1 Ioane

5 KO lautolu oti kua talia ko Iesu ko e Keriso a ia, kua fanau mai a lautolu mai he Atua; ko lautolu oti foki kua fakaalofa kia ia hana e fanau, kua fakaalofa foki a lautolu ke he hana fanau.

2 Ko e mena hanai kua iloa ai e tautolu, kua fakaalofa a tautolu ke he fanau he Atua, ka fakaalofa a tautolu ke he Atua, mo e omaoma ke he tau poaki hana.

3 Ha ko e fakaalofa ke he Atua hanai, kia omaoma a tautolu ke he tau poaki hana; nakai mamafa foki hana tau poaki.

4 Ha ko lautolu gotoa kua fanau mai he Atua kua kautu a lautolu ke he lalolagi; ko e kautu foki hanai ke kautu ai ke he lalolagi, ko e tua ha tautolu.

5 Ko hai kia kua kautu ke he lalolagi, ka nakai ko ia ni kua talia, ko Iesu ko e Tama he Atua a ia ni?

6 Ko ia hanai ne haele mai mo e vai katoa mo e toto, ko Iesu Keriso a ia; nakai ko e vai hokoia, ka ko e vai katoa mo e toto.

7 Ko e Agaga foki a ia kua talahau mai, ha ko e Agaga kua fakamoli ni a ia.

8 Ha ko e tolu foki kua talahau ai ko e Agaga, mo e vai, mo e toto; ko e tolu foki ia ko e taha ni.

9 Kaeke kua talia e tautolu e talahau he tau tagata, kua mua e talahau he Atua; ha ko e talahau he Atua hanai, ne talahau mai e ia ke he hana Tama.

10 Ko e tagata kua tua ke he Tama he Atua, ha i loto ia ia e talahau; ko e tagata kua nakai tua ke he Atua, kua eke e ia a ia mo pikopiko, he nakai talia e ia e talahau ne talahau mai ai he Atua ke he Tama hana.

11 Ko e talahau foki hanai, kua foaki mai he Atua e moui tukulagi kia tautolu; ko e moui foki ia ha he Tama hana.

12 Ko e tagata kua moua e Tama, kua moua e ia e moui; ko ia kua nakai moua e Tama he Atua, kua nakai moua e ia e moui.

13 Ne tohi atu e au e tau mena nai kia mutolu kua tua ke he higoa he Tama he Atua, kia iloa ai e mutolu kua moua e mutolu e moui tukulagi; kia tua foki a mutolu ke he higoa he Tama he Atua.

14 Ko e fakamalolo foki hanai kua moua ki mua hana, kaeke ke ole atu ai e tautolu ha mena ke lata mo e hana finagalo, ti fanogonogo mai ai a ia kia tautolu.

15 Kaeke foki kua iloa e tautolu kua fanogonogo mai a ia kia tautolu ke he tau mena oti ka ole atu ai, kua iloa e tautolu kua moua e tautolu e tau mena kua ole atu ai a tautolu kia ia.

16 Kaeke kua kitia he taha tagata e matakainaga hana kua hala ke he hala nakai hoko atu ke he mate, kia olelalo atu a ia māna, ati foaki mai ai e moui kia ia ma lautolu kua hala nakai hoko atu ke he mate. Na fai hala ke hoko atu ke he mate; nakai tala atu au kia ole atu a mutolu mo e hala ia.

17 Ko e tau mahani hepehepe oti, ko e hala haia; na fai hala foki nakai hoko atu ke he mate.

18 Kua iloa e tautolu ko lautolu oti kua fanau mai he Atua nakai hala a lautolu; ka ko ia ne fanau mai he Atua, kua leveki e ia a ia; ti nakai piki atu a ia kua mahani kelea ke he tagata ia.

19 Kua iloa e tautolu mai he Atua a tautolu; ka ko e lalolagi oti ha he pule hana kua mahani kelea.

20 Kua iloa foki e tautolu, kua haele mai e Tama he Atua, kua foaki mai foki e ia kia tautolu e tau loto manamanatu, kua iloa ai e tautolu a ia kua fakamoli; ha ia ia kua fakamoli a tautolu, ha he Tama hana ko Iesu Keriso. Ko e Atua moli hanā, mo e moui tukulagi.

21 Ko e tau fanau ikiiki na e, kia leveki e mutolu a mutolu kia mamao mo e tau tupua. Amene.