Gahua

10 HA i Kaisaria e taha tagata ko Konelio e higoa, ko e takitaki he tokoteau ke he kau ne higoa ko e hau a Italia;

2 Ko e tagata mahani-Atua, mo e matakutaku ke he Atua, katoa mo e hana magafaoa oti, ko ia ne age e tau mena fakaalofa ne loga ke he tau tagata, mo e ole atu ke he Atua nakai noa.

3 Kua kitia māli e ia ke he fakakiteaga tokai ko e magaaho hiva he aho, ko e agelu he Atua kua hu mai kia ia, kua pehe mai, Konelio na e.

4 Kua fakapupula a ia kia ia, ti kua matakutaku ai, kua pehe atu, Ko e iki na e, ko e heigoa kia? Ti pehe mai a ia kia ia, Kua hoko hake hau a tau liogi mo e hau a tau mena fakaalofa ke eke mo fakamanatuaga ki mua he Atua.

5 Ko e hanai, fekau atu a e tau tagata ki Iopa, mo e ahi a Simona ne higoa ko Peteru;

6 Ha ne nonofo a ia mo e taha Simona ko e taute kili manu, ha he tapa tahi hana fale; ko ia ke talahau atu kia koe e tau mena ke lata he eke e koe.

7 Kua fano e agelu ne vagahau mo Konelio, ati ui ai a ia ke he tokoua a fekafekau hana, mo e tagata tau mahani-Atua, ko e taha ia lautolu ne fakalataha mau mo ia;

8 Kua fakamatala e ia kia lautolu e tau mena oti, ti fakafano ai e ia a lautolu ki Iopa.

9 Ko e pogipogi, ha he magahehala a lautolu, kua tata tuai ke he māga, kua hake ai a Peteru ke he tua fale ke liogi ai, tokai ko e magaaho ono.

10 Kua hoge a ia, kua manatu ke kai, ha ne tauteute a lautolu, ati hekeatua ai a ia.

11 Ti kitia ai e ia e lagi kua maihi mai, mo e taha mena ne hifo kia ia tuga ne ie laulahi, kua pipi e tau matapotu ne fa hana, mo e tuku hifo ke he lalolagi;

12 Ha i ai e tau manu huifa oti ne totolo, mo e tau manu favale, mo e tau mena totolo, mo e tau manu lele.

13 Ti hoko mai e leo kia ia, Peteru na e, ati tu a ki luga, ke keli, mo e kai.

14 Ka a pehe atu a Peteru, Ko e Iki na e, aua ia; ha ko e mena nakai kai au ha mena kua tapu, po ke kelea.

15 Kua liu lagaua mai e leo kia ia, Ko e tau mena kua fakamea he Atua, aua neke totoku e koe kua tapu.

16 Kua eke lagatolu e mena nai, ati liuaki hake ai e mena ke he lagi.

17 Kua mahalohalo ai a Peteru ke he hana loto po ke heigoa e fakakiteaga kua kitia e ia, kitiala, e tau tagata ne fakafano e Konelio, ha ne kumi e lautolu e fale a Simona, kua tutu mai he gutufale,

18 Ha ne ui mo e hūhu, po ke nofo nakai a Simona ne higoa ko Peteru he mena ia.

19 Kua manamanatu hifo a Peteru ke he fakakiteaga, ti pehe mai e Agaga kia ia, Kitiala, ha ne kumi mai e tau tagata tokotolu a koe.

20 Ka e matike a ki luga, ke hifo, ke o a mutolu mo lautolu, aua neke mahalohalo ni; ha ko au ni ne fekau a lautolu.

21 Ati hifo ai a Peteru ke he tau tagata ne fakafano e Konelio kia ia, kua tala age ai, Kitiala, ko au hanai ne kumi e mutolu; kua o mai a mutolu ke ha?

22 Ati tala mai ai a lautolu, Ko Konelio ko e takitaki he tokoteau, ko e tagata mahani tonu, mo e matakutaku ke he Atua, kua polamitaki he motu oti ko Iutaia, ne poaki a ia he agelu tapu ke ahi a koe, ke fano a koe ke he hana fale, kia fanogonogo a ia ke he tau kupu ha ha ia koe.

23 Ati tala age ai a ia kia lautolu ke o mai ke he fale, kua talia e ia a lautolu, Ko e pogipogi kua o ai a lautolu mo Peteru, ti o foki fakalataha mo ia e falu a matakainaga i Iopa.

24 Ko e taha pogipogi foki kua hoko atu ai a lautolu ki Kaisaria. Kua tatali foki a Konelio kia lautolu, kua fakapotopoto e ia hana faoa, mo e hana tau kapitiga fakahele.

