Tau Huhu Mai he Tau Tagata Totou

Kua talahau mai he 1 Ioane 4:18 ki a tautolu: “Nakai toka ai ha matakutaku ke he fakaalofa; ka ko e fakaalofa katoatoa kua vega kehe e ia e matakutaku.” Ka e tohia e Peteru: “Kia fakaalofa ke he tau matakainaga; kia matakutaku ke he Atua.” (1 Peteru 2:17) Kua maeke fefe mogoia a tautolu ke fakafelauaki e tau kupu nei?

Ko e ako mena tonu tokoua mai e tau aposetolo ko Peteru mo Ioane ia Iesu Keriso ni. Ti maeke ai a tautolu ke tua mo e mauokafua ko e felauaki e tau mena ne tohi e laua. Ke he tau kupu ne fatiaki mai i luga, ko e kei hanai ko e kehekehe e tau faga matakutaku ne vagahau e tau aposetolo ua nei ki ai.

Kia onoono mua la tautolu ke he fakatonuaga a Peteru. Tuga ne fakakite mai he tala katoa, ko e tomatomaaga mai he agaga ne foaki atu e Peteru ke he tau faoa Kerisiano hagaao ke he aga ha lautolu ki a lautolu ne pule malolo. Ke he taha puhala vagahau foki, ko e tala a ia ke he onoonoaga kua lata hagaao ke he omaoma ke he falu fahi pauaki he moui. Ti kua tomatoma a ia ke he tau Kerisiano ke omaoma ke he tau tagata tane ne moua e tau tutuaga lalahi he tau fakatufono he tagata, tuga e tau patuiki mo e tau kavana. (1 Peteru 2:13, 14) He fakaholo atu kua tohia e Peteru: “Kia fakalilifu a mutolu ke he tau tagata oti kana; kia fakaalofa ke he tau matakainaga; kia matakutaku ke he Atua; kia fakalilifu ke he patuiki.”​—1 Peteru 2:17.

He onoono ke he tala katoa, kua maaliali ko e magaaho ne pehe a Peteru kua lata e tau Kerisiano ke “matakutaku ke he Atua,” kua pehe e kakano hana kua lata a tautolu ke hokulo lahi e maimaina he mahani fakalilifu ke he Atua, ko e matakutaku neke nakai fakafiafia e pule malolo muatua.​—Fakatatai Heperu 11:7.

Ka e kua e tau mena ne talahau he aposetolo ko Ioane? He vala fakamua atu ia 1 Ioane veveheaga 4, ne vagahau e aposetolo ke he mena kua lata ke kamatamata ai e “tau agaga oti kua talahau” tuga ne moua mai he tau perofeta fakavai. Kua moli nakai mai he Atua ko Iehova e tau talahauaga ia; ko e mena moua mai a lautolu po ke atagia mai he lalolagi mahani kelea.

Kua kehekehe ai, ha ko e mena “mai he Atua” e tau Kerisiano fakauku. (1 Ioane 4:1-6) Ha ko e mena ia, ne ole fakamakamaka ai a Ioane: “Ko e tau tagata fakahelehele na e, kia feofanaki a tautolu, ha ko e mena mai he Atua e fakaalofa.” Ko e Atua ne fakamakaukau ke fakakite e fakaalofa​—he “fakafano mai foki e ia hana Tama ko e lukutoto mo e tau hala ha tautolu.” (1 Ioane 4:7-10) Kua lata ai a tautolu ke tali fefe?

Kua maaliali, kua lata na tautolu ke nonofo fakalataha tumau mo e ha tautolu a Atua fakaalofa. Kua nakai lata a tautolu ke lilika ki a ia po ke vivivivi he manamanatu ke fano ki a ia he liogi. He magaaho fakamua ne fakatonu mai a Ioane: “Kaeke kua nakai fakahala mai he tau loto ha tautolu kia tautolu, ti moua ai e tautolu e fakamalolo ki mua he Atua; Ko e tau mena oti foki ke ole atu ai a tautolu, kua moua mai e tautolu ia ia, ha kua omaoma a tautolu ke he tau poaki hana.” (1 Ioane 3:21, 22) E, kua moua e tautolu mai he logonaaga hifo mitaki e ataina ke o atu ke he Atua mo e nakai nonaia po ke lolelole lahi e loto he matakutaku. He fakaalofa, kua ataina a tautolu ke vagahau, po ke o ki a Iehova he liogi. Ke he mena nei, “nakai toka ai ha matakutaku ke he fakaalofa.”

Kia tuku fakalataha a e tautolu e manatu ua ia. Kua lata tumau ai e Kerisiano ke maimaina he matakutaku ki a Iehova, he hake mai he mahani fakalilifu ne hokulo lahi ke he hana tuaga, malolo, mo e fakafiliaga tonu. Ka e fakaalofa ai foki a tautolu ke he Atua ha ko ia ha tautolu a Matua mo e logona ko e tata lahi ki a ia mo e ataina ke o atu ki a ia. Ka e nakai lolelole e loto he lilika ki a ia, kua tua a tautolu ko e maeke a tautolu ke o atu ki a ia, tuga ne tama tote kua ataina ke fano ke he matua fakaalofa.​—Iakopo 4:8.