Gahua

6 KO e vaha ia ha ne fakatokologa ai e tau tutaki, ti tupu ai e loma he tau tagata Helenisi ke he tau tagata Heperu, ha kua nimo ha lautolu a tau fifine takape ke he tufatufaaga he tau mena ke he tau aho.

2 Ati ui ai he tokohogofulu ma ua ke he lafu tutaki, kua pehe atu, Nakai fia toka e mautolu e kupu he Atua, ka e tufatufa e tau koloa.

3 Hanai, ko e tau matakainaga na e, ati fifili a e tokofitu a tagata talahaua ha mutolu, kua puke ke he Agaga Tapu mo e iloilo, kia kotofa e mautolu a lautolu ke he feua nai.

4 Ka ko mautolu, to fakamakamaka a mautolu ke he liogi mo e tufatufaaga he kupu.

5 Ti mitaki ni e kupu ke he moto tagata oti kana; ati fifili ai e lautolu a Setefano, ko e tagata kua puke ke he tua mo e Agaga Tapu; mo Filipo, mo Pokoro, mo Nikanora, mo Timona, mo Pamena, mo Nikolao, ko e tagata Anetioka kua liogi;

6 Kua tuku atu e lautolu a lautolu ki mua he tau aposetolo; ti liogi ai, mo e fakalago ha lautolu a tau lima ki luga ia lautolu.

7 Kua tupu foki e kupu he Atua; ti kua au atu ai he tokologa e tau tutaki i Ierusalema; kua omaoma foki e tokologa he tau ekepoa ke he tua.

8 Ka ko Setefano, kua puke ni a ia ke he tua mo e mana, kua eke e ia e tau mana mo e tau fakamailoga lalahi ki mua he motu.

9 Ati tutu mai ai e falu he sunako ne higoa ko e sunako he tau tagata Lipetino, mo e tau tagata Kurene, mo e tau tagata Alesania, mo lautolu mai Kilikia mo Asia, kua taufetoko mo Setefano.

10 Kua nakai maeke foki ia lautolu ke totoko atu ke he iloilo mo e Agaga kua vagahau ai a ia.

11 Ati omoomoi ai e lautolu e fala tagata, kia pehe a lautolu, Kua logona e mautolu a ia ne vagahau kelea kia Mose mo e Atua.

12 Kua fakalagalaga ai e lautolu e motu, mo e tau patu, mo e tau tohikupu; ti kua tutu mai ai a lautolu, kua tapaki a ia mo e takitaki age ke he fakapotopotoaga.

13 Kua tuku age foki e lautolu e tau fatipiko, kua pehe age a lautolu, Nakai oki ni e tagata na e vagahau kelea ke he mena tapu nai, mo e fakatufono;

14 Ha ko e mena logona e mautolu a ia, ne pehe mai, To fakaoti e Iesu na ko e Nasareta e mena nai, mo e fakaliliu e ia e tau mahani ne tuku mai e Mose kia tautolu.

15 Kua mataono kia ia a lautolu oti ne nonofo ke he fakapotopotoaga, kua kitia e lautolu hana mata kua tuga ne fofoga he agelu.