Amosa

9 NE kitia e au a Iehova ne tu ai ke he tapa he fatapoa, mo e pehe mai a ia, Kia ta e koe e tau tepu ne fakafulufuluola aki kia maluelue ai e tau akau fakalava he tau gutuhala; mo e lipilipi ai ki luga he tau ulu ha lautolu oti; to kelipopo foki e au ke he pelu a lautolu ne toe ia lautolu; nakai ni hola taha ia lautolu, ti nakai hao taha ia lautolu.

2 Pete he keli hifo e lautolu ke hoko ki seoli, ka to ta mai he lima haku a lautolu he mena ia; pete foki he o hake a lautolu ke he lagi ka to ta hifo e au a lautolu he mena ia.

3 Pete he fakamumuli a lautolu ke he tapunu mouga a Karamelu, ka to kumi e au a lautolu, mo e ta mai ai e au a lautolu he mena ia; pete foki he fakamumuli a lautolu mai mua haku ke he hala toka he moana, ka to poaki atu e au ke he gata he mena ia, ti gagau ai e ia a lautolu.

4 Pete foki he fakapaea atu a lautolu ki mua ia lautolu kua fai fi kia lautolu, ka o poaki atu e au ke he pelu ti kelipopo ai e ia a lautolu; to hagao atu au kia lautolu ke malaia ai a lautolu, ka e nakai ke monuina ai.

5 Ko e Iki, ko Iehova Sapaota kua piki atu a ia ke he kelekele ti faliu puke vai ai, to tagi foki a lautolu oti kua nonofo ai; kua hake taha a ia tuga ne vailele, ti matukutuku hifo ai tuga ne vailele a Aikupito.

6 Ko ia ni kua eke hana tau haeleaga ke he lagi, mo e fakave ai hana fakapotopotoaga mena ke he lalolagi; ko ia ne ui ke he puke tahi he tahi, mo e liligi ai ki luga he kelekele; ko Iehova, ko e hana higoa haia.

7 Kua pehe mai a Iehova, Ko e fanau a Isaraela na e, nakai kia tuga e tau tagata Aitiope a mutolu kia au? Nakai kia ta hake e au a Isaraela he motu ko Aikupito? ko e tau tagata Filisitia foki i Kafatori, mo e tau tagata Suria i Kira?

8 Kitiala, kua hagao atu e tau fofoga he Iki ko Iehova ke he kautu mahani kelea, to fakaoti ai e au a lautolu mai he fuga kelekele; ka ko e magafaoa a Iakopo nakai fakaotioti katoatoa ai a lautolu, kua pihia mai a Iehova.

9 Kitiala, to poaki atu e au, lulululu foki e au e magafaoa a Isaraela ke he tau motu oti, tuga he lulululu ai e tau fua saito ke he mena ke kili aki, ka e nakai to ha fua taha ke he kelekele.

10 To mamate ke he pelu a lautolu oti he haku motu kua hala, ko lautolu ne pehe age, Nakai hoko mai e malaia, po ke moua ai a tautolu.

11 Ko e aho ia to fakatu ai e au e fale api a Tavita kua veli; to taute e au e tau mena ha i ai ne maona; ko e hana tau mena foki ne malŏlŏ to ati hake e au, to ati hake e au ke tuga he eke ke he vaha fakamua.

12 Kia eke e lautolu ma lautolu e tufaaga ha lautolu ne toe i Etoma, katoa mo e tau motu oti kua fakahigoa aki ke he haku a higoa, kua pihia mai a Iehova kua eke ai e tau mena na.

13 Kua pehe mai a Iehova, Kitiala, to hoko mai e tau aho ke moua ai e ia ne keli e kelekele a ia ne helehele ai e tau saito, mo ia ne taholi e tau fua vine kia ia ne gana ai e tau fua saito; to hihina mai ai he tau mouga e huhua vine, to tafe ai he tau matiketike oti.

14 To liuaki e au e paeaaga he haku motu ko Isaraela, to ati ai foki e lautolu e tau maga kua maona, mo e nonofo ai a lautolu, to to foki e lautolu e tau ulu vine, mo e inu ai e uaina; to eke kaina foki e lautolu, mo e kai e tau fua ka moua ai.

15 To to e au a lautolu ke he kelekele ha lautolu, to nakai taaki foki a lautolu mai he kelekele ha lautolu ne foaki atu ai e au kia lautolu, kua pihia mai a Iehova hau a Atua.