Ko e Ha ne Monuina e Tau Tagata Mahani Kelea?
“KO E heigoa kia e mena ne momoui ai e tau tagata mahani kelea?” Ko e huhu nei kua leva e huhu he tagata tua fakamoli ko Iopu, mo e kua liu ai fatiaki lagaloga tali mai he vaha hana. Ti kua tuga kua ha ha i ai he tau manamanatuaga he tau tagata tokologa he fahi motu fakamua ko Iukosolavia (tuga e fifine ne fakakite he kili tohi ha tautolu) ne maanu ki a lautolu ne matematekelea he felakutaki kelea. Ko e ha e tau tagata mahani kelea ne hao ai mo e monuina foki? Tuga he kitia e Iopu, fa mahani “kua monuina e tau fale ha lautolu nakai fai mena ke matakutaku ai a lautolu, nakai ha i ai foki ki luga ha lautolu e akau he Atua.”—Iopu 21:7, 9.
Kakano ka e mena nei kua nakai fai aoga ke fekafekau ke he Atua, fakaalofa ke he katofia he taha, mo e fakamamao mai he taute mena hehe? Nakai pihia! Kua foaki mai he Tohi Tapu ki a tautolu e onoonoaga hako he magaaho ne talahau ai: “Ua lali ke molea atu he tau tagata mahani kelea po ke fakatatai ki a lautolu ne taute mena hehe. Ha ko e mena tuga e motie to fifigo mafiti a lautolu, mo e maaki tuga e lanu laufuti he vaha tau tupu. Falanaki ke he IKI mo e taute e mitaki.”—Salamo 37:1-3, The New English Bible.
E, ko e monuina maaliali he tau tagata mahani kelea ko e mena fakaku. Moli ni, ko e ha lautolu a tau momoui kua ku lahi, ka ko lautolu ne fekafekau ke he Atua kua ha ha i ai e amaamanakiaga ue atu ma e vaha i mua. Tata lahi, to fakamoli e maveheaga he Atua: “To holoholo kehe he Atua e tau hihina mata oti mai he tau mata ha lautolu; ti nakai tuai fai mate, po ke fakatutuku, po ke tagi, ti nakai tuai fai matematekelea; ha kua mole atu e tau mena fakamua.” (Fakakiteaga 21:4) Ko lautolu ni ne tututonu, nakai mahani kelea, ka kitia e magaaho ia. Ko e fakamaloloaga ha ia ke fakatata mai ke he Atua mo e ako ke taute hana a finagalo, pete ni e mahani kelea a lautolu ne viko takai ia tautolu!
Kaeke kua manako a koe ke fakafeleveia mo e falu foki a fakamaamaaga po ke manako ke fai tagata ke ahi atu ke taute e fakaakoaga Tohi Tapu nakai fai totogi mo koe, fakamolemole tohi atu ke he Watch Tower, P.O. Box 142, Manurewa, New Zealand, po ke ke he kaina kua lata he lau tohi 2.