Luka

5 KUA tautaomi mai e moto tagata kia ia, ke fanogonogo ke he kupu he Atua he tu a ia ke he kauvai he vai ko Kenesareta.

2 Ti kitia atu e ia ua e foulua ke he kauvai, ka kua o kehe ai e tau tagata takafaga, kua fufui ha lautolu a tau kupega.

3 Ti hake a ia ke he taha foulua, ko e foulua haia a Simona, ti ole age kia ia ke ue atu e foulua he kauvai. Kua nofo hifo a ia, kua fakaako atu ai mai he foulua ke he moto tagata.4 Kua oti tuai hana fakamatalaaga, ti tala age ai a ia kia Simona, Ati ueue atu a ke he mena hokulo, mo e tuku hifo ai ha mutolu a tau kupega ke moua ai e falu a ika.

5 Ti tala age a Simona, kua pehe age kia ia, Ko e Iki na e, ne tukumate a mautolu ne po, ati ahogia, ka e nakai moua ha mena; ka ko e hau a kupu to tuku hifo ai e au e kupega.

6 Kua oti he eke ai e lautolu, ti takai ai e lautolu e tau ika loga lahi, ha ne mahē ha lautolu a kupega.

7 Kua kemokemo atu a lautolu ke he tau tagata ha lautolu ke he taha foulua, ke o mai ke lagomatai kia lautolu; ti o mai a lautolu, kua fakapuke e lautolu e na foulua ua, kua teitei tomo tuai. 8 Kua iloa e Simona Peteru, ti fakaveli ai a ia ke he na tulive a Iesu, kua pehe age, Ko e Iki na e, kia haele kehe a koe ia au, ha ko au ko e tagata hala.

9 Ha ko e mena ofo a ia katoa mo lautolu oti ne fakalataha mo ia, ha ko e tau ika kua moua e lautolu;

10 Kua pihia foki a Iakopo mo Ioane, ko e fanau a Sepetaio, ne takafaga fakalataha a lautolu mo Simona, Kua tala age a Iesu kia Simona, Ua matakutaku a koe, ke kamata he vaha nai ke moua ai e koe e tau tagata.

11 Kua hiki hake ha lautolu a tau foulua ki uta, ati toka ai e lautolu e tau mena oti, ka e mumui atu kia ia.

12 Ha he taha māga a ia kitiala, ko e taha tagata kua oti hana tino he lepela, kua kitia atu e ia a Iesu, ti fakaveli fakafohifo ai a ia, mo e olelalo mai kia ia, kua pehe mai, Ko e Iki na e, ka finagalo a koe ki ai, ti maeke ni ia koe ke fakamea au.

13 Ti fakaolo e ia hana lima, kua piki atu kia ia, kua pehe atu, Na loto au ki ai, kia mea a koe. Ati maulu ai agataha e lepela ia ia. 14 Ti tala age a ia kia ia, Aua neke tala age kia taha, ka e fano a ke fakakite age a koe ke he ekepoa, ti uta poa mo e hau a fakameaaga, tuga ne poaki a Mose ke eke mo fakamailoga kia lautolu.

15 Ka kua au atu ai he tuogo e tala kia ia, Kua fakapotopoto mai foki e moto tagata tokologa ke fanogonogo kia ia kia fakamalolo foki e ia ha lautolu a tau gagao. 16 Ka kua haele a ia ke he mena tokanoa, ti liogi ai.

17 Kua fakaako a ia ke he taha aho, kua nonofo mai ai e tau farasaio mo e tau fakaako he fakatufono, ko lautolu ne o mai he tau magamotu oti i Kalilaia, mo Iutaia, mo Ierusalema; ha ha i ai foki e mana he Iki ke fakamalolo aki a lautolu.

18 Kitiala, ne ta mai he tau tagata ke he mohega, e taha tagata pareluti, kua manako na lautolu ke ta mai a ia mo e tuku hifo ki mua hana.

19 Nakai kitia e lautolu taha hala ke ta age ai a ia ha ko e moto tagata, ti o hake a lautolu ki luga he fale, kua tuku hifo ai a ia, katoa mo e mohega, ke he mena ne ato aki e fale ki loto ia lautolu ki mua a Iesu.

