Luka

14 KUA hoko ke he taha sapati, kua hu atu ai a ia ke he fale he taha iki he tau farasaio ke taumafa ai, ti takahao ai a lautolu kia ia.

2 Kitiala, ko e ha i mua foki hana e taha tagata kua gagao he fua e fatu.

3 Kua tala age a Iesu ke he tau ako fakatufono, mo e tau farasaio, kua pehe age, Kua lata nakai ke fakamalolo e tau gagao ke he sapati?

4 Ka e fakamamate ni a lautolu. Ati toto ai e ia a ia, kua fakamalolo a ia, ti tuku atu ke fano.

5 Kua tala age foki a ia kia lautolu, kua pehe, Ko hai taha ia mutolu ne fai asini po ke povi, kua to ke he luo, ka e nakai kia futi hake ai agataha ke he aho sapati?

6 Ka e nakai maeke ia lautolu he tali mai kia ia he tau mena nai.

7 Kua tala age e ia e fakatai kia lautolu ne uiina ke taumafa, he kitia e ia kua fifili e lautolu e tau mena mua ke tatakoto ai, kua pehe age kia lautolu. 8 Kaeke ke ui atu taha kia koe, ke fano ke he kaiaga mena, ua takoto a koe ke he mena ne mua, neke nofo ai foki taha ne uiina e ia kua mua kia koe;

9 Ati fina atu ai a ia ne ui kia mua mo ia, mo e tala atu kia koe, Ati unuunu atu la mo e tagata nai; ti kamata ai ke ma a koe he fano ke he mena fakateaga.

10 Ka ui atu kia koe, ti fano a koe ke takoto ke he mena fakateaga; ka hau a ia ne ui kia koe, kia pehe mai a ia, Teme na e, kia hake a koe ke he mena ne mua; ti lilifu ai a koe ki mua he tau tagata ne tatakoto ke kai mena fakalataha mo koe.

11 Ha ko e tagata ne fakatokoluga e ia a ia, to fakatokolalo a ia; ka ko e tagata ne fakatokolalo e ia a ia, to fakamatalahi a ia.

12 Kua tala age foki a ia ke he tagata ne ui mai kia ia, Ka taute e koe e kaiaga mena, po ke kai huluhulu, ua ui e koe ke he tau kapitiga hau, po ke hau a tau matakainaga, po ke tau tagata he hau a faoa, po ke tau tagata maukoloa ne katofia mo koe, neke ui mai foki e lautolu kia koe, ati taui mai ai kia koe. 13 Ka taute e koe e kaiaga mena, ati ui a e koe ke he tau nonofogati, mo e tau kunekune, mo e tau kulikuli, mo e tau matapouli; 14 Ti monuina ai a koe, ha ko e mena nakai maeke ia lautolu ke taui mai kia koe; ka e taui kia koe ka liliu foki tutu mai a lautolu ne mahani tututonu.

15 Kua fanogonogo taha a lautolu ne tatakoto mo ia ke he tau mena ia, ti pehe mai ai a ia kia ia, Uhoaki e tagata ke kai mena ke he kautu he Atua.

16 Ka e tala age a ia kia ia, Kua taute he taha tagata e kaiaga mena lahi, ti ui e ia ke he tau tagata tokologa;

17 Ti fakafano atu e ia hana fekafekau ke he magaaho ke kai mena ai ke tala age kia lautolu ne uiina, Kia o mai a a mutolu, ha ko e mena kua taute tuai e tau mena oti.

18 Ati kamata ai a lautolu takitokotaha ke kalo kehe, kua taha e loto. Kua pehe mai taha kia ia, Kua fakatau tuai e au e taha kaina, ke lata ia au ke fano ke kitekite ki ai; kua ole au kia koe, kia tuku mai e koe au.

19 Ti pehe mai taha, Kua fakafua tuai e au e tau povi, lima ni kua takiua, ko e fano ne fai au ke fakafifitaki ai; kua ole au kia koe, kia tuku mai e koe au.

20 Ti pehe mai taha, Kua fai hoana tuai au; ko e mena ia kua nakai maeke ai ia au ke fina atu.

21 Ti fano ni e fekafekau ia, kua fakamatala atu e tau mena ia ke he hana iki. Ati ita ai e patu he fale, kua pehe age ke he hana fekafekau, Ati fano a fakaave ke he tau hala tu, mo e tau hala loto he māga, mo e ta mai ki hinei e tau tagata nonofogati, mo e tau kunekune, mo e tau kulikuli, katoa mo e tau matapouli.

22 Ti tala mai ai e fekafekau, Ko e iki na e, kua oti he eke e mena ne poaki mai e koe; ka e nakai kanonia e fale.

23 Kua tala age e iki ke he fekafekau, Ati fano e ke he tau hala tu, mo e tau mafegahala, ti fakamakamaka atu ke o mai a lautolu, kia puke haku a fale.

24 Ha ko e mena, tala atu e au kia mutolu, nakai fakai taha he tau tagata ia ne uiina ke kai haku a kaiaga mena nai.

25 Kua o fakalataha mo ia e moto tagata tokologa, kua haga atu a ia, mo e pehe age kia lautolu,

26 Kaeke ke hau taha kia au, ka e nakai fakavihia e ia hana matua tane mo e matua fifine, mo e hoana, mo e fanau, mo e tau matakainaga, mo e lafu mahakitaga, ti hoko ni ke he hana moui, nakai maeke ke eke a ia mo tutaki haku.

27 Ko ia kua nakai fua hana ni a satauro, mo e nakai mui mai kia au, nakai maeke ke eke a ia mo tutaki haku.

28 Ha ko hai taha ia mutolu kua manako ke ati e kolo, ka e nakai nofo fakamua ki lalo ke totou e tau tupe ke palepale aki, po kua lahi nakai ia ia e tau mena ke fakaoti ai?

29 Neke va mai kia ia e tau tagata oti ka mamata ai, he toka e fakave, ka e nakai maeke ke fakaoti ai, kua pehe mai,

30 Ko e tagata a ena, ne kamata ke eke, ka e nakai maeke ke fakaoti.

31 Po ko hai e patuiki, ko e fano ne fai ke tau ke he taha patuiki, ka e nakai nofo fakamua ki lalo ke fifili, po ke ne maeke nakai ia ia, mo e hana kau ne taha e hogofulu afe, ke tau kia ia kua hau ke tau mai ka e ua e hogofulu afe hana kau?

32 Kaeke kua nakai, ti fakafano atu e ia e tau fekafekau, ka kua mamao, ke ole atu ke vete e tau.

33 To pihia foki a mutolu ka nakai takitokotaha mo e tiaki hana tau mena oti, ti nakai maeke ke eke a ia mo tutaki haku.

34 Ko e mena mitaki e masima; kaeke ke magalo e masima, po ke heigoa taha mena ke fakakona aki?

35 Nakai aoga ia ke he fonua, nakai aoga foki ke tanu aki e tau akau, ka e tolo ni ki fafo. Ko ia ne fai teliga ke fanogonogo aki, ati fanogonogo a a ia.