Ko e Fakapotopotoaga Kerisiano he Senetenari Fakamua

He Penetekoso he 33 V.N., ne liligi hifo e agaga tapu ki luga he tau tutaki a Iesu ne toko 120, mo e kamata a lautolu ke vagahau ke he tau vagavagahau loga hagaao ke he tau mena homo ue atu he Atua. Ko e fakaveaga a nei he fakapotopotoaga Kerisiano. Kua hagaao ke 3,000 e tau tutaki fou ne papatiso he aho ia.—Gahua, veveheaga 2.

Ne tupu e numela he tau fakapotopotoaga he tau matakavi kehekehe he fakatumau e tau aposetolo mo e falu ke vagahau e Kupu he Atua mo e loto malolo. Ne tuga e mena ne fakamau i loto he tohi a Gahua, kua nakai leva ne folafola atu e gahua fakamatala ke he fahi a Metiteraneani, mai i Papelonia mo Aferika Tokelau ki Roma mo e liga ki Sepania.—Roma 15:18-29; Kolose 1:23; 1 Peteru 5:13.

Ke he ha mena kua eke e tau tagata mo tau tutaki, ko lautolu nai ne fakatu hake e tau fakapotopotoaga. Ne kotofa e tau tagata tane kua lata mo tau momotua, po ke tau leveki, ke fakatumau e tuaga he fakaakoaga tonu mo e tau mahani i loto he tau fakapotopotoaga. Ka e nakai eke a lautolu mo vahega fekafekau lotu; ko e tau fekafekau a lautolu mo e tau faoa gahua auloa ma e Kautu he Atua.—Gahua 14:23; 20:28; 1 Korinito 3:5; 5:13; Kolose 4:11; 1 Timoteo 3:1-15; Heperu 13:17; 1 Peteru 5:1-4.

Ko e tau aposetolo mo e falu ne gahua fakatata auloa ne fekafekau mo kau fakatufono. Ne taute e lautolu e takitakiaga ke he gahua fakamatala. Ne fakatonu e lautolu e tau mena vihi i loto he fakapotopotoaga i Ierusalema. Ne fakafano atu e lautolu e tau matakainaga tane kua lata ki Samaria mo Anetioka ke fakamalolo e tau tagata tali tonu fou i ai. Ne fakahako e lautolu e taufetoko hagaao ke he peritome, he fakafano atu ha lautolu a fifiliaga ke he tau fakapotopotoaga oti ke omaoma ki ai. Ka e nakai ko e tau iki e tau tagata tane nei ki luga he falu ka ko e tau fekafekau mo e tau faoa gahua auloa he fakapotopotoaga katoa.—Gahua 4:33; 6:1-7; 8:14-25; 11:22-24; 15:1-32; 16:4, 5; 1 Korinito 3:5-9; 4:1, 2; 2 Korinito 1:24.

Ko e tau tutaki fakamua ne iloa ai ko e tau Kerisiano, ne ui ai pihia mai he takitaki fakaatua. Ne fai fakaakoaga foki a lautolu ne fakahekeaki a lautolu; ne ui e tau mena nei ko e fakaakoaga he tau aposetolo, po ke fakafifitakiaga he tau kupu malolo mitaki. Kua iloa foki e tau fakaakoaga he Tohiaga Tapu nei ko e kupu moli.—Ioane 17:17; Gahua 2:42; 11:26; Roma 6:17; 1 Timoteo 4:6; 6:1, 3; 2 Timoteo 1:13; 2 Peteru 2:2; 2 Ioane 1, 4, 9.

Ko e fakalatahaaga he tau matakainaga he lalolagi katoa a lautolu ne fefakalatahaaki ke he fakaalofa. Ne fakakite e lautolu e fiafia pauaki ke he tau faoa tali tonu ha lautolu he falu motu. Ka o fenoga a lautolu ke he tau motu kehekehe, ne fiafia e tau faoa tali tonu ke fakafeleveia a lautolu ke he tau kaina ha lautolu. Ne fakatumau e lautolu e puhala tokoluga he mahani mitaki, ha ko e tau tagata tapu ne vevehe kehe mai he lalolagi. Ne toka loto lahi e lautolu e magaaho he aho he ha ha hinei a Iehova mo e taute fakamakutu lahi e fakapuloaaga ke he tau tagata ha lautolu a tua.—Ioane 13:34, 35; 15:17-19; Gahua 5:42; 11:28, 29; Roma 10:9, 10, 13-15; Tito 2:11-14; Heperu 10:23; 13:15; 1 Peteru 1:14-16; 2:9-12; 5:9; 2 Peteru 3:11-14; 3 Ioane 5-8.

Ka e pete ni ia, tuga ne talahau tuai mai, kua kamata ke tupu e tiakiaga he taofiaga, he senetenari ke ua mo e tolu aki. Ko e fua ne moua mai ne tutupu e tau fakatokaaga he tau lotu lalahi kua nakai fakatumau e tau tuaga mea he fakapotopotoaga Kerisiano hagaao ke he fakaakoaga, tau mahani, mo e fakatokatokaaga, mo e tau tutuaga hagaao ke he lalolagi.—Mataio 13:24-30, 37-43; 2 Tesalonia, veveheaga 2.

Ka kua talahau tuai mai e Iesu, to maeke ai ke liu fakafou e tapuaki moli he vaha fakahiku he fakatokaaga nei. Kua tali tonu e Tau Fakamoli a Iehova kua maeke ke kitia e liu fakafou nei i loto he tau gahua he lalolagi katoa ha lautolu he vaha ha tautolu, kua hagaao ke 1,900 e tau tau he mole mai he perofeta e Iesu. To fakamaama mai he tau lau tohi ne mumui mai ko e ha.

• Ne fakave fefe e fakapotopotoaga Kerisiano mo e tupu fefe?

• Ne takitaki fefe e fakapotopotoaga ia?

• Ko e heigoa e tau mena ne fakakehe maaliali e tau Kerisiano he senetenari fakamua?

[Mepe he lau 7]

(Ma e puhala katoa ne tohi aki, kikite e tohi)

Tahi Uli

Tahi Kasepiani

Tahi Lahi Mahaki

Ava Pesia

Tahi Kulaa

Tau matakavi ne hoko e tala mitaki ki ai he senetenari fakamua

ITALIA

Roma

HELENI

MELITA

KERETA

KUPERU

PATUNIA

KALATIA

ASIA

KAPATOKIA

ILURIKO

SURIA

ISARAELA

Ierusalema

MESOPOTAMIA

Papelonia

Kua eke e falu tagata he tau matakavi nei mo tau tagata tali tonu

KILIKIA

METAI

PARETIA

ELAMA

ARAPI

LIPUA

AIKUPITO

AITIOPE

[Tau Fakatino he lau 7]

Ne fakamatala he tau Kerisiano fakamua e Kupu he Atua mo e loto malolo

Kua fiafia e tau faoa tali tonu ke fakafeleveia e tau Kerisiano ke he tau kaina he tau mena ne o fenoga a lautolu ki ai