Amosa

5 KO e magafaoa a Isaraela na e, kia fanogonogo mai a a mutolu ke he tau kupu nai kua taute e au, ko e tagi aue ni ha ko mutolu.

2 Kua veli e tamafine tote a Isaraela; nakai tuai matike a ia; kua takaveli ai a ia ke he hana kelekele, nakai ha i ai taha ke lagaaki a ia.

3 Ha kua pehe mai e vagahau he Iki ko Iehova, Ko e maga ne taha e afe tagata he o atu, to toe ai taha e teau ia lautolu; ko e maga foki ne o atu ai e taha teau tagata to toe ai e tokohogofulu ia lautolu ke he magafaoa a Isaraela.

4 Ka kua pehe mai e vagahau a Iehova ke he magafaoa a Isaraela; Kia kumi e mutolu au ti momoui ai a mutolu.

5 Ka e aua neke kumi a mutolu ki Peteli, ti ua o a mutolu ki Kilikala, ti aua neke o age a mutolu ki Peresepa; ha ko e mena to fakapaea atu ni a Kilikala, to eke foki a Peteli mo mena noa.

6 Kia kumi e mutolu a Iehova ti momoui ai a mutolu, neke hoko mai a ia tuga e afi ke he magafaoa a Iosefa, mo e fakaoti ai a ia, ti nakai ha ha i Peteli taha ke tamate ai e afi.

7 Ko mutolu ne liliu e fakafiliaga ke he laena, mo e liti hifo e mahani tututonu ke he kelekele.

8 Kia kumi e mutolu a ia ne eke a Kima mo Kesili; ko ia ne faliu e a he mate ke he pogipogi, mo e fakapouligia e aho tuga e po; ko ia ne ui ke he tau puke tahi he tahi mo e liligi ai e ia ke he fuga kelekele; ko Iehova ko e hana higoa haia.

9 Ko ia kua fakahoko fakalutukia atu e moumou kia ia ne malolo, ti hoko atu ai e moumou ke he taue.

10 Kua fakavihia e lautolu a ia ke he gutuhala kua akonaki atu; mo e vihiatia e lautolu a ia kua vagahau mo e tonu.

11 Ko e hanai, kua taholi ai e mutolu a ia ne lolelole, mo e talia ai e mutolu ia ia e tau mena fakaalofa, ko e tau fua saito; ko e mena ia pete he ati e mutolu e tau fale ke he tau maka talai, ka e nakai nonofo ai a mutolu; kua to e mutolu e tau uluvine mitaki, ka e nakai inu ai a mutolu he uaina.

12 Ha kua iloa e au e tau holifono ha mutolu kua loga lahi, mo e tau hala ha mutolu kua kelea lahi ni; ko mutolu kua favale atu ke he tua tagata mahani tututonu, mo e talia e palepale, mo e liuaki e tau tagata nonofogati ha ha he gutuhala mai he tau mena tonu ha lautolu.

13 Ko e mena ia to fakanono ai a ia ne iloilo ke he vaha ia; ha ko e vaha kelea haia.

14 Kia kumi e mutolu e mitaki ka e nakai ko e kelea, kia momoui ai a mutolu; ti ha i ai ia mutolu a Iehova ko e Atua Sapaota, tuga he talahau ai e mutolu.

15 Kia fakavihia e mutolu e kelea, ka e manako ke he mitaki, mo e fakamau ai e mutolu e fakafiliaga ke he gutuhala; ti ligaliga fakaalofa mai a Iehova ko e Atua Sapaota kia lautolu kua toe he magafaoa a Iosefa.

16 Ko e mena ia kua pehe mai a Iehova, ko e Atua Sapaota, ko e Iki, To tagi aue ai ke he tau male oti ni; to pehe age a lautolu ke he tau puhala oti, Oi te! oi te! to ui foki a lautolu ke he tau tagata gahua fonua kia tagi a lautolu, mo lautolu kua iloa e tau lologo moiofa ke tagi tatuki ai a lautolu.

17 To tagi aue ai ke he tau ulu vine oti, ha ko e mena to fina age ai au i loto ia koe, kua pihia mai a Iehova.

18 Oi te fakaalofa kia mutolu kua manako ke he aho a Iehova! Ko e heigoa kia hana aoga kia mutolu? Ko e aho a Iehova ko e pouli haia, ka e nakai ko e maama.

19 Tuga e tagata kua hola kehe he leona, ka e feleveia ai a laua mo e urosa; po ke hu atu a ia ki fale mo e falanaki hana lima ke he kaufale, ti gagau ai he gata a ia.

20 To nakai kia pouli e aho a Iehova, ka e nakai maama; ko e pouli lahi ni, nakai ha i ai ha kikila?

21 Kau fakavihia e au e tau galue ha mutolu, kua kelea e tau mena ia kia au; ti nakai fiafia ai au ke he tau fakapotopotoaga ha mutolu.

22 Pete he ta mai e mutolu kia au e tau poa huhunu, mo e tau poa mena kai nakai talia e au; ko e tau poa fakaaue, ko e tau manu gako ha mutolu, nakai haga atu au ki ai.

23 Kia uta kehe ia au e go he hau a tau lologo; ko e leo mitaki foki he hau a tau napeli nakai fanogonogo au ki ai.

24 Ka kia tafe hifo e fakafiliaga tuga e tau vailele, mo e mahani tututonu tuga ne tau vailele kua tafe mau.

25 Ko e magafaoa a Isaraela na e, ne ta mai kia e mutolu e tau poa mo e tau poa mena kai kia au ke he tutakale ke he tau tau fagofulu?

26 Ne uta e mutolu e fale uta fano a Moloka ha mutolu, mo Kiuna, ko e tau tupua ha mutolu, ko e fetu he atua ha mutolu ne eke e mutolu ma mutolu.

27 To fakapaea atu e au a mutolu ke he fahi atu a Tamaseko, kua pihia mai a Iehova, ko e Atua Sapaota, ko e hana higoa haia.