Luka
Ko e Evagelia ne Tohi e Luka
1 KUA lali e tau tagata tokologa ke tohi fakamatafeiga e tala ke he tau mena kua maliali kia tautolu,
2 Tuga ne tuku mai kia tautolu e lautolu ne kitekite ki ai, mo e fekafekau ai ke he kupu tali mai he kamataaga;
3 Ko e mena ia, ko au foki ne manatu ai au, ha kua kumi fakamakutu e au e tau mena oti kana, tali mai ni he kamataaga, ke tohi fakamatafeiga atu kia koe ko e iki na e, Teofilo,
4 Kia fioia e koe e tonu he tau tala ia kua fakaako ai a koe.
5 Ko e vaha kia Herota, ko e patuiki a Iutaia, ha i ai e taha ekepoa, ko Sakaria e higoa, ko e vahega a Avia; ko e hana hoana foki, ko e faoa a Arona, ne higoa foki a ia ko Elisapeta.
6 Kua tututonu foki a laua tokoua ki mua he Atua, kua oma e laua e tau poaki mo e tau fakatufono oti he Iki, kua nakai talahaua kelea a laua.
7 Nakai fai tama a laua, nukua tufua a Elisapeta, kua motua ni a laua tokoua.
8 Kua eke e ia e feua he ekepoa ki mua he Atua ke he hana vahega ne fetogiaki,
9 Tuga e mahani he tau ekepoa, ne kotofa a ia ke hu atu ke he faituga he Iki ke fakavela ai e tau mena manogi.
10 Kua liogi foki i fafo e lanu tagata oti ke he magaaho ke huhunu ai e tau mena manogi;
11 Ti kua fakakite mai kia ia e agelu he Iki, ha ne tu he fahi matau he fata ke huhunu ai e tau mena manogi.
12 Kua kitia e Sakaria, ati fakaatukehe ai, kua hoko kia ia e matakutaku.
13 Ti pehe mai e agelu kia ia, Ma Sakaria na e, ua matakutaku a koe; nukua fanogonogo tuai ke he hau a liogi; to fanau hau a hoana ko Elisapeta e tama tane māu, to fakahigoa e koe a ia, ko Ioane.
14 To ha ia koe e fiafia mo e olioli; to fiafia foki e tokologa ke he hana fanauaga;
15 Ha ko e mena homo a ia ki mua he Iki; nakai inu e ia e uaina po ke kava; to fakapuke foki a ia ke he Agaga Tapu ke kamata mai he hana fanauaga.
16 To fakamafokifoki e ia e fanau a Isaraela tokologa ke he Iki ko e Atua ha lautolu.
17 To mua atu a ia ki mua hana ke he loto, katoa mo e malolo a Elia; ke fakamafokifoki e ia e tau loto he tau matua ke he tau fanau; ko lautolu foki ne faliuliu ke fakamafoki ke he iloilo ha lautolu ne mahani tututonu; ke tauteute e motu ke lata mo e Iki. 18 Ti tala age a Sakaria ke he agelu, Ti iloa he ha e au e mena ia? ha kua motua tuai au, ko e haku hoana foki kua motua a ia.
19 Ti tala age e agelu, kua pehe mai kia ia, Ko au ko Kaperielu, kua fa tu ki mua he Atua; kua fakafano mai e ia au ke vagahau kia koe, mo e fakamatala atu kia koe e tala mitaki ia.
20 Kitiala, to kuhukuhu a koe, mo e nakai maeke ke vagahau ato hoko ke he aho ke eke ai e tau mena ia; ha kua nakai talia e koe haku a tau kupu, ke fakamoli ni a ia ke he vaha ia.
21 Ha ne tatali e tau tagata kia Sakaria, mo e ofo he mule mai a ia he faituga.
22 Kua hu a ia ki fafo, kua nakai maeke ke vagahau kia lautolu; ti iloa ai e lautolu kua kitia e ia e fakakiteaga ke he faituga; kua hagaki tugaki atu a ia kia lautolu, kua kuhukuhu agaia ni.
