Gahua

23 ATI fakapupula ai a Paulo ke he fakapotopotoaga kua pehe age, Ko e tau matakainaga na e ma fanau, kua eke ni e au haku a mahani ki mua he Atua mo e loto manamanatu hifo mitaki, kua hoko mai ni ke he aho nai.

2 Ati tala age ai e ekepoa ne mua ko Anania kia lautolu ne tutu age, ke tuki hana gutu.

3 Ti pehe age ai a Paulo kia ia, Ko koe na, ko e pa kua fakahina, to tuki he Atua a koe; kua nofo kia a koe ke fakafili mai kia au ke lata mo e fakatufono, ka e holifono a koe he fekau ke tuki mai kia au?

4 Ka e tala age a lautolu ne tutu age, Kua amuamu kia a koe ke he ekepoa ne mua he Atua?

5 Ti pehe atu ai a Paulo, Ko e tau matakainaga na e, nakai iloa e au ko e ekepoa ne mua a ia; ha ko e mena kua tohi, Ua kupu kelea a koe ke he iki he hau a motu.

6 Kua iloa foki e Paulo, ko e tau satukaio e falu ia lautolu, ka ko e tau farasaio e falu, ati ui atu ai a ia ke he fakapotopotoaga, Ko e tau matakainaga na e ma fanau, ko au ni ko e farasaio, ko e tama he farasaio; ko e amaamanaki ke he tu mai ha lautolu ne mamate, kua fakafili ai au.

7 Kua tala atu e ia e kupu na, ti tupu ai e taufetoko he tau farasaio mo e tau satukaio; ati veveheua ai e lanu tagata.

8 Ha ko e mena kua pehe mai ai e tau satukaio, nakai tuai tu mai taha kua mate ti nakai fai agelu po ke agaga; ka kua taofi he tau farasaio e na mena ua ia.

9 Kua tupu foki e miha lahi; kua tutu foki ki luga e tau tohikupu, ko lautolu ne kau mo e tau farasaio, kua taufetoko fakamakamaka atu, kua pehe age, Nakai moua e mautolu ha mahani kelea ke he tagata nai; kaeke foki kua vagahau mai e taha agaga, po ke taha agelu kia ia to ha?

10 Kua lahi ni e taufetoko, kua matakutaku e iki ne pule he tau kau neke hēhē e lautolu a Paulo, ati fekau ai a ia ke he kau ke o hifo mo e fofo mai a ia ia lautolu, mo e ta mai a ia ke he kolo.

11 Kua hoko ke he po, kua tu mai e Iki kia ia, kua pehe mai, Paulo na e, kia fakamanavalahi a a koe; ha ko e mena tuga he talahau fakatonu e koe i lerusalema e tau mena kia au, kua lata foki he talahau pihia e koe i Roma.

12 Kua aho, ati kau fakalataha ai e falu he tau tagata Iutaia, kua eke e omonuo e lautolu, kua pehe a lautolu, nakai kai mena, po ke inu a lautolu ato tamate e lautolu a Paulo.

13 Kua tokofagofulu mo e tumā a lautolu kua eke e omonuo nai.

14 Kua o atu a lautolu ke he tau ekepoa ne mua, mo e tau patu, kua tala atu, Kua omonuo a mautolu ke he anatema, nakai kai e mautolu ha mena ato tamate e mautolu a Paulo.

15 Hanai, kia fakailoa e mutolu, katoa mo e fakapotopotoaga ke he iki ne pule he tau kau, ke takitaki hifo a ia a pogipogi kia mutolu, toka ai ke kumi fakamakutu e mutolu he tau mena kia ia; ka ko mautolu kua tauteute tuai a mautolu ke kelipopo a ia, ka e nakaila tata mai a ia.

16 Kua logona he tama he mahakitaga a Paulo e tala ke he lamalamati, ati fano ai a ia kua hu ke he kolo, mo e talahau atu kia Paulo.

