“Tokoluga Tuga e Arasi i Lepanona”

KO E tau mouga fulufuluola i Lepanona kua tutupu ai e tau akau ne talahaua ko e Arz Ar-rab, kakano ko e “Tau Arasi he Iki.” Ko e tau akau mamahaki nei, ne maluia ai e tau mouga, ne talahau ai he Tohi Tapu laga 70​—molea atu ke he falu akau foki.

Ke fakamaama e tau arasi mamahaki i Lepanona, kua fakaaoga he tau Tohiaga Tapu e tau kupu “mua hana mitaki” mo e “lahi.” (Lologo a Solomona 5:15; Esekielu 17:23) Ko e kupu lahi he arasi mo e mata he akau ne talahaua ke leva e talaga aki e tau fale mo e tau toga ti pihia foki ke taute aki e tau koloa. Ko e manogi mo e kula uhi he patu akau kua manaia lahi, mo e kili mao kua uka ke popo mo e fata ai e tau moko. Kua fuluola e tau akau he tokoluga ti lalahi, kua hokotia e tokoluga ke 37 e mita mo e kupu lahi ke 12 e mita, ti hokulo malolo foki e tau vakavaka. Ko e mena ia ni ne fakamaama he falu tagata gahua vaouhi he vaha nei ko e “foufou lilifu he akau he lalolagi”!

Ne fakatatai fakaperofeta he tagata tohi Tohi Tapu ko Esekielu e Mesia ke he muka he arasi, ne kua to ai he Atua. (Esekielu 17:22) Moli, ko e kupu Heperu ma e “arasi” kua kakano “ke mauokafua.” He vaha nei, ko e tau tutaki he Mesia, ko Iesu Keriso, kua lata ke tatai pihia ke ‘tumau ke he tua, kia fakamalolo,’ tuga e arasi makimaki. (1 Korinito 16:13) Fakakatoatoa fefe e mena nei? He totoko fakamalolo e tau fakaohoohoaga nakai faka-Kerisiano mo e fakauka mauokafua ai ke he puhala fakamoli mo e mahani Atua moli. Ko lautolu kua taute ai ne kua fakamaama mai he Tohi Tapu ko e “tututonu . . . [a ia] kua tupu tokoluga tuga e arasi i Lepanona.”​—Salamo 92:12, The New English Bible.