Numera

30 TI vagahau atu a Mose ke he tau iki he tau magafaoa he fanau a Isaraela, kua pehe atu Ko e mena hanai kua poaki mai ai e Iehova,

2 Kaeke ke omonuo he tane ke he omonuo kia Iehova, po ke eke e omonuo ke lili aki a ia; aua neke tiaki e ia hana kupu, ka e eke ni e ia tuga ne tau mena oti ne to mai ai he hana gutu.

3 Kaeke foki ke omonuo he fifine ke he omonuo, ke lili aki a ia; ka ko e tamafine a ia kua nofo agaia ke he kaina he hana matua tane;

4 Kaeke foki ke logona hana matua tane hana omonuo, mo e mena ne lili ai e ia a ia, ka e fakamate hana matua tane kia ia, ti fakamoli ai e ia e tau mena oti ne omonuo ai e ia; ti fakamoli ai foki e tau mena oti kua lili ai e ia a ia.

5 Kaeke foki ke hataki hana matua tane a ia ke he aho ne logona ai, ti nakai, fakamoli ai ha mena he tau mena ia ne omonuo ai, mo e lili aki e ia a ia; ti fakamagalo ni e Iehova a ia, ha ko e mena hataki hana matua tane a ia.

6 Kaeke kua faitane a ia ti omonuo ai a ia, po ke vagahau fakahanoa ai a ia ke he mena ke lili aki a ia.

7 Ti logona hana tane, ka e fakamate ai a ia kia ia ke he aho ne logona ai, ti fakamoli ai e ia e mena kua omonuo ai a ia, mo e mena foki ne lili aki e ia a ia.

8 Kaeke foki ke hataki hana tane a ia ke he aho ka logona ai e ia, ti fakahui ai e ia e mena ne omonuo ai a ia, mo e mena ne vagahau fakatepetepe ai e ia ke lili aki e ia a ia; to fakamagalo foki e Iehova a ia.

9 Ka ko e tau omonuo he fifine takape, po ke fifine kua tiaki he hana tane, ko e tau mena oti ne lili aki e ia a ia to tumau ia kia ia.

10 Kaeke foki ke omonuo ai a ia ke he fale he hana tane, po ke lili aki e ia a ia ke he omonuo;

11 Ti logona ai hana tane, ka e fakamate a ia kia ia, nakai hataki atu e ia a ia, ti fakamoli ai e ia e tau mena oti ne omonuo ai a ia, ti fakamoli ai e ia e tau mena oti ne lili aki e ia a ia.

12 Kaeke foki ke hataki hana tane e tau mena ne omonuo ai a ia ke he aho ke logona ai e ia, ti nakai fakamoli ai e ia ha mena taha he tau kupu oti ne to mai he gutu hana, ke he tau mena ne omonuo, po ke tau mena ne lili aki e ia a ia, kua hataki hana tane e tau mena ia; to fakamagalo ai e Iehova a ia.

13 Ko e tau omonuo oti, katoa mo e tau omonuo oti ke lili aki ke fakamamahi ai e ia a ia, kua maeke ke he hana tane ke fakamoli ai, ti maeke foki ke he hana tane ke fakahui.

14 Ka ko e mena ka fakamate ni hana tane kia ia ke he taha aho mo e taha aho, ti fakamau ai e ia hana tau mena oti ne omonuo ai a ia, mo e tau mena oti ne lili aki e ia a ia; kua fakamau e ia e tau mena oti ia he fakamate ai a ia ke he aho ne logona ai e ia.

15 Ka kua mole atu foki he logona e ia e tau mena ia, ti fakahui ai fakamui e ia, ti ha ia ia ni e hala he fifine.

16 Ko e tau fakatufono haia ne poaki mai e Iehova kia Mose ke he tane mo e hana hoana; ko e matua tane foki mo e hana tama fifine, ka kua tamafine a ia ke he kaina he hana matua tane.