1 Ioane

3 KITIALA e fakaalofa lahi kua foaki mai he Matua kia tautolu, kia fakahigoa ai a tautolu ko e fanau he Atua; ko e mena ia kua nakai iloa ai he lalolagi a tautolu, ha ko e mena nakai iloa foki a ia.

2 Ko e tau tagata fakahelehele na e, ko e fanau he Atua a tautolu ke he vaha nai, ka e nakala fakakite mai po ke fefe a tautolu a mui; ka kua iloa e tautolu, ka fakakite mai ti tuga a ia a tautolu, ha ko e mena to kitia tonuhia ai a ia e tautolu.

3 Ko lautolu gotoa foki ha i ai e amaamanaki nai, kua takitokotaha mo e fakamea e ia a ia, tuga he mea a ia.

4 Ko lautolu auloa kua hala, kua holifono foki a lautolu; ko e hala, ko e holifono ia.

5 Kua iloa foki e mutolu ne fakakite mai a ia kia uta kehe e ia e tau hala ha tautolu, nakai fai hala foki a ia.

6 Ko lautolu gotoa kua tumau kia ia, nakai hala a lautolu; ko lautolu oti ha ne hala, kua nakai kitia e lautolu a ia, po ke iloa a ia.

7 Ko e fanau ikiiki na e, aua neke fakahehe e taha a mutolu; ko ia kua eke e mahani tututonu, ko e tagata tututonu a ia, tuga a ia ne mahani tututonu.

8 Ko ia kua hala, mai he tiapolo a ia; ha ko e mena kua hala e tiapolo tali mai he kamataaga. Ko e mena ia ne fakakite mai ai e Tama he Atua, kia moumou e ia e tau gahua he tiapolo.

9 Ko lautolu auloa kua fanau mai he Atua, nakai hala a lautolu, nukua toka mau hana tau fua ki loto ia lautolu; nakai maeke foki ke hala a lautolu, ha kua fanau mai a lautolu he Atua

10 Ko e mena ia kua iloa ai e fanau he Atua mo e fanau he tiapolo. Ko lautolu gotoa kua nakai eke e mahani tututonu, nakai mai he Atua a lautolu, katoa mo lautolu kua nakai fakaalofa ke he tau matakainaga ha lautolu.

11 Ha ko e poaki hanai kua fanogonogo ki ai a mutolu tali mai he kamataaga, kia feofanaki a tautolu.

12 Nakai tuga a Kaino ne mai ia ia ne mahani kelea, ne kelipopo foki e ia hana matakainaga; ko e heigoa foki e mena ne kelipopo ai e ia a ia? ha kua kelea hana tau mahani, ka e tonu e tau mahani he matakainaga hana.

13 Haku a tau matakainaga na e, aua neke ofo a mutolu kaeke ke vihiatia he lalolagi a mutolu.

14 Kua iloa e tautolu, kua mole atu ia tautolu e mate, ka e hohoko atu ke he moui ha kua fakaalofa a tautolu ke he tau matakainaga. Ko ia kua nakai fakaalofa ke he matakainaga hana, kua nofo agaia a ia ke he mate.

15 Ko lautolu oti kua vihiatia e tau matakainaga ha lautolu, ko e tau tagata kelipopo tagata a lautolu; kua iloa foki e mutolu, ko lautolu oti kua kelipopo tagata kua nakai toka mau ia lautolu e moui tukulagi.

16 Ko e mena foki hanai kua iloa ai e tautolu e fakaalofa he tuku atu e ia hana moui ke hukui aki a tautolu; lata foki kia tautolu ke tuku atu e tau moui ha tautolu ke hukui aki e tau matakainaga.

17 Ko e tagata kua toka ki ai e koloa he lalolagi, kua kitekite foki e ia ke he matakainaga hana kua nofogati ka e pa atu hana loto kia ia, kua nofo fefe e fakaalofa ke he Atua ke he loto hana?

18 Haku fanau ikiiki na e, aua neke fakaalofa a tautolu ke he kupu po ke alelo, ka ko e mahani mo e fakamoli.

19 Ko e mena foki ia ke iloa ai e tautolu kua fakamoli a tautolu; to iloa tonuhia foki e tau loto ha tautolu ki mua hana.

20 Ha ko e mena kaeke kua fakahala mai he tau loto ha tautolu kia tautolu, kua mua e Atua ke he tau loto ha tautolu, kua fioia foki e ia e tau mena oti kana.

21 Ko e tau tagata fakahelehele na e, kaeke kua nakai fakahala mai he tau loto ha tautolu kia tautolu, ti moua ai e tautolu e fakamalolo ki mua he Atua;

22 Ko e tau mena oti foki ke ole atu ai a tautolu, kua moua mai e tautolu ia ia, ha kua omaoma a tautolu ke he tau poaki hana, mo e eke e tautolu e tau mena kua fiafia ki ai a ia.

23 Ko e hana poaki foki hanai, kia tua a tautolu ke he higoa he Tama hana ko Iesu Keriso; kia feofanaki foki a tautolu, tuga e poaki ne tuku mai e ia kia tautolu.

24 Ko e tagata foki kua oma ke he tau poaki hana, ha ne nofo a ia ki loto ia ia, ko ia foki ki loto ia ia; ko e mena foki hanai kua iloa ai e tautolu ha ne nofo a ia ki loto ia tautolu, ha ko e Agaga kua foaki mai ai e ia kia tautolu.