“Kia Fakaako a e Tama”

KO E katene fulufuluola kua lahi atu e gahua ke he gana noa ni falu tega akau ke he kelekele ti liu he falu mahina gahoa a mui ke helehele. Ko e gahua lahi mahaki ke tauteute e kelekele, gana e tau tega akau, ti fuifui mo e feaki e tau akau ke tutupu ke he motua.

Ko e tauteaga nei kua fakatata mitaki e moli he Tau Fakatai 22:6, ne kua talahau: “Kia fakaako a e tama ke lata mo e hana puhala; ka hoko foki ke he vaha ke motua ai a ia, nakai ni fano kehe ai a ia.” Moli, ko e fakaakoaga fakamatua ko e mena lahi mahaki he kautuaga ke feaki tama.

He lalolagi matematekelea nei, tokologa e tau mamatua kua kaumahala ke omaoma e fakatonuaga nei. Ka muitua a lautolu ke he puhala mau he pulotu kua lata e tau fanau he ako ke fakatonutonu ni e lautolu e tau mena vihi ha lautolu, kua fa fakaholo noa tuai e tau tama ha lautolu. Ko e puhala pihia kua fakatapakupaku e tau fanau fuata ikiiki ke he hufia kelea he tau tagata nakai fai matapatu fakaakoaga.​—Tau Fakatai 13:20.

Ti kua mitaki lahi ni ma e tau mamatua ke to e tau matapatu fakaakoaga Kerisiano i loto he tau fanau ha lautolu he feaki ai faka-Atua he ikiiki agaia! Ikiiki fefe? ‘Tali mai he vaha tote,’ he talahau he aposetolo ko Paulo. Ko e mena haia ne tupu ke he tama fuata tote ko Timoteo. Ko e matua fifine hana ko Eunike, mo e tupuna fifine hana ko Loi ne fakaako a Timoteo ke he “tau Tohi Tapu” ke maeke ia ia ke “iloa” mo e “iloa tonuhia.” Ko e fua? Ko e fakaako pihia ko e gahua aoga lahi he taute a ia ke “moua ai e moui.”​—2 Timoteo 1:5; 3:14, 15.

Ti pihia foki e vaha nei, ko e tau mamatua ‘aua neke fakalolelole ke he mahani mitaki’ ha ko e mena to helehele mai e tau fua mitaki ka “nakai fakalolelole” a lautolu. (Kalatia 6:9) Kua talahau he patuiki pulotu ko Solomona: “Kua olioli lahi ni e matua tane he tagata tututonu.”​—Tau Fakatai 23:24.