Sakaria

5 TI haga hake foki au mo e kitia e au, kitiala, ko e tohi vakai kua lele.

2 Ti pehe mai a ia kia au, Ko e heigoa kia kua kitia e koe? Ti pehe age au, Kua kitia e au e tohi vakai kua lele; ko e hana loa ko e uafulu e kupita, ko e hana laulahi foki ko e hogofulu e kupita.

3 Ti pehe mai a ia kia au, Ko e kaialu hanai ko e fina atu ne fai ke he fuga kelekele oti ni; kia takitaha a lautolu oti kua kaiha mo e vega ai a ia he mena nai ke lata mo e tohi, ke takitaha oti foki kua omonuo mo e vega ai a ia he mena nai ke lata mo e tohi.

4 Kua pehe mai a Iehova Sapaota, To uta e au a ia; to hoko atu ni a ia ke he fale he tagata kaiha, mo e fale he tagata kua omonuo pikopiko ai ke he haku a higoa; to tumau ai ki loto he fale hana, to fakaoti ai foki e ia hana tau akau mo e hana tau maka.

5 Ti fina age ai e agelu ne vagahau ai a maua, kua pehe mai a ia kia au, Kia haga hake a a koe mo e kitekite po ke heigoa hana ne fina atu.

6 Ti pehe age au, Ko e heigoa kia hana? Ti pehe mai a ia, Ko e efa hana kua fina atu; ko e ha lautolu a tino mai hana ke he motu oti.

7 Kitiala, ko e taleni pili kua nikiti; ko e fifine foki hana kua nofo i loto he efa.

8 Ne pehe mai foki a ia, Ko e mahani kelea hana; ti liti e ia a ia ki loto he efa, mo e liti ai e ia e maka pili fafati mena ke he gutu he efa.

9 Ne haga hake foki au ti kitia ai e au, kitiala, ko e tau fifine tokoua ne o atu; ha ha i ai foki e matagi ke he tau tapakau ha laua, ha ko e mena fai tapakau a laua, po ke tau tapakau he kasita; ti ta hake ai e laua e efa ke he vaha he lagi mo e lalolagi.

10 Ti pehe age au ke he agelu ne vagahau ai a maua, Kua uta ki fe e laua e efa?

11 Ti pehe mai a ia kia au, Ko e uta ne fai e laua a ia ke ta ai e fale māna ke he motu ko Sinara; to fakatu ai a ia, mo e fakamau ai ke he mena ia ke he hana ni a tuaga.