Iosua

20 KUA vagahau mai foki a Iehova kia Iosua, kua pehe mai,

2 Kia vagahau atu ā koe ke he fanau a Isaraela, kia pehe atu, Kia kotofa ā e mutolu e tau maga ke eke mo tau huaga ma mutolu, tuga ne vagahau atu ai e au kia mutolu ia Mose,

3 Kia hola ki ai a ia kua keli tagata, ko ia kua keli totamaki taha tagata, kua eke mo e nakai iloa, to eke ia mo tau huaga ma mutolu mai he tagata kua eke ke lukutoto.

4 Ko ia foki kua hola atu ke he taha he tau maga ia, mo e tu a ia ke he mena ke hu atu ai ke he gutuhala he maga, mo e vagahau atu e ia hana tau kupu ke he tau patu he maga ia; ti talia ai e lautolu a ia ke he maga, mo e tuku atu e lautolu kia ia e mena ke nofo ai a ia fakalataha mo lautolu.

5 Kaeke foki kua tutuli atu kia ia he tagata kua eke ke lukutoto, nakai tuku atu e lautolu a ia kua keli tagata ke he hana lima; ha kua keli e ia a ia ne katofia mo ia mo e nakai iloa; ka e nakai fai fi tuai a ia kia ia.

6 Ti nofo ai a ia ke he maga ia, ato tu ai a ia kia mua he fakapotopotoaga ke fakafili ai a ia, ato mate e ekepoa ne mua ha ha i ai ke he vaha ia; ti liu atu ai a ia ne keli tagata, mo e fina atu ke he hana maga, mo e hana fale, ko e maga ni ne hola mai ai a ia.

7 Ti fakatapu ai e lautolu a Katesa i Kalilaia, ke he mouga ko Nafatali, mo Sikema ke he mouga ko Efaraimo, mo Kiriata-arapa, ko Heperona haia, ke he mouga a Iuta.

8 Ko e fahi atu foki a Ioritana ke he fahi uta a Ieriko, ne tuku atu ai e lautolu a Peseri ke he tutakale, ke he kelekele tatai he magafaoa a Reupena; mo Ramota i Kiliata, he magafaoa a Kato; mo Kolani i Vasana, he magafaoa a Manase.

9 Ko e tau maga ia ne kotofa ai ma e fanau a Isaraela oti, mo e tagata kehe kua nofo ia lautolu, ke hola ki ai a ia kua keli taha tagata mo e nakai iloa, kia nakai mate a ia ke he lima he tagata kua eke ke lukutoto, ato tu ai a ia ki mua he fakapotopotoaga.