke mo e lolo, mo e taha areto aleale, mo e tuku ai ki luga he tau maga gako, ki luga foki he lima matau.

27 Ti fakatoka oti ai e ia ke he tau aloalolima a Arona, katoa mo e tau aloalolima he hana tau tama tane, ti lialiāki ai e ia, ke eke mo poa lialiāki ki mua a Iehova.

28 Ti uta ai e Mose e tau mena ia mai he tau lima ha lautolu, mo e huhunu ai ke he fatapoa, ki luga he poa huhunu, ko e poa he fakatuaga haia, ko e mena manogi mitaki, ko e poa kua eke ke he afi kia Iehova.

29 Ti uta foki e Mose e fatafata mo e lialiāki, ko e poa lialiaki ki mua a Iehova; ko e tufaaga ia ne eke ma Mose he mamoe tane he fakatuaga; tuga ne poaki mai ai e Iehova kia Mose.

30 Ti uta ai e Mose e maga lolo fakauku, mo e maga toto ha i luga he fatapoa ti pīpī aki e ia a Arona mo e hana tau tapulu, katoa mo e hana tau tama tane mo e tau tapulu he hana tau tama tane fakalataha mo ia; ti fakatapu ai e ia a Arona mo e hana tau tapulu, ko e hana tau tama tane mo e tau tapulu ha laultolu fakalataha mo ia.

31 Ti pehe atu foki a Mose kia Arona mo e hana tau tama tane, Kia tunu ai e mutolu e tau maga kakano he mamoe tane ke he gutuhala he fale uta fano he tutuutaga, ti kai ai ni ke he mena na katoa mo e areto ha ha he kato he poa he fakatuaga, tuga ne poaki atu ai e au kua pehe atu, Kia kai ai e Arona ia, mo e hana tau tama tane.

32 Ko e mena foki ne toe he tau maga kakano mo e areto kia huhunu ai e mutolu ke he afi.

33 Ti aua neke huhu ki fafo a mutolu he gutuhala he fale uta fano he tutuutaga ke he tau po ne fitu, ato katoatoa ai e tau po he fakatuaga ha mutolu; ha ko e po fitu ni ke eke ai e fakatuaga ha mutolu.

34 Tuga ne eke e ia ke he aho nai kua poaki mai e Iehova ke eke ai pihia ke eke mo lukutoto ma mutolu.

35 Kia nonofo ai a mutolu po fitu ke he aho mo e po ke he gutuhala he fale uta fano he tutuutaga, mo e omaoma foki ke he fekau a Iehova neke mamate a mutolu; ha kua poaki mai pihia e Iehova kia au.

36 Ti eke ni e Arona mo e hana tau tama tane e tau mena oti ne poaki mai ai e Iehova kia Mose.