Tau Salamo

60 KO e Atua na e, ne tiaki e koe a mautolu, kua fakamavehevehe e koe a mautolu, ne ita a koe; kia liu mai foki a koe kia mautolu.

2 Kua lulu e koe e kelekele, ne ihiihi ai e koe; kia fakamaulu e koe hana tau maihi; ha kua luelue a ia.

3 Ne fakakite mai e koe e tau mena uka ke he hāu a motu; ne fakainu e koe a mautolu ke he uaina ke tauveli ai.

4 Kua foaki mai e koe e matini ma lautolu kua matakutaku kia koe, ke nikiti ki luga ha ko e mena tonu. Sila.

5 Kia laveaki a lautolu ne fakahelehele e koe; kia fakamoui mai e koe ke he hāu a lima matau, mo e fanogonogo mai kia au.

6 Kua vagahau mai e Atua ke he hana faituga, to fiafia ni au, to tufatufa e au a Sikema, ko e pahua a Sukota to fafati e au a ia.

7 Ha ha ia au a Kiliata, ha ha ia au foki a Manase, to eke foki a Efaraimo mo malolo he haku a ulu; ko e haku a tui ko Iuta foki ia;

8 Ko Moapi ko e haku a kapiniu holoholo ia; to lili atu e au haku afialoalohui ki Etoma; Filisitia na e, kia kalaga fiafia a koe he kautu a koe kia au.

9 Ko hai kia ke uta au ke he maga kua puipui? Ko hai kia ke takitaki leva au ki Etoma?

10 Nakai kia ko koe, ko e Atua na e, ne tiaki a mautolu, mo e nakai haele atu a koe, ma Atua na e, fakalataha mo e ha mautolu a kau?

11 Kia lagomatai mai a koe kia mautolu ke he matematekelea; ha kua nakai aoga e fakamouiaga mai he tau tagata.

12 Ko e Atua ni ke eke ai a mautolu mo tau toa; ha ko ia ni ke taholi ki lalo a lautolu kua fai fi kia mautolu.