20 Kua fioia e ia ha lautolu a tua, ti tala age ai a ia kia ia, Teme na e, kua fakamagalo tuai hau a tau hala.

21 Ti manamanatu ai e tau tohikupu, mo e tau farasaio, kua pehe age, Ko hai hanai kua vagahau kelea ke he Atua? Kua maeke ia hai ke fakamagalo e tau hala, ka ko e Atua ni hokoia? 22 Ka kua fioia e Iesu ha lautolu a tau manatu, ti tala age ai a ia, kua pehe age kia lautolu. Ko e heigoa e mena kua manamanatu ki ai a mutolu ke he tau loto ha mutolu?

23 Po ke mena fe ne maeke vave? ke pehe, Kua fakamagalo tuai hau a tau hala, po ke pehe, Ati matike a, mo e fano?

24 Ka kia iloa e mutolu ha ha he Tama he tagata e pule ke he lalolagi ke fakamagalo ai e tau hala, (kua tala age a ia ke he pareluti,) Kua tala atu e au kia koe, Ati matike a, ti uta hau a mohega, ti fano ke he hau a fale.

25 Ati matike ai agataha a ia ki mua ha lautolu, kua uta e mena ne takoto ai a ia, ti fano ke he hana fale ha ne fakaheke atu ke he Atua.

26 Kua ofomate a lautolu oti, mo e fakaheke atu he he Atua; kua matakutaku lahi a lautolu, kua pehe age, Ko e tau mena kehe kua kitia e tautolu ke he aho nai.

27 Kua mole tuai e tau mena ia, ati hu ai a ia ki fafo, kua kitia e ia e telona, ko Levi e higoa, kua nofo he fale telona, ti kua pehe age kia ia, Mui mai a koe kia au.

28 Ti toka hifo e ia e tau mena oti, ti matike a ia, mo e mui atu kia ia.

29 Kua eke foki e Levi e kaiaga mena lahi māna ke he hana fale; ha i ai foki e tau telona tokologa, mo e falu a tagata ne tatakoto ke kai mena fakalataha mo lautolu.

30 Ka ko e tau tohikupu ha lautolu mo e tau farasaio ne loma a lautolu ke he tau tutaki hana, kua pehe age, Ko e ha ne kai mena ai a mutolu, mo e inu ai, fakalataha mo e tau telona mo e tau tagata hala?

31 Ti tala age a Iesu, kua pehe age kia lautolu, Nakai aoga e ekekafo ke he tau tagata malolo, ka ko e tau tagata gagao hoko lautolu. 32 Nakai hau au ke ui ke he tau tagata tututonu, ka ko e tau tagata hala, kia tokihala a lautolu.

33 Kua tala mai a lautolu kia ia, Ko e ha ne fakakanopogi mau ai mo e eke liogi e tau tutaki a Ioane, pihia foki mo e tau tutaki he tau farasaio, ka ko e tau tutaki hau kua kai mena a lautolu mo e inu? 34 Ati tala age ai a ia kia lautolu, Ne maeke kia kia mutolu ke fakakanopogi e tau kapitiga he tagata kitofaihoana, ka kua nonofo mo lautolu e tagata kitofaihoana?

35 Ka e hoko mai e vaha ke uta kehe ai e tagata kitofaihoana ia lautolu, ko e vaha ia ke fakakanopogi ai a lautolu.

36 Kua tala age foki a ia kia lautolu e taha fakatai, Nakai fai tagata ke fono ha tapulu popo ke he kala ie he tapulu fou; ka pihia, ti mahē ai ke he mena fou; nakai lata foki e kala ie fou mo e tapulu popo. 37 Ti nakai fai tagata ke utu e uaina fou ke he tau lupo kili manu tuai; ka pihia, ti pāpā ai e tau lupo kili manu ke he uaina fou, ti maligi ai ni, ti moumou ai foki e tau lupo kili manu.

38 Ka e utu e uaina fou ke he tau lupo kili manu fou, ati fakatau mau ai.

39 Nakai fai tagata foki kua inu a ia ke he uaina tuai, ati manako agataha ke he uaina fou; ha kua tala mai a ia, Kua mua e mitaki e uaina kua leva.