25 Ha ne hu atu a Peteru, ti fonofono e Konelio a ia, kua fakaveli ki mua hana, mo e hufeilo kia ia.

26 Ka kua fakatu e Peteru a ia, kua pehe atu, Ati tu a ki luga; ko au ni ko e tagata.

27 Kua hu foki ki fale, ha ne vagahau a laua, ti kitia ai e ia e tokologa kua fakapotopoto mai.

28 Kua tala age a ia kia lautolu, Kua iloa ni e mutolu kua tapu ke he tagata Iutaia ke fakalataha po ke fakatata ke he tagata kehe; ka kua fakakite mai he Atua kia au, aua neke totoku atu e au ha tagata kua fakalialia po ke kelea.

29 Ko e mena ia ne hau ai au mo e nakai fetokaki, he ahi atu au; ko e hanai, ke hūhu atu au, ko e heigoa e mena kua ahi atu ai e mutolu au?

30 Ati tala mai ai a Konelio, Ko e aho tuai, po fa ia ne fakakanopogi ai au, kua hoko ke he magaaho pehenai; ko e magaaho hiva foki ne liogi ai au ke he haku a fale, kitiala, kua tu mai ai e tagata ki mua haku mo e tapulu kikila,

31 Ti pehe mai a ia, Konelio na e, kua talia hau a liogi, kua manatu foki hau a tau mena fakaalofa ki mua he Atua.

32 Ko e hanai, kia fakafano atu e koe ki Iopa, ke ahi a Simona, ne higoa ko Peteru; ha ne nofo a ia he fale a Simona ko e taute kili manu ha he tapa tahi; ka hau a ia ti vagahau mai ai kia koe.

33 Ti kua fakafano atu ai agataha e au kia koe; kua mitaki ni he haele mai a koe. Ko e hanai, ha i hinai a mautolu oti kana ki mua he Atua, ke fanogonogo atu ke he tau mena oti ni ne poaki mai ai e Atua kia koe.

34 Ati talatala atu ai a Peteru, kua pehe atu, Ko e moli, kua iloa e au nakai fakamailoga tagata e Atua.

35 Ka ko e tau tagata he tau motu oti kana ne matakutaku kia ia mo e mahani tututonu, kua talia ai e ia.

36 Kua iloa e mutolu e kupu ne fakafano e ia ke he fanau a Isaraela; kua fakamatala ai e tala mitaki ke monuina ai kia Iesu Keriso, ko e Iki a ia he tau tagata oti kana;

37 Ko e kupu ia ne talahaua i Iutaia oti, ne kamata i Kalilaia, ka kua mole e papatisoaga ne fakamatala e Ioane;

38 Ko e kupu kia Iesu ko e Nasareta, he fakauku he Atua a ia ke he Agaga Tapu mo e mana; ko ia ni ne haele fano mo e totonu mo e fakamalolo a lautolu oti ni ne matematekelea he tiapolo; ha ko e mena ha ia ia e Atua.

39 Ko e tau tagata talahau foki a mutolu ke he tau mena oti ni ne eke e ia ke he motu ko Iutaia katoa mo Ierusalema; ko ia foki ne kelipopo e lautolu he fakatautau e lautolu a ia ke he akau.

40 Ko ia ne fakatu mai he Atua ke he aho tolu, mo e fakakite fakatonu ai a ia;

41 Nakai ko e tau tagata oti kana, ka ko e tau tagata talahau hokoia ne fifili fakamua he Atua, ko mautolu nai ne kai mena a mautolu mo e inu fakalataha mo ia he matike mai a ia ia lautolu kua mamate.

42 Kua poaki mai foki a ia kia mautolu ke fakamatala atu ke he tau tagata, mo e talahau fakatonu atu, ko ia ni kua kotofa he Atua ke eke mo fakafili ke he tau tagata momoui mo e tau tagata mamate.

43 Ne talahau mai foki a ia he tau perofeta oti, ha ko e hana higoa ke moua ai e fakamagaloaga he tau hala ha lautolu oti ne tua kia ia.

44 Kua vagahau atu a Peteru e tau kupu ia ati to hifo ai e Agaga Tapu kia lautolu oti kana ne fanogonogo ke he kupu.

45 Ati ofo lahi ai e tau tagata kua tua ne peritome, ne o mai mo Peteru, he liligi hifo ke he tau tagata kehe e fakaalofa he Agaga Tapu.

46 Ha ko e mena kua fanogonogo atu a lautolu kia lautolu kua vagahau mai ke he tau vagahau kehekehe, mo e fakaheke atu ke he Atua. Ati tala age ai a Peteru.

47 To maeke kia ia taha ke hataki atu e vai, ke aua neke papatiso aki a lautolu nai, kua moua e Agaga Tapu tuga na tautolu?

48 Kua poaki foki a ia kia papatiso a lautolu ke he higoa he Iki. Ati ole age ai a lautolu kia ia ke nonofo a lautolu mo ia ke he falu a aho.