Iosua

16 KO e tufaaga he fanau a Iosefa kua kamata mai Ioritana ne tata age ki Ieriko, ke hoko atu ke he vai i Ieriko ke he fahi uta, ke he tutakale ne hake i Ieriko ke he mouga ko Peteli;

2 Ti fina atu i Peteli ki Lusa, mo e fina atu ke he katofia a Araki-atarota;

3 Ti hifo ke he fahi lalo ke he katofia a Iafeleti, ke hoko atu ke he katofia a Petehorona i lalo, mo e hoko atu ki Kasera; ka ko e hana liuga ko e tahi haia.

4 Ti moua ai he fanau a Iosefa, ko Manase mo Efaraimo ha lautolu a tufaaga.

5 Ko e katofia foki hanai he fanau a Efaraimo, ke lata mo e ha lautolu a tau magafaoa; ko e katofia he tufaaga ha lautolu ke he fahi uta ko Atarota-atara, ke hoko atu ki Petehorona ki luga.

6 Ti fina atu ai e katofia ke he tahi ki Mekemeta ke he fahi tokelau; ti afe age e katofia ki uta ki Taana-sailo, mo e fina atu ai ke he fahi uta ki Ianoka;

7 Ti hifo i Ianoka i Atarota mo Naarata, mo e hoko atu ki Ieriko; ti hiku atu ai i Ioritana;

8 Kua fina atu e katofia i Tapua ke he fahi lalo ke he vailele ko Kana; ko e hana liuaga ko e tahi haia. Ko e tufaaga haia he magafaoa he fanau a Efaraimo, ke lata mo e ha lautolu a tau magafaoa.

9 Ko e tau maga foki ne vevehe kehe ai ma a fanau a Efaraimo ha ha i loto he tufaaga he fanau a Manase, ko e tau maga oti mo e ha lautolu a tau kaina he magahehala.

10 Nakai vega e lautolu e tau tagata Kanana kua nonofo i Kasera; ka e nonofo e tau tagata Kanana fakalataha mo e tau tagata Efaraimo ke hoko mai ke he aho nai, ka e eke a lautolu mo tau tupa.