Tau Salamo

58 KO e moli kia kua fakamamate a mutolu ka kua lata ke vagahau ke he tututonu, mo e fakafili tonu, ko mutolu ko e fanau he tau tagata?

2 Ko e moli, kua eke mena kelea e mutolu ke he tau loto ha mutolu; kua fafati e mutolu e favale ke he motu ke he tau lima ha mutolu.

3 Kua o kehe e tau tagata mahani kelea tali he fanau mai; tali he fanau mai kua hehe a lautolu, ha ha ne vagahau pikopiko.

4 Ha i ai ia lautolu e mena kona, tuga ne mena kona he tau gata; tuga e asipi teligatuli kua ponoti e ia hana teliga;

5 Ko ia kua nakai fanogonogo ke he leo he tau tagata fakavai gata, pete ni he fakavai ke he tau lagatau iloilo ke fakavai aki.

6 Ko e Atua na e, kia pakipaki e koe ha lautolu a tau nifo ke he tau gutu ha lautolu; Iehova na e, kia lipilipi e koe e tau gao he tau punua leona.

7 Kia liu puke vai a lautolu ke tuga ne magavai, kia mole atu a lautolu; ka loloku e ia e kaufana ke fana atu hana tau fana, kia eke ia ke tuga ne mena kua hio kehe e tau mata fana.

8 Tuga ne hihi vao kia liu puke vai mo e mole atu a ia; tuga ne fanau maua e fifine, aua neke kitia e lautolu e la.

9 Ka e nakai la logona he tau pani ha mutolu e puho he tau akau mahukihuki, ti havilia kehe ai a lautolu po ke mata, po ke moho.

10 To fiafia e tagata tututonu he kitia e ia e taui; to koukou hana tau hui ke he toto he tagata mahani kelea.

11 Ti pehe age ai e tau tagata, Ko e moli, kua fai taui e tagata tututonu; ko e moli, ko e Atua ko e fakafili ni a ia ha he lalolagi.