Sakaria

12 KO e kavega he kupu a Iehova kia Isaraela; kua pehe mai a Iehova ko ia ne fofola e lagi mo e fakave ai e lalolagi, ne eke foki e ia e agaga he tagata i loto ia ia;

2 Kitiala, ko au ni to eke e au a Ierusalema mo kapiniu ke tauveli ai e tau motu oti kua agagai mai ai; to ha i ai foki kia Iuta ka pa takai ai a Ierusalema.

3 Ko e aho ia foki to eke e au a Ierusalema mo maka mamafa ke he tau motu oti; ko lautolu oti kua lagaaki ai, to kafokia ai ni a lautolu; ka e fakapotopoto ai e tau motu oti he lalolagi ke tau ki ai.

4 Kua pehe mai a Iehova, Ko e aho ia to ta ai e au e tau solofanua oti ke fakaatukehe ai, mo e tau tagata ne heke ai ke vikoia ai a lautolu; ka ko e magafaoa a Iuta to kitekite au kia lautolu; ko e tau solofanua oti he motu to ta ai e au ke matapouli ai a lautolu.

5 To pehe age e tau iki a Iuta ke he tau loto ha lautolu; kua eke a lautolu kua nonofo i Ierusalema mo malolo ha tautolu kia Iehova Sapaota ha lautolu a Atua.

6 Ko e aho ia to eke e au e tau iki a Iuta ke tuga e afi ke he mena ke uta aki e afi ke he tau akau, tuga foki e hulu kua puho ke he tau fuhi saito; ti fakaoti ai e lautolu e tau motu oti kua agaagai mai kia lautolu ke he fahi matau mo e fahi hema; to liu nofo foki a Ierusalema ke he hana magamotu ko Ierusalema.

7 To laveaki fakamua foki e Iehova e tau fale ie a Iuta, ke aua neke fakahomo atu e fakahekeaga ke he magafaoa a Tavita, mo e fakahekeaga kia lautolu kua nonofo i Ierusalema ke he fakahekeaga kia Iuta.

8 Ko e aho ia to fakamalu ai e Iehova a lautolu kua nonofo i Ierusalema; ko ia ne lolelole ia lautolu ke he aho ia to tuga a Tavita a ia; ko e magafaoa a Tavita foki to tuga a Atua a lautolu, tuga ne agelu a Iehova ki mua ha lautolu.

9 Ko e aho ia foki to kumi e au ke fakaoti ai e tau motu oti ni ne o age ke tau mo Ierusalema.

10 To liligi hifo e au ki luga he magafaoa a Tavita, ki luga foki ia lautolu kua nonofo i Ierusalema e agaga he fakaalofa noa mo e tau tauvalo atu; to kitekite mai a lautolu kia au ne hoka e lautolu; to tagi hufi foki a lautolu kia ia, tuga ne tagi hufi ha ko e tama tane, ko e tama fuataha, mo e mānu ai a lautolu tuga he manu e tagata ha ko e hana tama uluaki.

11 Ko e aho ia to lahi ai e tagi kola i Ierusalema, tuga ne tagi hufi i Hatatarimoni ke he pahua a Mekito.

12 To tagi tatuki ai e motu to tagi ai e tau magafaoa takitaha hoko lautolu; ko e magafaoa he ohi a Tavita ko lautolu hoko lautolu, mo e tau hoana ha lautolu, hoko lautolu ni, ko e magafaoa he ohi a Natano ko lautolu hoko lautolu, mo e tau hoana ha lautolu, hoko lautolu ni;

13 Ko e magafaoa he ohi a Levi, ko lautolu hoko lautolu ni; mo e tau hoana ha lautolu, hoko lautolu ni; ko e magafaoa a Simei ko lautolu hoko lautolu, mo e tau hoana ha lautolu, hoko lautolu ni;

14 Ko e tau magafaoa oti ne toe, ko e tau magafaoa takitaha ko lautolu, hoko lautolu, mo e tau hoana ha lautolu hoko lautolu ni.