Ko e Gata Apa Kula

KO E gata mooli nakai a na ne viko he akau? Nakai. Ko e gata ne talaga mai he apa kula. Ne tala age a Iehova ki a Mose ke tuku hake ai ki luga he akau ke maeke he tau tagata ke kitekite ki ai ti momoui ni. Ka ko e tau gata mooli ha he fuga kelekele. Kua gagao e tau tagata he gagau e lautolu. Iloa nakai e koe ko e ha?

Ha kua fai kupu atu e tau Isaraela ke he Atua mo Mose. Ne gugū a lautolu: ‘Ko e tamai he ha e mua a mautolu i Aikupito ke mamate he tutakale nei? Nakai fai mena kai po ke vai hinei. Ti nakai fia kai a mautolu he manai nei.’

Ka ko e mena kai mitaki e manai. Ne foaki fakamana e Iehova ma lautolu. Ti foaki age fakamana foki e ia e vai ma lautolu. Ka kua nakai loto fakaaue e tau tagata ke he puhala ne leveki he Atua a lautolu. Ti fakafano mai e Iehova e tau gata gagau vevela nei ke fakahala e tau Isaraela. Ne gagau he tau gata a lautolu, ti tokologa ia lautolu ne mamate.

Fakahiku ai ne o mai e tau tagata ki a Mose mo e pehē: ‘Kua agahala tuai a mautolu, ha kua fai kupu atu a mautolu ki a Iehova katoa foki mo koe. Liogi ki a Iehova ke utakehe e tau gata nei.’

Ti liogi a Mose ma e motu. Ati tala age a Iehova ki a Mose ke tālaga e gata apa kula nei. Pehē a ia ke tuku hake ai he akau, ti ko e ha tagata ka gagau kua lata ke kitekite ki ai. Ne taute ni e Mose e mena ne talahau he Atua. Ti ko e tau tagata ne gagau kua kitekite atu ke he gata apa kula ti liu a lautolu malolō.

Kua fai fakaakoaga ke ako mai he mena nei. Ko tautolu oti kua tuga e tau Isaraela na ne gagau he tau gata. Ko tautolu oti ha ha he tuaga he mate. Onoono viko la, to kitia e koe e tau tagata kua fuakau, gagao, ti mamate. Kua pihia e mena nei ha ko e tagata taane mo e fifine fakamua, ko Atamu mo Eva, ne fuluhi kehe mai ia Iehova, ti ko tautolu oti ko e tau fanau ha laua. Ka kua taute e Iehova e puhala ke maeke ia tautolu ke moua e moui tukulagi.

Ne fakafano mai e Iehova e Tama haana ko Iesu Keriso ke he lalolagi. Ne tautau a Iesu he akau, he manatu e tau tagata tokologa ko e tagata kelea a ia. Ka kua foaki mai e Iehova a Iesu ke fakamomoui a tautolu. Ka kitekite a tautolu ki a ia mo e ka mumui a tautolu ki a ia, ti maeke a tautolu ke moua e moui tukulagi. Ka e to fakaako a tautolu ke he mena nei he tau vala i mua.