Fakakiteaga

7 KUA mole atu e tau mena ia, ti kitia ai e au e tau agelu ne tokofa kua tutu mai ke he tau fahi ne fa he lalolagi, kua taofi e tau matagi ne fa, neke agi atu e matagi ke he fonua, po ke tahi, po ke taha akau.

2 Ti kitia foki e au e taha agelu kua hake mai he mena kua hake ai e la, ha ha ia ia e fakamau fakamailoga he Atua moui; kua ui mo e leo lahi ke he tau agelu ne tokofa kua tuku age ki ai ke moumou e fonua mo e tahi,

3 Kua pehe atu, Aua neke moumou e mutolu e fonua, po ke tahi, po ke tau akau, ato fakamau fakamailoga e mautolu e tau fekafekau he Atua ha tautolu ke he tau matale ha lautolu.

4 Ne logona foki e au e totouaga ha lautolu ne fakamau fakamailoga; ko e taha teau e afe, ti fagofulu ma fa e afe a lautolu ne fakamau fakamailoga mai he tau magafaoa oti he fanau a Isaraela;

5 Ko e tau afe ne hogofulu ma ua a lautolu ne fakamailoga mai he magafaoa a Iuta; ko e tau afe ne hogofulu ma ua a lautolu ne fakamailoga mai he magafaoa a Reupena; ko e tau afe ne hogofulu ma ua a lautolu ne fakamailoga mai he magafaoa a Kato;

6 Ko e tau afe ne hogofulu ma ua a lautolu ne fakamailoga mai he magafaoa a Asera; ko e tau afe hogofulu ma ua a lautolu ne fakamailoga mai he magafaoa a Nafatali; ko e tau afe ne hogofulu ma ua a lautolu ne fakamailoga mai he magafaoa a Manase;

7 Ko e tau afe ne hogofulu ma ua a lautolu ne fakamailoga mai he magafaoa a Simeona; ko e tau afe ne hogofulu ma ua a lautolu ne fakamailoga mai he magafaoa a Levi; ko e tau afe ne hogofulu ma ua a lautolu ne fakamailoga mai he magafaoa a Isakara;

8 Ko e tau afe ne hogofulu ma ua a lautolu ne fakamailoga mai he magafaoa a Sepulona; ko e tau afe ne hogofulu ma ua a lautolu ne fakamailoga mai he magafaoa a Iosefa; ko e tau afe ne hogofulu ma ua a lautolu ne fakamailoga mai he magafaoa a Peniamina.

9 Kua mole atu e tau mena ia, ti kitia ai e au, kitiala, ko e moto tagata tokologa, kua nakai maeke ia taha ke totou, mai he tau motu oti, mo e tau faoa, mo e tau tagata kehekehe, mo e tau vagahau kehekehe, kua tutu mai a lautolu ki mua he nofoaiki, ki mua foki he Punua mamoe, kua tapulu a lautolu ke he tau tapulu hina, kua toto foki e tau lau pama ke he tau lima ha lautolu;

10 Kua tauui foki a lautolu mo e leo lahi, kua pehe atu, Ko e fakamouiaga ha he Atua ha tautolu, ko ia kua nofo ke he nofoaiki, katoa mo e Punua mamoe.

11 Kua tutu agaagai foki e tau agelu oti ke he nofoaiki, mo e tau patu, mo e tau mena momoui ne fa, kua fakaveveli fakafohifo a lautolu ki mua he nofoaiki, mo e hufeilo ke he Atua,

12 Kua pehe atu, Amene; kia ha he Atua ha tautolu e fakamonu, mo e fakahekeaga, mo e iloilo, mo e fakaaue, mo e lilifu, mo e mana, mo e malolo tukulagi tukumuitea. Amene.

13 Ti tala mai ai e taha he tau patu, kua pehe mai kia au, Ko lautolu na kua tapulu ke he tau tapulu hina, ko hai kia a lautolu, po ko fe foki ne o mai ai a lautolu?

14 Ti tala atu ai au kia ia, Ko e Iki na e, kua fioia e koe. Ti pehe mai ai a ia kia au, Ko lautolu na kua o mai mai he matematekelea lahi, kua unu foki ha lautolu a tau tapulu, mo e fakahina ha lautolu a tau tapulu ke he toto he Punua mamoe.

15 Ko e mena ia ha i ai a lautolu ki mua he nofoaiki he Atua, mo e fekafekau kia ia ke he aho mo e po ke he faituga hana; ko ia foki kua nofo ke he nofoaiki to nofo a ia mo lautolu.

16 Nakai tuai fia kai a lautolu, ti nakai tuai fia inu a lautolu, nakai tuai velagia foki a lautolu he la, po ke taha vevela;

17 Ha ko e Punua mamoe ha i mua he nofoaiki, to leveki e ia a lautolu, mo e takitaki a lautolu ke he tau vaipuna he moui; to holoholo kehe foki he Atua e tau hihinamata oti mai he tau mata ha lautolu.