Kua Vela Nakai e Vao Uhi ia Koe?

NAKAI, he talahau e koe. Ka e fakatali la! Liga kua taute pihia e koe. Kia fanogonogo la ke he tau kupu he tutaki ko Iakopo: “Kua pihia foki e alelo, ko e mena tote a ia, ka e hula ke he tau mena lalahi. Kitiala, ko e tau akau loga kua tugi he afi tote.”​—Iakopo 3:5.

Ko e alelo ko e alaga aoga lahi ke vagahau ka e fa hehe lahi ha, e puhala ne fa fakaaoga aki! Kua fakaaoga he tau tagata e alelo ke pikopiko mo e fatipiko. Kua fakaaoga e lautolu e mena ia ke tokutoku kelea e falu, moumou ha lautolu a higoa mitaki, mo e kaiha halahu mai ia lautolu. Kua fakaaoga he tau tagata fakaohooho miha e alelo ke fakalagalaga aki e totokoaga ke he fakatufono. Ne fakaaoga e Adolf Hitler hana alelo ke omoomoi aki e motu ke he felakutaki​—ko e ‘vao uhi kua vela’ moli!

Kua maeke foki ni a lautolu ne mitaki e omoiaga he loto ke fakatupu ai e ‘vao uhi ke vela.’ Ne talahau nakai e koe e taha mena ti tokihala agataha mo e manatu na kua nakai talahau e koe mena ia? Kaeke kua pihia, kua maama ai e koe e kakano ia Iakopo he magaaho ne pehe a ia: “Ka ko e alelo, kua nakai maeke ia taha ke fakaako ia.”​—Iakopo 3:8.

Ka e pete ni ia, kua maeke ia tautolu ke lali ke fakaaoga ha tautolu a alelo ma e mitaki. Ke tuga e salamo, kua maeke ia tautolu ke talahau mai he loto mauokafua: “To fakaeneene e au ke he haku a mahani, neke hala au ke he haku alelo.” (Salamo 39:1) Kia kehe ai he nakai tokutoku kelea e falu, kua maeke ia tautolu ke lali ke atihake a lautolu. Kia kehe ai he nakai fatipiko ke he tau tagata, kua maeke ia tautolu ke vagahau mitaki ki a lautolu. Ka e kehe ai he nakai kaiha fakahalahu mo e fakavaia, kua maeke ia tautolu ke vagahau e kupu moli mo e fakaako atu. Ka omoi he loto mitaki, kua maeke he alelo ke vagahau e tau kupu ofoofogia kua fakamaulu. Ne fakaaoga e Iesu hana alelo ke he puhala homo ue atu he fakaako atu ke he tau tagata e fakamouiaga.

Kua moli, “ko e mate mo e moui kua toka ai ia ke he pule he alelo.” (Fakatai 18:21) Ko e fakahokoaga mate kia hau a alelo po ke foakiaga he moui? Kua fa kamata kia ‘e vao uhi ke vela’ po kua tamate ai a lautolu? Ne liogi e salamo ke he Atua: “Kia tali atu haku alelo ke he hāu a vagahau, ha kua tonu hāu a tau poaki oti kana.” (Salamo 119:172) Kaeke ke fakagahua e tautolu e aga manamanatu he salamo, to fakaaoga e tautolu foki ha tautolu a tau alelo ma e mitaki.

[Fakatino Credit Line he lau 32]

Ata he U.S. Forest Service