Esekielu

12 KUA hoko mai foki kia au e kupu a Iehova, kua pehe mai,

2 Ko e tama he tagata na e, kua nofo a koe ke he magafaoa fakafualoto kua fai mata a lautolu ke kitekite ai, ka e nakai kitekite a lautolu; kua fai teliga ke fanogonogo ai, ka e nakai fanogonogo a lautolu, ha ko e magafaoa fakafualoto ni a lautolu.

3 Ko e mena ia, ko e tama he tagata na e, kia tauteute a e koe e tau mena māu ke fano ai a koe ke he paeaaga, mo e fano a koe he aho ki mua ha lautolu, ti fano kehe a koe he mena kua nofo ai a koe ke he taha mena ki mua ha lautolu na; pete ni ko e magafaoa fakafualoto a lautolu, kua manamanatu ai a lautolu.

4 To fetuku atu foki hau a tau mena he aho ki mua ha lautolu, tuga ne tau mena ke uta ke he paeaaga. Ti fano a koe he afiafi ki mua ha lautolu, tuga na lautolu kua o atu ke he paeaaga.

5 Kia keli a e kaupa ki mua ha lautolu mo e fetuku atu ai.

6 To fua e koe e tau mena ia ke he hau a fulima ki mua ha lautolu, mo e uta ai e koe he afiafi; ti ufiufi e koe hau a tau mata ke aua neke kitia e koe e kelekele; ha kua eke e au a koe mo fakamailoga ke he magafaoa a Isaraela.

7 Ti eke e au tuga ne poaki mai ai kia au, ne fetuku atu e au haku a tau mena he aho tuga ne tau mena ke uta ke he paeaaga; ti keli ai e au e kaupa he afiafi ke he haku lima; ne uta e au he pouli, mo e fua e au ke he haku fulima ki mua ha lautolu.

8 Ko e pogipogi ti hoko mai ai kia au e kupu a Iehova, kua pehe mai,

9 Ko e tama he tagata na e, nakai kia pehe mai kia koe e magafaoa a Isaraela, ko e magafaoa fakafualoto, Ko e heigoa kia ne eke e koe?

10 Kia pehe atu a koe kia lautolu, Kua pehe mai e vagahau he Iki ko Iehova, Ko e kavega hanai he iki i Ierusalema, mo e magafaoa oti a Isaraela ha ha ia lautolu.

11 Kia pehe atu a, Ko au nai ko e fakamailoga kia mutolu; tuga ne eke e au, to eke pihia kia lautolu; to o a lautolu, ko e tau tagata ne fofo he tau, ke he paeaaga.

12 Ko e iki foki ha ha ia lautolu, to fua mena a ia ke he hana fulima ke he pouli mo e fina atu, to keli e lautolu e kaupa mo e fetuku atu ai e tau mena to ufiufi ai e ia hana tau mata neke kitia ai e ia e kelekele ke he hana tau mata.

13 To fofola e au haku a kupega ki luga hana, to moua foki a ia ke he haku a matahele; ti ta mai ai a ia ki Papelonia ke he motu ko Kaletaia; ti mate ai a ia ka e nakai kitia e ia e motu.

14 To fakamavehevehe e au ke he tau matagi oti a lautolu oti ne agaagai ai ke lagomatai kia ia, katoa mo e hana tau kau oti; to aki foki e au e pelu ke mui atu kia lautolu.

15 Ti iloa ai e lautolu ko au ko Iehova, ka fakamavehevehe e au a lautolu ke he tau motu kehe, mo e fakapaea fano ai a lautolu ke he tau motu kehekehe.

16 Ka to toka e au ia lautolu e tau tagata tokogahoa mai he pelu, mo e hoge, mo e tatalu, kia talahau ai e lautolu e tau mena vihiatia oti ha lautolu ke he tau motu oti ke o a lautolu ki ai; ti iloa foki e lautolu ko au ni ko Iehova.

17 Kua hoko mai foki e kupu a Iehova kia au, kua pehe mai,

18 Ko e tama he tagata na e, kia kai a koe hau a tau mena kai mo e matakutaku, mo e inu, a koe hau a maga vai mo e vivivivi mo e fakaatukehe.

19 Kia pehe atu foki ke he tau tagata he motu, Kua pehe mai e vagahau he Iki ko Iehova kia lautolu kua nonofo i Ierusalema, mo e kelekele a Isaraela; to kai e lautolu ha lautolu a tau mena kai mo e fakaatukehe, mo e inu e lautolu ha lautolu a magavai mo e fakahahaku, kia eke ha lautolu a motu mo tau mena kua moumou kua mole atu e tau mena ne puke ai, ha ko e favale ha lautolu oti ne nonofo ai.

20 Ko e tau maga kakai to eke ia mo tau mena toka noa, to eke foki e motu mo tau mena kua moumou; ti iloa ai e mutolu ko au ko Iehova.

21 Kua hoko mai foki e kupu a Iehova kia au, kua pehe mai,

22 Ko e tama he tagata na e, ko e heigoa kia e kupu fakatai nai ha mutolu ke he motu a Isaraela, kua pehe mai, Kua fakaleleva e tau aho, kua teao e tau fakakiteaga oti ?

23 Ko e mena ia kia pehe atu a koe kia lautolu, Kua pehe mai e vagahau he Iki ko Iehova, To fakahiku ai e au e fakatai na, ti nakai tuai eke e lautolu e fakatai na i Isaraela; ka kia pehe atu kia lautolu, Kua tata mai e vaha, mo e hokoaga he tau fakakiteaga oti.

24 Ha ko e mena nakai tuai fai fakakiteaga fakateaga, mo e tau lagatau fakavai he tau taulaatua ke he magafaoa a Isaraela.

25 Ha ko au ko Iehova to vagahau atu e au, ko e kupu foki ke vagahau atu e au to eke ai ni, nakai tuai mule; ha ko e tau aho ha mutolu, ko e magafaoa fakafualoto na e, ke vagahau atu ai e au e kupu, mo e eke ai ni, kua pihia mai e Iki ko Iehova.

26 Kua hoko mai foki e kupu a Iehova kia au, kua pehe mai,

27 Ko e tama he tagata na e, kitiala, kua pehe mai e magafaoa a Isaraela, Ko e fakakiteaga ne kitia e ia, ma e tau aho a mui haia, kua perofeta foki ke he tau vaha ne mamao.

28 Ko e mena ia kia pehe atu a kia lautolu, Kua pehe mai e vagahau he Iki ko Iehova, Nakai tuai mule ha kupu taha haku; ka ko e tau kupu kua vagahau atu to eke ai ni, kua pihia mai e Iki ko Iehova.