Efeso

5 HANAI kia fifitaki a mutolu ke he Atua tuga e tau fanau fakahelehele.

2 Kia mahani a mutolu mo e fakaalofa, tuga ne fakaalofa mai a Keriso kia tautolu, mo e foaki e ia a ia ma tautolu ke eke mo poa, mo poa tamate ke he Atua, ko e mena manogi ia.

3 Ka ko e feuaki, mo e tau mena kelea oti, mo e velevelemena, aua neke talahau e tau mena ia ki mua ha mutolu, tuga e mena kua lata mo e tau tagata tapu.

4 Ko e tau kupu kelea foki, mo e tau kupu fakateaga, mo e fefeua, ko e tau mena haia kua nakai lata; ka ko e fakaaue kua mitaki ni.

5 Nukua iloa tuai e mutolu e mena nai, ko e tagata feuaki, po ke taha kua eke mena fakalialia, po ke velevelemena, (ko e mena hufeilo ke he tupua haia,) nakai fakai taha ia lautolu ke moua māna e kautu a Keriso ko e Atua ia.

6 Aua neke fakahehe e taha a mutolu ke he tau kupu fakateaga, ha ko e tau mena ia kua hoko ni e ita he Atua ke he tau tagata faliuliu.

7 Hanai, aua neke fakalataha a mutolu mo lautolu;

8 Ha ko e mena ne pouli a mutolu i tuai, ka ko e ainei kua maama a mutolu ke he Iki; kia mahani a mutolu tuga e tau tagata he maama.

9 (Ha ko e fua he Agaga, ko e mahani mitaki oti kana ia, mo e tututonu, mo e tau kupu moli.

10 Kia kumikumi a mutolu e tau mena kua fiafia e Iki ki ai.

11 Aua foki neke fakafetui fakalataha a mutolu mo e tau gahua he pouli kua nakai aoga, ka e mitaki ke akonaki ai e mutolu.

12 Ha ko e tau mena kua eke fufu e lautolu, ko e tau mena mā haia ke vagahau atu ai.

13 Ko e tau mena oti ka akonaki, kua fakakite mai ai ke he maama; ha ko e tau mena oti kua fakakite ko e maama haia.

14 Ko e mena ia kua pehe mai ai a ia, Kia ala a koe kua mohe, kia tu mai ia lautolu kua mamate, to fakamaama mai e Keriso kia koe.

15 Hanai, a mutolu kia o fakalaulau a mutoIu; nakai tuga ne tau tagata goagoa ka kia tuga e tau tagata iloilo.

16 Kia fakaaoga e mutolu e tau aho he mouiaga nai, ha kua kelea e tau aho ainei.

17 Hanai, aua neke goagoa a mutolu, ka kia iloa e mutolu e finagalo he Iki.

18 Aua foki neke konahia a mutolu ke he uaina, ko e mena matahavala haia; ka kia puke a mutolu ke he Agaga;

19 Kia fevagahauaki a mutolu ke he tau salamo, mo e tau lologo, mo e tau ulutapu he Agaga, kia fakaheke mo e lologo atu ke he Iki ke he tau loto ha mutolu.

20 Aua neke noa ha mutolu a fakaaue ha ko e tau mena oti ke he Atua e Matua, ke he higoa he Iki ha tautolu ko Iesu Keriso.

21 Kia omaoma a mutolu ko e taha kia taha mo e matakutaku ke he Atua.

22 Ko mutolu na, ko e tau fifine kia takitokotaha mo e omaoma ke he tau tane ha mutolu tuga e omaoma ke he Iki.

23 Ha ko e tane, ko e ulu he hoana haia, tuga a Keriso, ko e ulu he ekalesia haia, ko ia foki ko e fakamoui he tino.

24 Hanai, tuga e ekalesia kua omaoma kia Keriso, kia pihia foki e tau fifine ke he tau tane ha lautolu ke he tau mena oti.

25 Ko mutolu, ko e tau tane, kia fakaalofa a mutolu ke he tau hoana ha mutolu, tuga e fakaalofa a Keriso ke he ekalesia, mo e foaki mai e ia a ia ke eke mo hukui māna;

26 Kia fakatapu ai e ia mo e fakamea ai ke he koukouaga he vai, katoa mo e kupu;

27 Kia tuku atu ai e ia kia ia ni e ekalesia fulufuluola, nakai fai ila, po ke mafigofigo, po ke taha mena pihia, ka ko e ekalesia tapu mo e nakai fai mena kelea.

28 Kua lata pihia foki ke he tau tane ke fakaalofa age ke he tau hoana ha lautolu, tuga e tau tino ha lautolu. Ko ia kua fakaalofa ke he hana hoana, kua fakaalofa a ia kia ia ni.

29 Ha kua nakai fakai taha ke fakavihia hana a tino, ka kua fagai mo e leveki ai e ia, pihia foki e Iki mo e ekalesia.

30 Ha ko tautolu, ko e tau maga haia he hana tino, mo e hana kakano, mo e hana tau huimotua.

31 Ha ko e mena ia, ke toka ai he tane hana matua tane mo e hana matua fifine, ka e fakalataha a laua mo e hana hoana, ke eke ni a laua mo tino taha.

32 Ko e mena nai ko e mena galo ni; ka kua vagahau atu au kia Keriso katoa mo e ekalesia.

33 Ka ko mutolu, kia takitokotaha a mutolu gotoa mo e fakaalofa atu ke he hana hoana, tuga e fakaalofa a ia kia ia ni; ka ko e fifine kia fakalilifu a ia ke he hana tane.