23 Kua hili e tau aho he hana fekafekauaga, ti fano ai a ia ke he hana faoa.
24 Kua mole e tau aho ia, ti fatu ai a Elisapeta hana hoana, ti fakamumuli a ia lima e mahina, kua pehe age,
25 Kua eke pihia he Iki kia au ke he vaha kua kitekite mai ai a ia, ke uta kehe ai e mena ne ma ai au ki mua he tau tagata.
26 Ka ko e mahina ono, ne fakafano mai ai he Atua e agelu ko Kaperielu ke he māga i Kalilaia, ko Nasareta e higoa,
27 Ke he tamafine tote he faoa a Tavita, ne fakatutane ke he tagata, ko Iosefa e higoa; ko Maria foki e higoa he tamafine tote.
28 Ti hu atu e agelu kia ia, kua pehe mai, Fakaalofa te, ko koe kua ofania, ha ha ia koe e Iki; uhoaki e koe ke he tau fifine.
29 Kua kitia e ia a ia, ti fakaatukehe a ia ke he hana kupu, kua manamanatu foki a ia po ke heigoa e kakano he fakaalofa ia.
30 Ti pehe mai e agelu kia ia, Ma Maria na e, ua matakutaku a koe, ha kua ofania he Atua a koe.
31 Kitiala, ko e fatu ne fai a koe, ti fanau e koe e tama tane, ti fakahigoa e koe a ia, ko Iesu.
32 To homo a ia, to talahaua a ia ko e Tama hana ne Mua ue atu; to foaki atu he Iki ko e Atua kia ia e nofoaiki a Tavita hana matua;
33 To eke a ia mo Patuiki he faoa a Iakopo tukulagi; ko e hana kautu foki nakai fai fakaotiaga ia.
34 Kua tala age a Maria ke he agelu, To eke fefe e mena ia, ha kua nakai iloa e au ha tane?
35 Kua tala age e agelu, kua pehe age kia ia, To haele hifo e Agaga Tapu kia koe to fakamalu hifo foki e koe he mana hana ne Mua ue atu ko e mena ia ke talahaua ai e tama tapu, ko e Tama he Atua.
36 Kitiala, ko e hau a faoa foki ko Elisapeta kua fatu a ia kua motua, ko e tama tane foki hana tama; ko e ono mahina ainei a ia ne talahaua kua tufua. 37 Ha kua nakai fakai taha mena taha ke nakai maeke ke he Atua.
38 Kua tala age a Maria, Kitiala, ko au nai ko e fekafekau he Iki, kia hoko mai kia au tuga ne vagahau hau. Ati toka ai a ia he agelu.
39 Kua matike a Maria ke he tau aho ia, kua fakamafiti atu ke he atu mouga ke he taha māga a Iuta;
40 Ti hu atu a ia ke he fale a Sakaria, mo e fakaalofa kia Elisapeta.
41 Kua logona e Elisapeta e fakaalofa a Maria, ti hopohopo ai e tama ke he manava hana, kua fakapuke foki he Agaga Tapu a Elisapeta;
42 Kua ui a ia, kua leo lahi, kua pehe age Uhoaki a koe ke he tau fifine, uhoaki foki e tama ka fanau mai e koe!
43 Mai fe e mena nai kia au, ha kua hau e matua fifine he haku a Iki kia au?
44 Kitiala, ne hoko mai e leo he hau a fakaalofa ke he na teliga haku, ti hopohopo ai e tama ke he haku a manava he fiafia.
45 Kua monuina e fifine kua talia, ha ko e mena fakamoli e tau kupu ne talahau mai he Iki kia ia.
46 Kua tala age a Maria, Kua fakaheke atu haku a loto ke he Iki.
47 Kua fiafia ni hoku loto ke he Atua ko e haku a Fakamoui;
48 Nukua kitekite mai a ia ke he hana fekafekau ko e tagata fakateaga; ha ko e mena kamata mai he vaha nai ke talahau au kua monuina he tau hau oti.
49 Ha ko ia ne malolo kua eke e ia e tau mena homo atu maku; kua tapu foki hana higoa.
50 Ko e hana fakaalofa foki kia lautolu ne matakutaku kia ia, kua hoko ia ke hahau mo hahau.
51 Kua fakamalolo e ia hana lima, kua fakamavehevehe e ia a lautolu ne fakatokoluga ke he tau manatu he tau loto ha lautolu.
