Isaia

15 KO e kavega a Moapi. Ko e po ne moumou ai a Aro i Moapi, ne fakaoti ai ni; ko e po ne moumou ai a Kira i Moapi, ne fakaoti ai ni.

2 Kua o hake a lautolu ke he fale katoa mo Tipona, ko e tau mena tokoluga ke tagi ai; kua fakatutu a Moapi ki luga a Nepo mo Metipa; kua hifipuga ha lautolu a tau ulu oti, kua hifi e tau hafe oti.

3 Kua felevehi a lautolu ke he ie talatala ke he ha lautolu a tau puhala, kua fakatutu a lautolu oti ni ki luga ha lautolu a tau fale ke he ha lautolu a tau male foki; kua o hifo a lautolu mo e tagi.

4 Kua tagi a Hesepona mo Eleale; kua logona ha lautolu a leo mai Iaesa; ko e mena ia ne kalaga ai e kau a Moapi; kua mamahi lahi ni ha lautolu a tau loto.

5 Kua tagi haku a loto ha ko Moapi; kua hohoko ha lautolu a tau tagata ne tutuli ki Soara, ki Ekelata-salisia; kua o hake ai a lautolu he matiketike ki Luhita mo e tagi; kua tagi hake a lautolu ke he puhala ki Horonaima ha ko e ha lautolu a malaia.

6 Kua eke e vai i Nimara mo mena talue; ha kua fifigo e motietie, kua fakaoti e vao mui, nakai ni toe ha lau kou.

7 Ko e mena ia kua uta kehe ai e lautolu e tau mena ne toe he ha lautolu a tau mena ne moua, katoa mo e ha lautolu a tau koloa ne toka ai, ke he fahi atu he vailele he tau garava.

8 Ha kua takai ai he tagi he tau katofia a Moapi; kua hoko ha lautolu a fakatutu ki Ekelaima, kua hoko foki ha lautolu a fakatutu ki Pere-alima.

9 Ha kua puke ai e vai i Timone ke he toto; ha ko e mena to fakahoko atu foki e au ki Timone falu a malaia ne toe; to fakafano atu e au e leona kia lautolu kua hao i Moapi mo lautolu kua toe ke he kelekele.