Tau Huhu Mai he Tau Tagata Totou
Ko e ha ne fakafano atu e Noa mai he vaka e oreva ato ko e lupe?
Ne nakai mai he Tohi Tapu e fakamaamaaga fakamatafeiga. Ka e pete ni, kua ha ha i ai e fakapapahiaga mitaki he puhala a Noa.
Ke he 40 e tau aho mo e 40 e tau po, ne kua iloa tuai he lalolagi e lofiaaga he uha ne to, kua tupu ai e fakapuke kua ufia foki e tau tapunu he tau mouga ke he lima e tau mahina. He mogoia, “ti tu ai e vaka ki luga he tau mouga a Ararata.” (Kenese 7:6–8:4) He tau mahina fakamui, he mole atu he “kitia ai e tau tapunu mouga,” ne “fakafano atu e” Noa “e oreva; kua lele atu a ia mo a tafeliuaki.”—Kenese 8:5, 7.
Ko e ha ko e oreva? Kua malolo e manu lele nei he lele, mo e kua laulahi e tau mena kai kehekehe kua maeke ke kai, fakalataha mo e kakano mate foki. Kua liga fakafano atu e Noa e oreva ke kitia po kua to liu mai nakai po ke to nofo kehe mai he vaka, liga he kai mai e tau gati tino ne toe ne tokanoa he mamiti hifo e tau vai mo e kitia ai e kelekele. Ka e taha e mena, kua nakai nofo kehe e oreva. Kua pehe e Tohi Tapu ne liu atu ni, ka kua nakai pehe ko e liu atu ki a Noa. Kua liga ne liu atu ke okioki i luga he vaka he tau magaaho ato lele kehe ke kumi mena kai ne hili i luga he vai ne puke agaia.
He magaaho fakamui, ne fifili e Noa ke fakafano atu e lupe. He totou e tautolu: “Ka e nakai moua he lupe ha mena ke tu ai hana hui, ti liu mai ai a ia kia ia ke he vaka.” (Kenese 8:9) Kua talahau mai he mena nei ke he hana ni a puhala, kua maeke ai ke fakaaoga e lupe ke fifili po kua mamiti hifo nakai e tau vai he fakapuke. Ne lahi e falanakiaga ne fakakite he tau lupe ke he tau tagata. Ti kua maeke ai a Noa ke amaamanaki ko e to liu mai ni e lupe, nakai ni ke okioki i luga he vaka, ka e ki a Noa.
Ne fa pehe ai ne okioki ni e tau lupe i luga he kelekele momo, kua iloa ai ko e fa lele tokolalo lahi he tau matakavi fonua tatai, ke kai e tau lakau. (Esekielu 7:16) Ti kua mailoga ai he Grzimek’s Animal Life Encycopedia (Tohi Fakamaama Moui Manu a Grizmek): “Ha kua moli ne kai he tau kulukulu mo e tau lupe e tau tega lakau mo e tega akau, ti kua uka lahi ke kumi kai he magaaho ka molea e aho taha he ufitia tumau he sino [po ke vai], ha kua loga lahi ha lautolu a tau mena kai ne toka i luga he fuga kelekele.” Ti ko e lupe kua liga to tamai ki a Noa e falu a fakamoliaga kua moua e ia e kelekele momo po ke tau akau tuputupu. He magaaho fakamua ne fakafano atu e Noa, ne liu atu ni e lupe ki a ia i loto he vaka. Ko e magaaho ke ua aki, ne liu atu e lupe mo e lau olive. Ko e magaaho ke tolu aki, ne nakai liu atu, ti kua tuku age ai ni e fakamoliaga kua maeke mo e kua haohao mitaki a Noa ke toka e vaka.—Kenese 8:8-12.
Kua liga ne manamanatu e falu ko e tau mena noa e tau mena fakamatafeiga nei, he moli ai ni kua hakotika lahi e fakamauaga, ka e nakai lali fakamakamaka ke taute e tau fakamaamaaga katoatoa, ti kua ata mai ai e tonuaga ke falanaki ke he Tohi Tapu. Kua tuku mai ki a tautolu e falu kakano ke talia ko e nakai ko e tala taute noa po ke taute tala, e fakamauaga ka kua hako tonu moli. Ha kua nakai ha ha i ai e tau mena loga fakamatafeiga mo e tau fakamaamaaga kua fakahaha ai tuai ke he tau mena fia manamanatu ki ai kua liga amamanaki e tau Kerisiano fakamoli ke huhu ki a Noa he magaaho ka liu tu mai a ia mo e kua maeke ai ke fakamaama e ia ko e ha mo e kakano he tau mena ne taute e ia.—Heperu 11:7, 39.