Tau Salamo

80 KO e leoleo a Isaraela na e, kia fanogonogo mai a koe, ko koe ne takitaki a Iosefa tuga ne fuifui mamoe; ko koe ne haele ke he vaha he tau kerupi kia fakakikila mai a koe.

2 Kia fakalagalaga e koe hāu a malolo ki mua a Efaraimo, mo Peniamina, mo Manase, mo e haele mai ke fakamoui a mautolu.

3 Ko e Atua na e, kia fakamafoki mai e koe a mautolu, mo e fakakikila mai hāu a fofoga; ti momoui ai a mautolu.

4 Iehova na e, ko e Atua Sapaota, to ita a koe ke he tau liogi he hāu a tau tagata ato a fe?

5 Kua fagai e koe a lautolu ke he tau hihina mata ke eke mo mena kai, kua fakainu e koe a lautolu ke he tau hihina mata loga.

6 Kua eke a mautolu mo mena ke taufetoko ai a lautolu kua katofia mo mautolu; kua va mai foki kia mautolu a lautolu ne fai fi kia mautolu.

7 Ko e Atua Sapaota na e, kia fakamafoki mai e koe a mautolu, mo e fakakikila mai hāu a fofoga; ti momoui ai a mautolu.

8 Ne laga e koe e vine mai Aikupito; ne vega e koe e tau motu kehe, ti to ai ni e koe.

9 Ne fakaatā e koe e kelekele mo e vine ia, ne fakatotolo foki e koe hana tau vaka, kua puke ai e motu.

10 Kua maluia e tau mouga he hana malu; ko e hana tau la foki tuga ne tau arasi lalahi haia.

11 Kua fakaloa atu hana tau la ke he tahi, ko e hana tatupu kua hoko ia ke he vai lele.

12 Ko e heigoa e mena ne ulu ai e koe hana tau pa, kia tau ai hana tau fua e lautolu oti ne o he hala ia?

13 Kua moumou a ia he puaka mai he vao, kua kai foki a ia he tau manu totolo he vao.

14 Ko e Atua Sapaota na e, kia liu mai ni a koe; kia kitekite mai a koe mai he lagi, mo e fioia, mo e ahi e koe e vine nai;

15 Kia leveki foki e koe e mena ne to he hāu a lima matau, mo e tama foki ne fakamalolo e koe māu.

16 Kua huhunu ke he afi, kua hio ki lalo; kua mahaikava a lautolu he akonakiaga mai he hāu a tau fofoga.

17 Kia fakalago e koe hāu a lima ki luga he tagata he hāu a lima matau, ki luga he tama he tagata ne fakamalolo e koe māu.

18 Ti nakai mafoki kehe a mautolu ia koe; kia fakamoui e koe a mautolu, ti ui atu ai a mautolu ke he hāu a higoa.

19 Iehova na e, ko e Atua Sapaota, kia fakamafoki mai e koe a mautolu; kia fakakikila mai hāu a fofoga; ti momoui ai a mautolu.