Veveheaga 6

Ko e Tama ne Mavehe

NAKAI liliu ki Nasareta a Iosefa mo Maria ka e nonofo hifo i Petelehema. Ko e magaaho ne valu e aho ne fanau a Iesu, ne peritome e laua a ia, ke lata mo e Fakatufono he Atua ne poaki ki a Mose. Ko e aga mo e mahani foki ke fakahigoa e tama tane ke he aho ke valu aki. Ko e mena haia ne fakahigoa e laua e tama ko Iesu, tuga he talahau fakamua he agelu ko Kaperielu.

Molea e taha e mahina he mole, kua 40 e aho he motua a Iesu. Uta he tau matua hana a ia ki fe he magaaho nei? Ke he faituga i Ierusalema, ne gahoa ni e tau maila he mamao mo e mena ne nonofo ai a lautolu. Ke lata mo e Fakatufono he Atua ki a Mose, ka mole 40 e aho he fanau mai e tama tane, kua lata he matua fifine ke foaki e poa he fakameaga ke he faituga.

Ko e mena haia ne taute e Maria. Ko e hana a poa, ne uta e ia ua e manu lele ikiiki. Ne fakakite he mena nei e tuaga he tau mena moua ha Iosefa mo Maria. Ne talahau mai he Fakatufono a Mose ko e punua mamoe tane, ne mua atu e uho ke he tau manu lele, ka foaki. Kaeke ke nakai maeke he matua fifine e mena nei, ua e kulukulu po ke ua e lupe ka lata ai.

I loto he faituga ne toto he fuakau tane a Iesu ke he hana tau lima. Ko e hana higoa ko Simeona. Ne fakakite he Atua ki a ia to nakai mate a ia ato kitia e ia e Keriso, po ke Mesia ne mavehe mai e Iehova. Ne hau a Simeona ke he faituga he aho ia, ne takitaki he agaga tapu a ia ke he tama ne ta mai e Iosefa mo Maria.

Ha ne toto e Simeona a Iesu, ne fakaaue a ia ke he Atua, pehe: “Ko e Iki Pule Katoatoa na e, kua tuku atu ainei e koe hau a fekafekau kia fano mo e monuina, tuga hau a kupu; ha kua kitia tuai he haku a tau mata e fakamouiaga mai ia koe; ne taute e koe i mua he tau motu oti kana; ko e maama ke fakamaama aki e tau motu kehe mo e lilifu he motu hau ko Isaraela.”

Ne ofo a Iosefa mo Maria he logona e mena nei. Ne fakamonuina e Simeona a lautolu mo e pehe ki a Maria ko e hana a tama tane “ke veveli ai mo e liu tutu ai foki e tokologa i Isaraela” mo e fakaatukehe, tuga e matila he pelu, ka hoka hana a tino.

Ha ha i ai foki ke he mena ia e perofeta fifine 84 e tau tau he motua ko Ana. Ko e moli, ne nakai to ha aho he fano a ia ke he faituga. Ke he tula tonu ia he hau fakatata mai a ia mo e kamata fakaaue ke he Atua mo e vagahau hagaao ki a Iesu ki a lautolu oti ne fanogonogo.

Ko e fiafia lahi ha ia ha Iosefa mo Maria ke he tau mena oti ne tutupu he faituga! Ko e moli, ko e tau mena oti nei ke fakamoli ki a laua ko e tama ko Ia ne Mavehe mai he Atua. Luka 2:​21-38; Levitika 12:​1-8.

▪ Ko e magaaho fe ne fa mahani mo e aga ke fakahigoa e tama tane Isaraela?

▪ Ko e heigoa kua lata ke taute he matua fifine Isaraela ka 40 e aho he hana a tama tane, mo e fakakite fefe he fakamoliaga he mena nei kua lata, e tuaga moua mena ha Maria?

▪ Ko hai ne mailoga a Iesu ke he magaaho ia, mo e fakakite fefe e laua e mena nei?