52 Kua tulutulei hifo ne ia e tau iki he tau nofoaiki ha lautolu; ti fakamatalahi e ia a lautolu ne fakateaga
53 Kua fagai e ia ke he tau mena mitaki a lautolu ne fia kai; ka ko lautolu ne muhu mena, kua fakafano noa atu e ia.
54 Kua lagomatai a ia ke he hana fekafekau ko Isaraela, he hana manatu mai ke he fakaalofa,
55 Kia Aperahamo mo e tau fanau hana tukulagi, tuga he talahau mai e ia ke he tau matua ha tautolu.
56 Kua nonofo a Maria mo ia po ke tolu e mahina; ti liu ai a ia ke he faoa hana.
57 Kua hoko ke he vaha a Elisapeta ke fanau ai, ti fanau ai e ia e tama tane.
58 Kua logona e lautolu ne katofia mo ia, mo e hana faoa, kua fakaalofa lahi mai e Iki kia ia, ati fiafia ai a lautolu fakalataha mo ia.
59 Kua tu e aho valu, ti o mai ai a lautolu ke peritome ai e tama; kua ui e lautolu a ia ke he higoa he hana matua, ko Sakaria.
60 Ti tala age hana matua fifine, kua pehe age, Aua ia; ka e ui ni a ia, ko Ioane.
61 Ti pehe age a lautolu kia ia, Nakai fai tagata he hau a faoa kua ui ke he higoa ia.
62 Kua kemokemo atu a lautolu ke he hana matua tane, po ke loto a ia ke ui aki a hai a ia.
63 Kua tala age a ia ke ta mai e lapa-tohi; ti tohi ai e ia, kua pehe, Ko Ioane hana higoa. Ati ofo ai a lautolu oti.
64 Ti matala ai agataha hana gutu, mo e hana alelo, kua vagahau a ia mo e fakaaue ke he Atua.
65 Kua hoko e matakutaku kia lautolu ne katofia mo ia; kua puloa foki e vagahau ke he tau mena oti nai ke he atu mouga oti a Iutaia.
66 Ko lautolu oti ne logona, kua tokaloto ai, kua pehe mai, Po ke eke fefe e tama nai? Ha ha ia ia foki e lima he Iki.
67 Kua fakapuke ke he Agaga Tapu a Sakaria hana matua, ti perofeta age ai a ia, kua pehe age,
68 Fakaaue a ke he Iki ko e Atua a Isaraela, nukua ahi mai a ia, mo e lukutoto hana tau tagata,
69 Ti fakatupu e ia e hoe he fakamouiaga ma tautolu ke he faoa a Tavita hana fekafekau,
70 (Tuga ne talahau mai e ia ke he tau gutu he hana tau perofeta tapu tali mai he kamataaga,)
71 Ko e fakamouiaga mai ia lautolu kua fai fi kia tautolu, mai he tau lima foki ha lautolu oti kua ita mai kia tautolu;
72 Ke fakaalofa ke he tau matua he tautolu, mo e manatu mai ke he hana maveheaga tapu;
73 Ko e omonuo ne eke ai e ia kia Aperahamo ha tautolu a matua;
74 Kia foaki mai kia tautolu kia laveaki mai he tau lima ha lautolu ne fai fi mai, ti nakai matakutaku a tautolu, ka e fekafekau a tautolu kia ia,
75 Mo e fakatapu mo e tututonu ki mua hana ke he tau aho oti he mouiaga ha tautolu.
76 Ko koe foki ma tama na e, to talahaua a koe, ko e perofeta hana ne Mua ue atu, ha ko e mena mua atu a koe ki mua he Iki, ke tauteute e tau puhala hana;
77 Ke fakailoa atu e fakamouiaga ke he hana tau tagata, ke he fakamagaloaga he tau hala ha lautolu.
78 Ha ko e fakaalofa hofihofi noa he Atua ha tautolu, kua ahi mai ai a tautolu he maama mai luga,
79 Ke fakamaama aki a lautolu kua nonofo ke he pouli mo e ata he mate, ke takitaki ha tautolu a tau hui ke he hala he mafola.
80 Ne tupu e tama, to malolo hana loto; ha ha he tutakale a ia kua hoko ke he aho he hana fakakiteaga kia Isaraela.