Fakakiteaga

Ko e Fakakiteaga

1 KO e fakakiteaga a Iesu Keriso, ne tuku atu e Atua kia ia ke fakakite mai ke he hana tau fekafekau e tau mena kua lata ke hohoko vave mai; ne fekau mai foki e ia hana agelu ke fakailoa mai ai ke he hana fekafekau ko Ioane,

2 Ko ia ne talahau mai e kupu he Atua, mo e talahauaga kia Iesu Keriso ko e tau mena oti foki ni kitia e ia.

3 Uhoaki a ia kua totou, katoa mo lautolu kua fanogonogo ke he tau kupu he perofetaaga nai, mo e omaoma ke he tau mena kua tohi ai; ka kua tata mai e vaha.

4 Ko au ko Ioane, ko e haku tohi hanai ke he tau ekalesia ne fitu ha i Asia; kia ha ha ia mutolu e fakaalofa noa mo e monuina mai ia ia kua moui ni, ne moui tuai foki, ko ia foki ke haele mai; mai he tau Agaga foki ne tokofitu ha i mua he nofoaiki hana;

5 Mai ia Iesu Keriso foki, ko e talahau fakamoli, ko e uluaki ha lautolu kua mamate, ko e Iki foki he tau patuiki he lalolagi. Ko ia kua fakaalofa mai kia tautolu, ne fakakoukou foki e ia a tautolu mai he tau hala ha tautolu ke he hana toto,

6 Ne eke foki e ia a tautolu mo tau patuiki mo tau ekepoa ke he Atua, ko e Matua hana ni, kia ha ha ia ia e fakahekeaga mo e malolo tukulagi tukumuitea. Amene.

7 Kitiala, kua haele mai a ia mo e tau aolagi, to kitia foki a ia he tau mata oti kana, katoa mo lautolu ne hoka a ia; to tagi tatuki foki e tau faoa oti he lalolagi ha ko ia. Ko e moli. Amene.

8 Ko au ko e Alefa mo e Omeka, ko e kamataaga mo e fakahikuaga, kua talahau mai ai he Iki, ko ia kua moui ni, ne moui tuai foki, ko ia foki ke haele mai, ko ia hana e malolo oti kana.

9 Ko au ko Ioane, ko e matakainaga ha mutolu; mo e fakafetui fakalataha mo mutolu ke he matematekelea, mo e kautu, katoa mo e fakauka a Iesu Keriso, ne ha i ai au ke he motu kua higoa ko Patamo ha ko e kupu he Atua, mo e talahauaga kia Iesu Keriso.

10 Ha ha he Agaga au ke he aho he Iki; ti logona ai e au e leo lahi ki tua haku tuga ne pu, kua pehe mai,

11 Ko au ko e Alefa mo e Omeka, ko e fakamua mo e fakamui; mo e pehe foki, Ko e tau mena ke kitia e koe kia tohi a ke he tohi mo e uta ke he tau ekalesia i Asia, ko Efeso, mo Semurana, mo Perakamo, mo Tuataira, mo Sarataisa, mo Filatelefaia, mo Laotikaia.

12 Ne tafilu atu au ke kitia e leo ne vagahau mai kia au; kua tafilu atu au ti kitia ai e au e tau tuāga lamepa auro ne fitu.

13 Ha i ai foki ke he vaha loto he tau tuāga lamepa auro ne fitu e taha tuga ne Tama he tagata, ne tapulu a ia ke he tapulu ne hoko hifo ke he tau hui, ne pipi foki hana fatafata ke he pipi auro;

14 Kua hina foki hana fufuga mo e lauulu tuga ne fulufulu mamoe hina, tuga e kiona ni; ko e hana na fofoga foki tuga ne puho he afi ia;

15 Ko e hana tau ve foki tuga ne apa kula kikila ia, tuga ne vela ke he gutuumu; ko e hana leo foki tuga ne go he tau vai loga;

16 Ti ha he lima matau hana fitu e fetu; ti fina atu mai he hana fofoga e pelu mata fakafahiua, kua matila ni; ko e hana fofoga foki tuga ne la ia ka kikila mai ke he hana malolo.

17 Kua kitia e au a ia, ti fakaveli fakafohifo ai au ke he na ve hana tuga ne tagata mate; ka kua fakalago e ia hana lima matau ki luga ia au, kua pehe mai kia au, Ua matakutaku a koe; ko au ko e fakamua mo e fakamui;

18 Ko au kua moui atu nai; ne mate foki au, ka e kitiala, kua moui au tukulagi tukumuitea; Amene; ha ha ia au foki e tau kei a Hate mo e mate.

19 Kia tohi e koe e tau mena kua kitia e koe, mo e tau mena ha i ai nai, katoa mo e tau mena nakala tutupu mai fakamui,

20 Ko e kakano galo he tau fetu ne fitu ne kitia e koe ke he lima matau haku, mo e tau tuāga lamepa auro ne fitu. Ko e tau fetu ne fitu, ko e tau agelu ia he tau ekalesia ne fitu; ko e tau tuāga lamepa foki ne fitu ne kitia e koe ko e tau ekalesia ia ne fitu.