Mareko

2 KUA mole tuai e falu a aho, ti liu atu a ia ki Kapanaumi, kua logona foki he faoa ha he fale a ia.2 Ti fakapotopoto mai agataha e tau tagata tokologa, kua nakai tuai hao, ti nakai maeke ke fakatata atu ke he gutuhala; ti fakamatala atu ai e ia e kupu kia lautolu.

3 Ti o mai a lautolu kia ia kua ta mai e lautolu e tagata pareluti, kua tauloto he tokofa.

4 Kua nakai maeke foki ke fakatata atu a lautolu kia ia, ha ko e moto tagata ti vevete e lautolu e ufiufi he fale ne nofo ai a ia, kua āu kehe ai, ti tuku hifo e lautolu e mohega ne takoto ai e pareluti.

5 Kua fioia e Iesu ha lautolu a tua, ti pehe age a ia ke he pareluti, Haku tama na e, kua fakamagalo tuai hau a tau hala.

6 Ka e ha i ai e falu a tohikupu ha ne nofo mai, kua manamanatu ke he tau loto ha lautolu,

7 Ko e ha ne vagahau kelea ai pihia e tagata nai ke he Atua? Kua maeke ia hai ke fakamagalo e tau hala, ka ko e Atua ni hokoia?8 Ti fioia agataha e Iesu ke he hana finagalo kua manamanatu pihia ai ke he tau loto ha lautolu, ti pehe age a ia kia lautolu, Ko heigoa e mena kua manamanatu ai pihia ke he tau loto ha mutolu?

9 Po ke mena fe ne maeke vave? ke pehe ke he tagata pareluti, Kua fakamagalo tuai hau a tau hala; po ke pehe, Ati matike a, ti uta hau a mohega, ti fano?

10 Ka kia iloa e mutolu ha ha he Tama he tagata ke he lalolagi e pule ke fakamagalo ai e tau hala, (kua tala age a ia ke he pareluti),11 Kua tala atu e au kia koe, Ati matike a, ti uta hau a mohega, ti fano ke he hau a fale.

12 Ti matike ai agataha a ia, ti uta hana a mohega, ti fano ki mua ha lautolu oti. Ati ofomate ai a lautolu oti, mo e fakaheke atu ke he Atua, kua pehe, Ko e kitia la nai e tautolu ha mena pihia.

13 Ti liu foki fina atu a ia ke he tapa vai, ti o age e moto tagata oti kia ia, ti fakaako a ia kia lautolu.

14 Kua haele age a ia, ti fioia e ia a Levi ko e tama a Alefaio, ha ne nofo ke he fale telona, ti pehe atu kia ia, Mui mai a koe kia au. Ti matike ai a ia, mo e mui atu kia ia.15 Kua takoto a ia ke taumafa ke he fale hana, na tokologa foki e tau telona mo e tau tagata hala ne takoto ke kai mena fakalataha mo Iesu mo e hana tau tutaki; ha ko e mena kua tokologa a lautolu, ti mumui atu a lautolu kia ia.

16 Kua kitia he tau tohikupu mo e tau farasaio a ia ha ne kai mena fakalataha mo e tau telona mo e tau tagata hala, ti pehe age ai a lautolu ke he tau tutaki hana, Ko e ha ne kai mena ai a ia mo e inu fakalataha mo e tau telona mo e tau tagata hala?

17 Kua logona ai e Iesu, ti pehe ai a ia kia lautolu, Nakai aoga e ekekafo ke he tau tagata malolo, ka ko e tau tagata gagao hokoia; nakai hau au ke ui ke he tau tagata tututonu, ka ko e tau tagata hala kia tokihala.

18 Ne fakakanopogi e tau tutaki a Ioane, mo e tau tutaki he tau farasaio, ti o mai a lautolu, mo e pehe mai kia ia, Ko e ha ne fakakanopogi ai e tau tutaki a Ioane mo e tau tutaki he tau farasaio, ka ko e tau tutaki hau nakai fakakanopogi a lautolu?

19 Ti pehe age a Iesu kia lautolu, Na maeke kia ke fakakanopogi e tau kapitiga he tagata kitofaihoana ka kua nofo ia lautolu e kitofaihoana? Nakai maeke ia lautolu he fakakanopogi ka e nonofo gaia a lautolu mo e kitofaihoana.

20 To hoko la ke he vaha ka uta kehe ai e kitofaihoana ia lautolu, to fakakanopogi ai a lautolu ke he vaha ia.

21 Nakai fakai taha ke fono e tapulu popo ke he kala ie fou; ka pihia, ti mahe ai e tapulu popo ke he fono fou, ti au atu ai e mahehe lahi.

22 Nakai utu foki e taha e uaina fou ke he tau lupo kili manu tuai; ka pihia, ti pā e tau lupo kili manu ke he uaina fou, ti maligi ai e uaina, ti moumou ai e tau lupo kili manu; ka e utu e uaina fou ke he tau lupo kili manu fou ke lata ai.

23 Kua haele age a ia ke he aho sapati ke he tau ulu saito ti faki fakahaga hana tau tutaki e tau fua saito.

24 Ti pehe age e tau farasaio kia ia, Kitiala, ne eke mo ha e lautolu e mena kua nakai lata he eke ke he aho sapati?

25 Ti pehe age a ia kia lautolu, Nakai kia totou e mutolu e mena ne eke e Tavita he nakai fai mena a ia, kua fia kai foki a ia, auloa mo lautolu ne o mo ia,

26 Kua hu atu a ia ke he fale he Atua, ke he vaha ia Aviata ko e ekepoa ne mua, ti kai e ia e tau areto ne fakatokotoka i mua, mo e age kia lautolu ne o mo ia? Ko e mena tapu ia ke kai taha, ka ko e tau ekepoa ni hoko lautolu.

27 Kua tala age foki e ia kia lautolu, Ne eke e sapati ha ko e tau tagata; ka e nakai eke e tagata ha ko e sapati.

28 Hanai, ko e Tama he tagata, ko e Iki a ia he sapati.