Hokotaki he Tau Tagata Fakapuloa he Kautu

‘Heleheleaga’ i Venesuela

Ke he taha magahala ne fakatatai e Iesu e gahua fakamatala ke he heleheleaga he tau. (Mataio 9:36-38) Ko e Takitaki he heleheleaga ko e Atua ko Iehova, mo e ko e heleheleaga kua lahi mahaki moli he viko takai he lalolagi oti. Ti putoia ai foki he mena nei e maaga fa lavea ke gahua i Venesuela.

Ne hokotaki he la ofisa he Kau Fakalatahaaga Kolo Toko e mena ne tupu he magaaho ne gahua e matakau he Tau Fakamoli he maaga ko Sabana Grande, Fahi Motu Guárico. Ne fakamaama he Tau Fakamoli: “Ko e fale ne kua nonofo ai a mautolu ko e kaina mitaki ke taute e tau fakalatahaaga, ti fakamafiti ai a mautolu mo e kamata ai ke uiina e tau tagata ke he fakalatahaaga ia. Ne nakai iloa he tau tagata ha Fakamoli a Iehova. He kua ha ha i ai fa e tau matakau gahua fakaevagelia he taone, ne kua fiafia lahi e tau tagata ke fakaako mai he Tohi Tapu.

“Ne gahua a mautolu tolu e tau tula he mogo pogipogi mo e tolu e tau tula he magaaho pale la, ahiahi atu ke he taha fale mo e taha fale ke uiina e tau tagata ke he fakalatahaaga he po hake. Ne nakai fai nofoa a mautolu, ti uiina e mautolu a lautolu ke ta mai ne lautolu ha lautolu a tau nofoa. He magaaho ne taute e fakalatahaaga ke kamata, ne kamata e tau tagata ke o mai fakahaga, takitaha mo e nofoa ne toto. He magaaho ne oti e fakalatahaaga, ne tala age a mautolu ki a lautolu kua manako a mautolu ke tohi hifo e tau higoa ha lautolu kua manako ke fakaako Tohi Tapu ke he kaina nakai fai totogi. Toko 29 e katoatoa ha lautolu ne o atu kua manako oti ke tuku hifo he fakamauaga.

“Ti ko e magaaho ke pa ai e mautolu e gutuhala he tagata fakahiku, ne mailoga ai e mautolu ko e toko tolu e tagata tane ne tutu he matapotu he fale. Hagaao atu ke he hola hiva, kua mau a mautolu ke nonofo ke kai he mogoia ne tukituki mai e lautolu e gutuhala. Ne huhu e lautolu e tau huhu tuga: ‘Ko e heigoa e fakamatala nei ne taute e mutolu he taone? Ma e kakano fe ne fai fakalatahaaga a mutolu i hinei he po nei?

“Ne huhu a mautolu kua moumou ke mautolu ha fakatufono. Ne tali mai a lautolu nakai mo e talahau ko lautolu ko e tau akoako he tolu e tau tapu fakaevagelia he taone. Kua tupetupe lahi a lautolu ha kua gatigati e tau fale tapu ha lautolu he afiafi ia. Ne uiina atu e mautolu a lautolu ki loto mo e fakamaama e gahua ha mautolu. Ne foaki age foki e mautolu falu tohi ki a lautolu mo e tala age ki a lautolu ke liliu mai he Aho Tuloto hake.

“Ko e Aho Tuloto hake ne liliu mai e tau akoako mo lautolu toko 22 foki ne kua manako ke logona e mena ka talahau e mautolu. Kua manamanatu e tau akoako, ha ko e tau fifine, to nakai maeke a mautolu ke tatai mo lautolu ka fakatutala. Ka e moha ia, kua kautu e fakalatahaaga ke he ha mautolu a onoonoaga. He magaaho fakamui ne fakamaama e mautolu kua taute e mautolu e fakamauaga ia lautolu ne manako ke fakaako lahi atu mai he Tohi Tapu. Ko e numela he tau tagata ne o mai fakalataha mo e akoako kua manako foki ke fakamau ha lautolu a tau higoa, mo e falu kua pehe foki kua fia manako a lautolu ke o mo mautolu he gahua fakamatala!

“Ne fakamaama e mautolu kua lata a lautolu ke ha ha i ai lahi e iloilo faka-Tohi Tapu mo e fakaako fakamua to fakalataha mo mautolu ke he gahua fakamatala. He tau aho oti kua o mai e tau tagata ke he fale, huhu ki a mautolu ke fakamaama age ki a lautolu e Tohi Tapu. Falu magaaho, ne fa tutala a mautolu ti teitei ke tuloto e po, ti fa tala age a mautolu ki a lautolu ke o ki kaina. He magaaho ke toka e mautolu e maga, ne momoko lahi a lautolu mo e talahau ki a mautolu ka liliu mai a mautolu, to o a lautolu mo mautolu ke he gahua fakamatala. Ne mavehe a lautolu he magaaho ia liga to fai tolomaki ki mua a lautolu.”

Ke he magaaho ne toka he Tau Fakamoli e maga, ne ha ha i ai toko 40 e tau tagata ne kua manako ke fakaako e Tohi Tapu. Ko e tau higoa he tau tagata fiafia nei kua age ke he fakapotopotoaga tata mai, ne kua teitei ai ke 50 e kilomita he mamao. Ke he magaaho fakamui, falu he Tau Fakamoli mai he taha taone lahi kua hiki atu ke he loto taone nei, mo e ko e vahega he tau tagata fakamatala fakamakutu kua fakatu ai.