1 Peteru

4 HANAI, kua mamahi a Keriso ke he tino ma tautolu, kia eke mo kanavaakau foki kia mutolu e loto ia ni, ha ko ia kua fakamamahi ke he tino, kua toka ai e ia e hala;

2 Kia nakai tuai omaoma a ia ke he tau manako lahi ha he tau tagata, ke he hana tau tau kua toe ke he tino, ka kia omaoma ke he finagalo he Atua.

3 Ha ko e mena fakahiku ke he tau aho kua mole atu he mouiaga nai he eke ai e tautolu e manako he tau motu kehe, ne mahani ai a tautolu ke he tau mahani matahavala, mo e tau manako lahi, mo e inu lahi ke he uaina, mo e tau tafeaufi, mo e tau inuaga he kava, mo e hufeilo ke he tau tupua ke holifono ai.

4 Ko e mena ia kua ofo ai mo e vagahau kelea ai a lautolu, ha kua nakai tafepoi a mutolu fakalataha mo lautolu ke he matahavala ia ni kua mua ue atu;

5 To tala atu e lautolu e tala kia ia kua taute ke fakafili a lautolu kua mamate, mo lautolu kua momoui.

6 Ha ko e mena ia ni ne fakamatala atu ai e vagahau mitaki kia lautolu kua mamate, kia fakahala a lautolu ke lata mo e tau tagata ke he tino, ka e momoui ai ke he agaga ke lata mo e Atua.

7 Ka kua tata mai tuai e fakatulakiaga he tau mena oti; hanai, kia nonofo fakalatalata a mutolu mo e mautali mo e liogi.

8 Kia mua ke he tau mena oti ke moua e mutolu e fakaalofa lahi ko e taha kia taha, ha ko e fakaalofa ke ufiufi ai e tau hala loga;

9 Kia ta age e tau mena fakaalofa ke he tau fenoga ko e taha ke he taha mo e nakai loma.

10 Kia takitokotaha a mutolu mo e fekafekau ko e taha ke he taha ke he mena ia ni, ke fakalata ke he mena fakaalofa kua moua e ia, tuga ne tau fekafekau pule mitaki ke he tau mena fakaalofa kehekehe he Atua.

11 Kaeke ke vagahau e taha, kia lata mo e tau kupu he Atua; kaeke ke fekafekau e taha kia fakalata ke he malolo kua foaki mai he Atua, kia fakaheke e Atua ke he tau mena oti kana, ha ko Iesu Keriso; kia ha ia ia e fakahekeaga mo e malolo tukulagi tukumuitea. Amene.

12 Ko e tau fakahelehele na e, aua neke ofo a mutolu ke he kamatamataga tuga e afi, kua hoko kia mutolu ke eke mo kamatamataaga kia mutolu, tuga ne hoko ha mena fou kia mutolu;

13 Ka kia fiafia a mutolu ha kua fakafetui a mutolu mo Keriso ke he hana tau mamahi, kia fiafia mo e olioli lahi ai a mutolu ka fakakite mai hana lilifu.

14 Ka ekefakakelea a mutolu ha ko e higoa a Keriso, uhoaki a mutolu, ha kua nofo mau ia mutolu e Agaga lilifu he Atua; kua vagahau kelea e lautolu kia ia, ka kua fakaheke e mutolu.

15 Aua foki neke fakamamahi he tagata ia mutolu he keli tagata, he kaiha, he mahani kelea, po ke ahiahi teao e tau mena he falu a tagata;

16 Kaeke ke fakamamahi taha ha ko e Kerisiano a ia, aua neke mā ai a ia, ka kia fakaheke atu a ia ke he Atua ha ko e mena ia ni.

17 Ha ko e vaha nai kua kamata ai e fakafiliaga ke he fale he Atua; kaeke foki kua fakamua kia tautolu, po ke fefe kia e fakahikuaga kia lautolu kua faliuliu ke he vagahau mitaki he Atua?

18 Kaeke foki ke fakamomoui fetamaki e tagata tututonu, po ko fe kia ke tu mai ai e tagata matahavala mo e tagata hala?

19 Hanai, ko lautolu ni kua fakamamahi ha ko e finagalo he Atua, kia tuku atu mo e mahani mitaki ha lautolu a tau agaga kia ia, ko ia ne eke e tau mena oti, ko ia kua fakamoli.