Ruta

Ko e Tohi kia Ruta

1 KO e vaha ne pule ai he tau fakafili, ha ha i ai e hoge ke he motu; ti fano ai taha tagata i Petelehema-iuta ke api ke he motu ko Moapi, ko ia mo e hoana hana, mo e hana na tama tane tokoua.

2 Ko Elimeleka e higoa he tagata, ko e higoa he hoana hana ko Naumi haia, ka ko e tau higoa he hana tau tama tane tokoua ko Mahalona mo Kiliona, ko e tau tagata Efarata a lautolu mai Petelehema-iuta, kua o atu a lautolu ke he motu ko Moapi, mo e nonofo ai.

3 Kua mate a Elimeleka ko e tane a Naumi; ti toe ai a ia mo e hana tau tama tane tokoua.

4 Ti faihoana a laua ke he tau fifine Moapi, ko e higoa he taha ko Orepa, ko e higoa he taha ko Ruta; ti nonofo ai a lautolu ke he tau tau tokai ko e hogofulu.

5 Ti mamate a laua ko Mahalona mo Kiliona; ti toe ai e fifine, kua mamate hana tau tama tokoua katoa mo e hana tane.

6 Ti matike a ia mo e hana tau figona fifine, kia liu atu a ia he motu ko Moapi, ha kua logona e ia ke he motu ko Moapi, kua ahi e Iehova hana motu, mo e foaki age ai e tau mena kai ma lautolu.

7 Ti fano kehe a ia he mena ne nofo ai a ia, mo e hana na figona fifine tokoua fakalataha mo ia; kua o a lautolu ke he puhala ke liu atu ai ke he motu ko Iuta.

8 Ti pehe atu a Naumi ke he hana tau figona fifine tokoua, kia o a mua ti liu atu takitaha ke he kaina he hana matua fifine; kia fakaalofa a Iehova kia mua, tuga ne fakaalofa a mua kia laua kua mamate, katoa foki mo au;

9 Kia foaki mai e Iehova kia mua ke moua e mua takitokotaha e okiokihaga ke he kaina he hana tane. Kua figita atu e ia a laua, ti tagi fakaleolahi ai a lautolu.

10 Ti pehe mai a laua kia ia, To o atu ni a tautolu mo koe ke he motu hau.

11 Ka kua pehe atu a Naumi kia laua, Kia liliu atu a, haku fanau na e, kua toe kia e tau tama ke he manava haku ke eke mo tau tane ma mua?

12 Kia liliu atu a, haku fanau na e, ti o ā mua; kua motua tuai au, kua mole atu e vaha ke liu fai tane ai au; kaeke foki ke pehe atu au, To ligaliga moua ha tane; kaeke foki ke faitane au ke he po a magaaho, mo e fanau ai foki e tau tama tane;

13 To tatali kia a mua ke lalahi a laua? to nonofo noa ai kia a mua ke tatali kia laua? Haku fanau na e, aua ia, kua mamahi lahi ai au ha ko mua, ha kua hoko mai kia au e lima a Iehova.

14 Ti tagi tautau fakaleolahi foki a lautolu; ti figita e Orepa hana matua fugavai fifine, ka e pipiki atu a Ruta kia ia.

15 Ti pehe atu a ia, Kitiala, kua liu e maa hau ke he hana motu, mo e hana tau atua, ati mui atu a koe ke he maa hau.

16 Ka kua pehe mai a Ruta, Aua neke ole mai a koe kia au ke toka a koe, ke ua mui atu au kia koe; ha ko e mena ke fano a koe ki ai, to fano ai ni au, ko e mena ke nofo ai a koe to nofo ai au, to eke e motu hau mo motu haku, to eke e Atua hau mo Atua haku;

17 Ko e mena ke mate ai a koe, to mate ai au, ti tanu ai au ke he mena ia; kia eke pihia e Iehova kia au, mo e lafilafi e ia ki ai, kaeke ke vevehe kehe a taua mo koe ato vevehe he mate.

18 Ne kitia e ia kua fakamalolo a ia ke o mo ia, ti nakai tuai fai kupu a ia ki ai.

19 Ne o a laua, ti hoko atu a laua ki Petelehema, ti fakalutukia e maga oti kia laua, kua pehe age a lautolu, Ko Naumi kia hanai?

20 Ti pehe age a ia kia lautolu ua ui e mutolu au ko Naumi, ka e ui e mutolu au ko Mara; ha kua kona lahi ni e tau mena kua eke kia au E ia hana e malolo oti kana.

21 Ne muhu mena au he fano, ti liuaki mai e Iehova au mo e nofogati, ti ui e mutolu au ko Naumi he ha? ha kua fakamamahi mai e Iehova au, ti matematekelea au ia Ia hana e malolo oti kana.

22 Ne liu mai a Naumi katoa mo Ruta ko e fifine Moapi, ko e hana figona fakalataha mo ia, kua liu mai he motu ko Moapi; ti hoko a laua ki Petelehema ke he kamataaga he heleheleaga karite.