17 Ati ui ai e Paulo ke he taha takitaki he tokoteau, kua pehe age ki ai, Takitaki atu a e fuata nai ke he iki ne pule he tau kau; ha ko e ha ha ia ia taha mena ke talahau atu kia ia.

18 Ati uta ai a ia kua takitaki atu e ia ke he iki ne pule he tau kau, kua pehe age, Ne ui mai kia au a Paulo ne lili, kua olelalo mai kia takitaki mai e au e fuata nai kia koe, ha ia ia taha mena ke tala atu kia koe.

19 Ati toto ai he iki ne pule he tau kau hana lima, kua o a laua hoko laua, mo e huhu a ia, Ko e heigoa hāu ke tala mai kia au?

20 Ti pehe mai a ia, Kua kau fakalataha e tau tagata Iutaia ke ole atu kia koe kia takitaki hifo e koe a Paulo a pogipogi ke he fakapotopotoaga, tuga mo e mena ke kumi fakamakutu e lautolu taha mena kia ia.

21 Ka e aua neke fanogonogo a koe kia lautolu; ha ko e mena lamalamati mai kia ia ha lautolu a tau tagata ne tokofagofulu mo e tumā, kua omonuo a lautolu, nakai kai mena a lautolu po ke inu ato kelipopo e lautolu a ia; kua tauteute ainei a lautolu, mo e leo mai ke he vagahau hāu.

22 Ati toka atu ai he iki ne pule he tau kau e fuata ke fano, kua tala atu kia ia, Aua neke tala age ke he taha tagata kua fakakite mai e koe e tau mena nai kia au.

23 Ti ui atu a ia ke he tokoua a takitaki he na tokoteau, kua tala atu, Kia tauteute a e kau ne ua geau e tau tagata ke o ki Kaisaria, mo lautolu ne heke e tau solofanua ne tokofitugofulu, mo lautolu ne fai tao ne ua geau ke he magapo tolu;

24 Kia ta mai foki e tau manu ke fakaheke ai a Paulo, mo e takitaki atu a ia kia hao atu ke he iki ko Feliki.

25 Ne tohi e ia e tohi, kua pehe age e tau kupu,

26 Ko au ko Kalaotio Lusia, kua fakaalofa atu au ke he iki ne mua ko Feliki.

27 Kua tapaki e tagata na he tau tagata Iutaia ne eke ke kelipopo e lautolu a ia; ati fano ai au mo e tau kau, mo e laveaki a ia, he iloa e au ko e tagata Roma a ia.

28 Ne fia iloa e au e mena ne hokotaki mai ai a ia e lautolu, ti takitaki hifo ai e au a ia ke he fakapotopotoaga ha lautolu;

29 Ti iloa ai e au e tau kupu he fakatufono ha lautolu ne hokotaki ai a ia; ka e nakai ni talahaua taha mena ke lata ke mate ai a ia, po ke lili ai a ia.

30 Ti fakailoa ai kia au, kua takahao e tau tagata Iutaia ke he tagata, ati fakafano atu ai agataha e au kia koe, mo e poaki atu kia lautolu ne hokotaki a ia ke talahau atu ho mua hana tau mena. Kia monuina a koe.

31 Ati uta ai he tau kau a Paulo tuga ne poaki mai ai kia lautolu, kua takitaki atu a ia he po ki Anatipateri.

32 Ko e pogipogi, kua liu mai ai a lautolu ke he kolo, kua tuku atu a lautolu ne heke solofanua ke o a lautolu mo ia;

33 Kua hohoko foki a lautolu ki Kaisaria, ati age ai e tohi ke he iki, kua tuku atu foki mo Paulo kia ia.

34 Kua totou ai e ia, ati hūhu mai ai, po ko fe hana motu. Kua iloa e ia mai Kilikia a ia;

35 Ati tala age ai, To fanogonogo atu au kia koe ka hoko mai a lautolu ne hokotaki a koe. Ti fekau atu ai, kia leoleo a ia ke he fale he iki ko Herota.