3 Ioane

Ko e Tohi Tolu a Ioane

1 KO au ko e patu ko e haku a tohi hanai kia Kaio kua fakahele, ko ia kua fakaalofa fakamoli ki ai au.

2 Ko e fakahele na e, kua mua haku a manako kia monuina a koe mo e malolo, tuga e monuina he agaga hau.

3 Ha ko e mena kua lahi haku a fiafia, he o mai e tau matakainaga, mo e talahau hau a fakamoli, nukua eke e koe e mahani he kupu moli.

4 Nakai fai fiafia au ke mua ke he mena nai, ka fanogonogo au, kua mahani e fanau haku kua lata mo e kupu moli.

5 Ko e fakahele na e, kua fakamoli a koe ke he tau mena oti kua eke e koe ke he tau matakainaga katoa mo e tau tagata kehe,

6 Ko lautolu kua talahau ki mua he ekalesia hau a fakaalofa; kaeke ke lagomatai a koe ke he fenoga ha lautolu, kia lata mo e Atua, ti mitaki ni hau a mena kua eke.

7 Ha ko e mena ne o atu a lautolu ha ko e higoa hana, kua nakai talia e lautolu taha mena mai he tau motu kehe.

8 Lata he talia e tautolu e tau tagata pihia, kia eke a tautolu mo tau lagomatai ke he kupu moli.

9 Ne tohi atu e au ke he ekalesia; ka ko Tioterefe, ko e tagata kua fia mua kia lautolu kua nakai talia e ia a mautolu.

10 Ko e mena ia, ka fina atu au, ti fakamanatu ai au ke he hana mahani ne eke e ia, kua fa vagahau kia mautolu ke he tau kupu kelea; nakai kuenaia he tau mena ia, ka e nakai talia e ia e tau matakainaga, kua hataki atu foki a ia kia lautolu kua loto ki ai, kua vega foki e ia a lautolu he ekalesia.

11 Ko e fakahele na e, aua neke fifitaki a koe ke he kelea, ka ko e mitaki. Ko e tagata kua mahani mitaki, mai he Atua ni a ia; ka ko e tagata mahani kelea, nakai kitia e ia e Atua.

12 Kua talahaua a Temetiu he tau tagata oti kana, katoa mo e kupu moli ni; ko mautolu foki kua talahau a mautolu ki ai, kua iloa foki e mutolu kua moli ha mautolu a talahau.

13 Loga e tau mena ha ha ia au ke tohi atu ai; ka e nakai fia tohi atu e au kia koe ke he vaitohi mo e fulutohi;

14 Ka kua amaamanaki au ke feleveia vave a taua kia fevagavagahauaki a taua. Kia monuina a koe. Kua fakaalofa atu kia koe e tau kapitiga; kua fakaalofa atu au ke he tau kapitiga takitokotaha.