Iakopo

3 HAKU a tau matakainaga na e, aua neke tokologa a mutolu ke eke mo tau akoako, ha kua iloa e tautolu to mua e fakahala ke moua e tautolu.

2 Ha ko e tau mena loga kua hehe ai a tautolu oti; kaeke kua nakai hehe taha ke he kupu, ko e tagata mahani mitaki katoatoa a ia, to maeke foki ke taofi e tino oti.

3 Kitiala, kua tuku e tautolu e mena ke taofi aki ke he tau gutu he tau solofanua kia omaoma ai a lautolu kia tautolu, ti liliu ai e tautolu ha lautolu a tau tino oti.

4 Kitiala, ko e tau foulua foki, pete ni he lalahi pihia mo e tutuli he tau matagi lalahi, kua liliu a lautolu he fohemuivaka tote ke he mena kua loto ki ai e tagata fakatila vaka.

5 Kua pihia foki e alelo, ko e mena tote a ia, ka e hula ke he tau mena lalahi. Kitiala, ko e tau akau loga kua tugi he afi tote.

6 Ko e alelo, ko e afi haia, ko e tanakiaga he tau mahani kelea; kua pihia foki e alelo kua tuku ke he tau fahi tino ha tautolu kua kelea ai e tino oti, kua tugi e ia e mouiaga nai oti kana, kua tugi a ia he Kehena.

7 Ha ko e mena kua fakaako mo e fakaako tuai foki he pulotu he tau tagata e tau mahani kehekehe, ko e tau manu favale, mo e tau manu lele, ko e tau mena totolo, mo e tau mena momoui ha he tahi.

8 Ka ko e alelo, kua nakai maeke ia taha ke fakaako ia, ko e mena kelea kua nakai mataofi kua puke namo ke he tau mena kona ke mamate ai.

9 Ko ia kua fakaheke aki e tautolu ke he Atua e Matua, ko ia foki kua kaialu aki e tautolu ke he tau tagata kua eke ke he fakatai he Atua;

10 Kua hopo mai mai he gutu taha e fakaheke mo e kaialu. Haku a tau matakainaga na e, nakai lata e tau mena ia ke eke pihia.

11 Kua maeke kia ke he vai puna ke puna hake ke he gutu taha e vai humelie mo e vai kona?

12 Haku a tau matakainaga na e, kua maeke kia ke he mati ke fua mai e tau fua olive, po ke vine ke fua mai e tau fua mati? kua pihia foki nakai fai vai puna ke puna mai ai e vai māi mo e vai magalo.

13 Ko hai kia ia mutolu kua iloilo mo e maama? kia fakakite mai e ia ke he tau mahani mitaki hana tau gahua mo e loto holoilalo ha i ai e iloilo.

14 Kaeke ha ha he tau loto ha mutolu e mahekeheke kelea mo e fetoko, aua neke hula, aua foki neke pikopiko he liuliu ke he mena moli.

15 Ko e iloilo na, nakai hifo mai luga ia, ka e mai he lalolagi nai, ko e mena he tino mo e tau temoni.

16 Ha ko e mena ha i ai e mahekeheke mo e taufetoko, ha i ai e fakaagitau mo e tau mena kelea oti kana.

17 Ka ko e iloilo mai luga, kua fakamua hana a mea, ti mafola, ti totonu, ti fulumokoi, kua puke ke he fakaalofa mo e tau fua mitaki, nakai fakaalofa fakaigati, nakai fakatupua.

18 Kua gana foki e tau fua he tututonu mo e mafola e lautolu kua fakatupu ai e mafola.